روونكردنەوەیەك بۆ ڕای گشتی

جارێكی تر چەند كەناڵێكی ڕاگەیاندن، وەك پیشەی هەمیشەییان و دوور لە پرنسیپ و ئیتیكی كاری ڕۆژنامەوانی، هەواڵێكی چەواشەكاریان بڵاوكردۆتەوە، گوایە (د. نەجمەددین كەریم) لە كاتی گەشتكردنی بۆ وڵاتی لوبنان، لە فرۆكەخانەی بەیروت دەستگیركراوە.

لێرەوە بۆ هەموو هاونیشتمانیان لە كوردستان و بە تایبەت شاری كەركوك ڕادەگەیەنین؛ كە سەرلەبەری ئەو هەواڵە دوورە لە ڕاستیەوەو (د. نەجمەددین كەریم) بۆ كاری ئاسایی و دیبلۆماتی خۆی گەشتی دەرەوەی وڵاتی كردووەو هەفتەی داهاتوو دەگەڕێتەوە كوردستان. هاوكات بە پێویستی دەزانین ئەوە بخەینەڕوو؛ دروستكردنی ئەم جۆرە هەواڵانە بۆ چەواشەكردن و بەلارێدابردنی هاونیشتمانیانەو هەروەها بۆ دوورخستنەوەی ڕای گشتیە لەو كێشەو گرفتانەی ئەمڕۆ لە پارێزگای كەركوك هەیە.

نووسینگەی ڕۆژنامەوانی دكتۆر نەجمەددین كەریم

 

 

داعش لە مەخمور خۆی ڕێكدەخاتەوە، هاوڵاتیان باس لەوە دەكەن، كە داعش مەترسی لەسەر ژیانیان دروستكردووەو چەند خولەكێك لە ناوەندی مەخمورەوە دوورن.

هەرچەندە كۆتاییهاتنی داعش لە عێراق و سوریا ڕاگەیەندرا، بەڵام لە عێراق و باشوری كوردستاندا جوڵەیان دەستپێكردۆتەوە، بەتایبەت لە سنووری پارێزگاكانی، كەركوك، موسڵ و دیالە، تا ئێستاش جگە لە ئۆپەراسیۆنی ناوبەناوی سوپای عێراق، هاوپەیمانی نێودەوڵەتی هیچ هەنگاوێكی ئەوتۆی نەناوە.

شارۆچكەی مەخمور، كە كەمتر لە (100) كیلۆمەتر، لە شاری هەولێرەوە دوورە، لە ئێستادا لەلایەن چەكدارەكانی داعشەوە مەترسی لەسەرە، بەپێی قسەی هاوڵاتییەكی سنوورەكە بێت، چەكدارەكان نزیكەی دە خولەك لە مەخمورەوە دوورن، بەردەوام دەغوڵودانی هاوڵاتیانی سنوورەكە دەسوتێنن و بە ئاشكرا دەگەڕێن، كە لە ئێستاداو دوای ڕووداوەكانی (16/10) فیرقەی (14) ی سوپای عێراق لە سنوورەكەیەو ئاسایش ئەوان لێی بەرپرسن، ئیدارەی شارەكە گەڕاوەتەوەو هەمان ئیدارەی پێش (16/10) یە.

یەكێك لە مەڕدارانی سنوورەكە، كە بەهۆی مەترسییەكانی سەر ژیانییەوە رایگەیاندووە، ئێستا ئەوان لە شارۆچكەی مەخمورن و دۆخیان زۆر خراپە، ناتوانن بە ئارەزووی خۆیان لە سنوورەكە بگەڕێن و چەكدارانی داعش دەغڵ و دانیان دەسوتێنن ئۆتۆمبێل و دەڕاسەیان دەسوتێنن.

ئەو هاوڵاتییە داوایكرد، كە پێشمەرگە بگەڕێتەوە بۆ سنوورەكەیان، چونكە پێی وایە، سوپای عێراق لە مەخمور ڕێكخستوو نیین و بێسەروبەرن، دەشڵێت، كاتێك پێشمەرگە لە سنوورەكە بووە ئەوان كێشەیان نەبووە.

ئەو هاوڵاتییە بۆ ڕۆژنیوز باس لەوە دەكات، كە چەكدارەكانی داعش (10) خولەك لە مەخمورەوە دوورن، ئەو دەڵێت : هەر لە پشت سایلۆكەوە بە ئارەزووی خۆیان دێن و دەچن و كەس لێپێچینەوەیان لەگەڵدا ناكات، ئەوە ئێستا هاتوونەتە گوندەكانی گردە شین، مەلا غانی، گرگراو و كورتان دروو، زۆر سەیرە، ئێستا لە چیای قەرچوغ چەند هێز هەیە، لە سەرەوەی چیاكە پێشمەرگەو لە ناوەڕست داعش و لە خوارەوەی چیاكەش سوپای عێراقی لێیە، ئێمە نازانین ئەم فیلمە چۆن بەڕێوەدەچێت.

