كوردیو ـ سلێمانی
فۆتۆ: هێمن حسن
دوای ڕووداوی تەمومژاوی خنكانی قائیمقامی سلێمانی و كادیری دیاری یەكێتی نیشتیمانی لە زیندانی ئاسایشدا بە تۆمەتی تێوەگلانی لە دۆسیەی گەندەڵی، وتەبێژی مەكتەبی سیاسی یەكێتی ڕایدەگەیەنێت بە تەواوی پشتگیری لە بڕیارەكەی سەرۆك تاڵەبانی دەكەن و هەركەسێكی دیكەش لەو دۆسیەیە بگلێت دەبێت یاسا بڕیاری لەسەر بدات و ئێمە ملكەچ دەبین بۆی.
ئازاد جوندیانی وتەبێژی مەكتەبی سیاسی یەكێتی نیشتیمانی كوردستان تایبەت بۆ كوردیو ووتی:" لەسەرەتادا دۆسیەكەی قائیمقام لەبەردەم دادگادا بووە و ئەمڕۆش جەنابی سەرۆكی تاڵەبانی لیژنەیەكی پێكهێناوە بۆ بەدواداچونی كەسی خۆكوشتنەكە و ئەنجامەكەشی بۆ ڕای گشتی و لایەنە پەیوەندیدارەكان ڕادەگەیەنرێت".
جوندیانی وتیشی: ئێمە زۆر نیگەرانین بەو ڕووداوە و ناڕەحەتین بەوەی ئەم كێشە بە زیانی كاكە زانا كۆتایی هات بە تایبەت یەكلا نەبووەوە كە بڵێن ناوبراو تاوانبار بووە و دادگا بڕیاری نەداوە، بۆیە بە ڕاستی ئەم ڕووداوە ناخی ئێمەی هەژاند بە تایبەت ئەم ڕووداوە لە ناوزینداندا ڕوویدابوو، بۆیە لە دڵەوە نیگەرانی بۆ كەسوكاری كاك زانا ڕادەگەیەنین".
وتەبێژی مەكتەبی سیاسی یەكێتی دوپاتیشی كردەوە كە كە ئێمە بەدواداچوونی بڕیارەكەی سەرۆك كۆمار دەكەین و یەكێتیش هەموو هاوكاریەكی لیژنەكە دەكات.
ناوبراو ووتی : تاوەكو ئێستا ئەنجامی لێكۆڵینەوە ڕانەگەیەنراوە ناكرێت هەر تەنها لەو ڕووە سەیری ئەو كەیسە بكەین كە پێ دەچێت كەسانی دیكە لە پشت ڕووداوەكەوە بن، ئەی بۆ لە ڕووە سایكۆلۆجیەكەوە سەیری نەكەین كە كە بەرپرسێك لە هەڕەتی ئیشكردندا بووە و توشی كەیسێك بووە كە لێكۆڵینەوەی لەسەر بووە و دوچاری ئەو بڕیارە بووە".
سەبارەت بە ئەگەری تێوەگلانی بەرپرسانی دیكەی یەكێتی نیشتیمانی كوردستان لە كەیسەكەی قائیمقامی سلێمانی، جوندیانی ووتی: ئێمە پرینسپیمان ئەوەیە كە یاسا دەبێت لە هەموو كەیسێكدا سەروەر بێت و هەر كەسێك بە هەر ناونیشانێك بێت داواكراو بێت بۆ شایەتی دان یاخود تۆمەتبار كردن، یەكێتی ڕێگر نابێت و پشتیوان دەبێت بۆ یەكلاكردنەوەی كێشە یاساییەكان".
أ.م
