كوردیو ـ هه‌ولێر

به‌مه‌به‌ستی له‌نزیكه‌وه‌ ئاگاداربوون له‌چۆنیه‌تی به‌رێوه‌چوونی كاره‌كانیان و چاره‌سه‌ركردنی كێشه‌و گرفته‌كانیان ئه‌مرۆ 1-5-2012 د.رێكه‌وت حمه‌ ره‌شید وه‌زیری ته‌ندروستی ژماره‌یه‌ك نه‌خۆشخانه‌ی شاری هه‌ولێری به‌سه‌ركرده‌وه و داواشى  له‌ پزیشكه كان كرد به‌گیانی لێبورده‌ییه‌وه‌كاره‌كانیان ئه‌نجامبده‌ن تاوه‌كو كه‌رتی ته‌ندروستی بۆ خزمه‌تی هاوڵاتیا به‌كاربهێنرێت‌.

 له‌سه‌ره‌تای سه‌ردانه‌كه‌شیدا وه‌زیری ته‌ندروستی  نه‌خۆشخانه‌ی فریاكه‌وتنی ڕۆژهه‌ڵاتی شاری هه‌ولێری به‌سه‌ركرده‌وه‌ له‌گه‌ڵ به‌رێوه‌به‌رو كارمه‌ندان و پزیشكانی ئه‌و نه‌خۆشخانه‌یه‌ كۆبوه‌ دواتر یه‌كه‌یه‌كه‌ به‌شه‌كانی نه‌خۆشخانه‌ی فریاكه‌وتنی رۆژهه‌ڵاتی به‌سه‌ركرده‌وه‌ و چاوی به‌ژماره‌یه‌ك نه‌خۆش كه‌وت و داوای له‌به‌رێوه‌به‌ر و پزیشكان كرد هه‌رچی زووه‌ چاره‌سه‌ری پێویست بۆ نه‌خۆشه‌كان بكه‌ن.

پاشان د.رێكه‌وت حمه‌ ره‌شید وه‌زیری ته‌ندروستی به‌یاوه‌ری به‌رێوه‌به‌ری فه‌رمانگه‌ی ته‌ندروستی هه‌ولێر سه‌ردانی نه‌خۆشخانه‌ی له‌دایك بوون و منداڵان و راپه‌رین و نه‌خۆشخانه‌ی فریاكه‌وتنی خۆرئاوای كرد و له‌نزیكه‌وه‌ له‌گه‌ڵ به‌رێوه‌به‌ر و كارمه‌ند و پزیشكان باسیان له‌ كێشه‌ و گرفته‌كانی به‌رده‌م خزمه‌ت كردنی زیاتری هاوڵاتیان كرد و به‌ئامانجی باشتركردنی خزمه‌ت گوزاری ته‌ندروستی له‌نه‌خۆشخانه‌كان و به‌ده‌نگه‌وه‌ هاتنی كه‌رتی ته‌ندروستی بۆدانیشتوانی هه‌رێمی كوردستان له‌كاتی پێویستدا.

له‌كۆتایی به‌سه‌ركردنه‌وه‌كه‌شی د.رێكه‌وت حمه‌ ره‌شید وه‌زیری ته‌ندروستی رۆڵ و ئه‌ركی پزیشكان و كارمه‌ندانی ته‌ندروستی به‌رزنرخاند له‌خزمه‌ت كردنی نه‌خۆش و داواشی لێكردن به‌گیانێكی لێبورده‌ی كاره‌كانی سه‌رشانیان ئه‌نجامبده‌ن بۆئه‌وه‌ی كه‌رتی ته‌ندروستی به‌ته‌واوی بكه‌وێته‌ خزمه‌تی دانیشتوانی هه‌رێمی كوردستان و هاوڵاتیانی بیانی كه‌سه‌ردانی نه‌خۆشخانه‌كان ده‌كه‌ن.

أ.س