 

 

(عەلی توانا) ئەكتەری ناسراوی باشوری كوردستان بەهۆی نەخۆشییەوە كۆچی دوایی كرد.

(عەلی توانا) چیرۆكنووس و ئەكتەر، كە ماوەی چوار مانگە تووشی نەخۆشی پوكانەوەی مێشك بووە، لە نەخۆشخانە لەشاری سلێمانی كۆچی دوایی كرد.

(عەلی توانا) ساڵی (1943) لە گەڕەكی سابونكەرانی سلێمانی لەدایكبووە، زیاتر لە (50) ساڵ خزمەتی هونەری كردووە، ماوەی چەند ساڵێكیش سەرۆكی كۆمەڵەی هونەرە جوانەكانی سلێمانی بووە، سەرەنجام دوێنێ‌ بەیەكجاری ماڵئاوایی لە ژیان كردو كۆچی دوایی كرد.

 

 

 

 

 

ماوەی (19) ڕۆژە منداڵێكی تەمەن چوار ساڵ، لە شارۆچكەی خانەقین وون بووە، لەلایەن چەند جوتیارێكەوە تەرمەكەی دۆزرایەوە.

لە گوندی عەلیاوەی سەر بەشارۆچكەی خانەقین لە پارێزگای دیالە، تەرمی منداڵێكی تەمەن چوار ساڵ بەناوی (لانە ئەندام) دۆزرایەوە.

بەپێی زانیارییەكان لەكاتی دروێنەكردن لەگوندی عەلیاوە چەند جوتیارێك تەرمی لانەیان دۆزیوەتەوە، لە ئێستادا گواستراوەتەوە بۆ پزیشكی دادوەری نەخۆشخانەی گشتی دیالە بۆ پشكنین.

لانە ئەندام، ڕۆژی دووی ئەم مانگە، لە گوندی عەلیاوا، وون ببوو، دایك و باوكی لانە نابیستن و خۆیشی بەهەمان شێوە نابیست بووە.

 

 

چەند سەرچاوەیەكی هەواڵی باس لەوەدەكەن، پارێزگاری پێشووی كەركوك لە لوبنان لەلایەن پۆلیسی ئینتەرپولەوە دەستبەسەر كرابێت.

وا بڵاوكراوەتەوە كە (د. نەجمەددین كەریم) پارێزگاری پێشووی كەركوك، لە فڕۆكەخانەی بەیروت لەلایەن پۆلیسی ئینتەرپولەوە دەستبەسەركرابێت.

بەپێی زانیارییەكان هەواڵەكە لەلایەن تۆڕی راگەیاندنی عێراقی و باڵیۆزی عێراق لەلوبنان پشتڕاست كراوەتەوە، بەڵام نووسینگەی (د. نەجمەددین كەریم) رەتی هەواڵەكەی كردۆتەوە.

هاوكات باسیش لەوەكراوە، كە (د. نەجمەددین كەریم) بۆ دیداری خانەوادەكەی ڕۆژی دووشەممە عێراقی ڕووەو نەمسا جێهێشتووە، بەڵام نەچۆتە لوبنان.

 

 

 

وەزیری بەرگری ئەمریكا رایگەیاند، ئەو هەڕەشەیەی ئێران لەسەر ناوچەكە هەیەتی هێشتا زۆرە، بەڵام ئەو ڕێوشوێنانەی وڵاتەكەی گرتییەبەر ئەگەری هێرشكردنە سەر ئەمریكییەكانی ڕاگرت.

بەڵام شانەهان ڕوونی نەكردەوە بەدیاریكراوی مەبەستی چیەو بەرپرسانی وەزارەتی بەرگریش ڕوونیان نەكردەوە كە ئایا هەڕەشەكانی ئێران ماون یان نا.

شانەهان بە ڕۆژنامەنووسانی وت، هیچ هێرشێك نەكراوەتە سەر ئەمریكییەكان، من ئەوە بە ڕاگرتن دەزانم.

وتیشی : ئەمە مانای ئەوە نیە ئەو هەڕەشانەی پێشتر دیاریكراون كۆتاییان پێهاتووە، پێمان وایە وەڵامدانەوەی ژیرانەی ئێمە كاتێكی داوە بە ئێران تاوەكو بە حسابەكانیاندا بچنەوە.

جێگەی ئاماژەیە لەم مانگەدا ئەمریكا كۆمەڵێك كەشتی فڕۆكە هەڵگرو فڕۆكەی بۆمب هاوێژو موشەكی پاتریۆتی لە ڕۆژهەڵاتی ناوەڕاستدا بڵاوكردەوە وەكو وەڵامدانەوەیەك بۆ هەڕەشەكانی ئێران.

دوای ئەوەی ئەمریكا سزاكانی سەر ئێرانی توندتركردەوە، لەم هەفتانەی دواییدا گرژییەكانی نێوان تاران و واشنتۆن زیادیانكردو ئەوەش وایكرد ئێران هەندێك لە بەرپرسیارێتیەكانی لە ڕێكەوتنە ناوەكییەكەدا كەم بكاتەوە.

شانەهان وتی: تەنها هیوادارم ئێران گوێ بگرێت، ئێمە لە ناوچەكەداین بۆ مامەڵەكردن لەگەڵ زۆر شتدا، بەڵام نەك بۆ شەڕكردن لەگەڵ ئێراندا.

وتیشی : دەمەوێت بڵێم ئێمە لە ماوەیەكداین كە هێشتا هەڕەشەكان زۆرن و ئەركی ئێمە ئەوەیە دڵنیا ببینەوە لەوەی هەڵسەنگاندنی هەڵە لەلایەن ئێرانەوە ڕوونەدات.

 

 

سەرۆك وەزیرانی عێراق بۆ یەكەمین جار لەدوای ئەوەی بووە سەرۆك وەزیر سەردانی كوەیت دەكات.

نوێنەری عێراق لە كوەیت (عەلائـ هاشمی) بە ڕۆیتەرزی وتوە، مەبەست لە سەردانەكەی (عادل عەبدولـمەهدی) سەرۆك وەزیرانی عێراق بۆ كوەیت تەواوكردنی سەردانەكانیەتی بۆ وڵاتانی دراوسێی عێراق و هەماهەنگی هاوبەشە لەنێوان دوو وڵاتەكەدا، بەتایبەتی دوای پێكهێنانی لێژنەی باڵای هاوبەشی نێوانیان كە لە دوانزەی ئەم مانگەدا بە سەرۆكایەتی هەردوو وەزیری دەرەوەی عێراق و كوەیت پێكهێنرا.

هاشمی وتیشی، سیاسەتی كوەیت و عێراق ئێستا لەیەكترەوە نزیكە، بەتایبەتی دوای كۆبوونەوەكانی لێژنە هاوبەشەكەی نێوانیان.

ئەم سەردانەی (عادل عەبدولـمەهدی) یش لەنێوەندی گرژییەكانی نێوان ئەمریكاو ئێراندا دێت.

 


لەماوەی چوار مانگی یەكەمی ئەمساڵ لەلایەن لیژنەی لەناوبردنی ماددە هۆشبەرەكان سەر بە بەرێوەبەرایەتی گشتی تەندروستی سلێمانی بەهاوكاری نوێنەرانی دادگای سلێمانی و دەزگای ئاسایشی هەرێم و ئاسایشی سلێمانی لەسووتوخانەی تەندروستی لەناوچەی تانجەرۆ بڕێكی زۆر ماددەی هۆشبەر سووتێنراوە و لەناوبراوە.

بەپێی ئاماری لیژنەی لەناوبردنی ماددە هۆشبەرەكان ئەو ماددە هۆشبەرانەی لەماوەی چوار مانگی یەكەمی ئەمساڵدا سووتێنراوە بریتی بووە لە 11 كیلۆ حەشیش و دوو كیلۆ تلیاك و نیوكیلۆ ماددەی هێرۆین و 140 گرام ماددەی كریستاڵ و 800 هەزار دەنك حەبی ترامادۆڵی (200 ملغم) لەگەڵ 500 هەزار حەبی جۆراوجۆری وەك میتادون و ئەمفیتامین و چەند جۆرێكی دیكە و 26 دەرزی ترامادۆڵ و 100 گرام ماددەی گوماناوی.
أ.س

ئەندامێكی ئەنجومەنی نوێنەرانی عێراق لە كوتلەی سائیرون باس لە موچەی فەرمانبەرانی هەرێم دەكات و ئاشكرای دەكات، دەبێت هەرێم داهاتی فرۆشی ئەو نەوتە بنێرێت كە رەوانەی دەكات بۆ بازاڕەكانی دەرەوە.

ماجد وائیلی ئەندامی لیژنەی دارایی لە ئەنجومەنی نوێنەرانی عێراق رایگەیاند: شایستە داراییەكانی بەغدا وەك ئەوەی لەیاسای بودجەدا هاتووە، دراوەتە هەولێر، بەڵام تائێستا ئەوان داهاتی فرۆشی نەوتیان نەناردووە.

ئەوەشی ئاشكرا كردوە، وا هەستدەكەین ئیدارەی هەولێر سستن  لە ناردنی ئەو بڕە داهاتە بۆ حكومەتی ناوەندی لەبەغدا.

ماجد وائیلی ئەوەشی بۆ دواڕۆژ روونكردەوە: بۆچونێكی پێشنیازكراو هەیە كە پەنا بۆ بودجەی تەواوكاریی ببرێت، بەڵام هێشتا كاری لە سەر نەكراوە.

پەڕەى 4 لەکۆى 5191 پەڕەدا