پەرلەمانتارێكی فراكسیۆنی پارتی لە پەرلەمانی كوردستان پێیوایە رێكەوتنی یەكێتی ‌و گۆڕان كوردستان توشی دابەشبوونێكی قوڵتر دەكات.

فەرحان جەوهەر، ئەندامی پەرلەمانی كوردستان لە فراكسیۆنی پارتی، لە وتارێكدا لەروانگەی خۆیەوە تیشك دەخاتەسەر رێكەوتنی نێوان یەكێتی‌و پارتی‌و پێیوایە "یەكێتی بەهەمان نیاز‌و نەفەسی گۆڕان ئەو رێكەوتنە" ئیمزا ناكات ‌و دەڵێت "بەڵام بەدڵنیاییەوە یەكێتی بەمەبەست و نیازی جیاوازتری هەیە لە گۆڕان، چونكە مەبەستی گۆڕان لەم رێكەوتنە لەگەڵ یەكێتی كۆكردنەوەی هێزی سیاسی و سەربازییە لە دژی پارتی، ئەگەرنا هەموو ئەو هۆكارانەی كاتی خۆ وای كردووە گۆڕان لە یەكێتی جیابێتەوە، نەك نەماون بەڵكو زیاتربوونە".


ڕێبین عه‌لی

 

هه‌رسىَ هێرشبه‌ره‌كه‌ى به‌رشلۆنه‌ ناسراوه‌ به‌ (MSN)ژماره‌یه‌كى نمونه‌یى گۆل تۆمار كردنیان تۆمار كردووه‌ ، دواى ئه‌وه‌ه‌ى شه‌وى رابردوو پێنچ گۆلیان تۆمار كرد له‌یانه‌ى ئیسپانیۆل و ژماره‌ى گۆله‌كانیان بۆ (249)گۆل به‌رز بویه‌وه‌ .
رۆژنامه‌ى سپۆرتى كه‌تالۆنى بلاَوى كردۆته‌وه‌ هه‌رسىَ یاریزانه‌كه‌ى به‌رشلۆنه‌ هه‌وڵ ده‌ده‌ن ژماره‌ى گۆله‌كانیان بگه‌ینه‌ (250)گۆل به‌ر له‌ كۆتایى هاتنى وه‌رزى ئه‌مساڵ ، میسى و سوارێز و نیمار رێژه‌ى (67,8%)گۆلیان تۆمار كردووه‌ له‌وكاته‌ى لویس ئه‌نریكى بۆته‌ راهێنه‌رى به‌رشلۆنه‌ .
له‌وه‌رزى یه‌كه‌م هه‌رسىَ یاریزان (122)گۆلیان تۆمار كرد به‌م شێوه‌یه‌ بوو :
میسى (58)گۆل
سوارێز (25)گۆل ،به‌لاَم سه‌رتایى یارى كردنى به‌درێسى بلوگرانه‌ له‌ (24)ئكتۆبه‌رى (2014)بوو .
نیمار (39)گۆل
له‌وه‌رزى دووه‌م هه‌رسىَ یاریزان (127)گۆلیان تۆمار كردووه‌ به‌م شێوه‌یه‌ :
میسى (41)گۆل
سوارێز (56)گۆل
نیمار (30)گۆل.

ن.ش

ئەمڕۆ لەگەڵ كردنەوەی بازاڕەكانی وزە نرخی نەوت لە هەردوو جۆری برێنت و خاو بەرزبوونەوەی بەرچاوی بە خۆیەوە بینی و له‌ ئێستاشدا نرخه‌كانی نه‌وت به‌خراپی دابه‌زین.

ئەمڕۆ دووشەممە نرخی نەوت بۆ 43 دۆلار و 81 سەنت دابه‌زی.

هاوكات نرخی بەرمیلێك نەوتی خاویش كە لە كردنەوەی بازاڕدا بە 45 دۆلار و 2 سەنت بوو بۆ 43 دۆلار و 53 سەنت دابه‌زی.


ڕێبین عەلی

نرخی دۆلار لە کاتی داخستنی بازاڕدا بەرزبوونەوەی بەخۆیەوە بینی و نرخی ١٠٠ دۆلار گەیشتە ١٢٩ هەزار و 75٠ دینار.

١٠٠ پاوەن بە ١٨٦ هەزار دینارە.

١٠٠ یۆرۆ بە ١٤٧ هەزار و ٥٠٠ دینارە.

١٠٠ هەزار تمەنی‌ ئێرانی‌ بە ٣٧ هەزار دینارە.

١٠٠ لیرەی تورکی بە ٤٣ هەزار ٥٠٠ دینارە.


ڕێبین عه‌لی

دەستەی سەربەخۆی مافی مرۆڤ، لەبارەی كوشتنی قوتابییەكەی زانكۆی جیهان هاتە دەنگ و ئاماژەی بەوە كرد كە ئەو ڕووداوە هەموو لایەكی دڵگران كردووە.


ئەمڕۆ دووشەممە 9\5\2016، دەستەی سەربەخۆی مافی مرۆڤ ڕاگەیاندراوێكی بڵاو كردەوە و تێیدا ئاماژەی بەوە كرد: “دوای ئەوەی لەچەند ڕۆژی ڕابردوو گەنجێكی شاری هەولێر لەلایەن كەسێكەوە به ‌بەرچاوی خەڵك و لەناو قەرەباڵغیی شار كوژرا، لەسەر بەكارهێنانی (فول لایتی ئۆتۆمبێل) بەرامبەری، ئەو ڕووداوە هەموو لایەكی نیگەران كردووە، ڕووداوێكی ناخ هەژێن و نەخوازراو بوو”. جەختیش لەوە كراوەتەوە كە دەستەكە وێڕای دڵگرانییان بۆ ئەو ڕووداوە، بەپێویستی زانیوە هاووڵاتییان لە بەكارهێنانی توندوتیژی و بەكارهێنانی چەك و زمانی هەڕەشە لە كاتی بوونی كێشە و گرفتەكان، خۆیان بە دوور بگرن.

دەستەی سەربەخۆی مافی مرۆڤ ئەوەشی ڕوون كردووەتەوە: “هێشتا بكوژەكە نەدراوەتە یاسا و یەكلا نەبووەتەوە و دیار نییە، چونكە تەنها یاسا دەتوانێت كێشەكان یەكلا بكاتەوە و ماف بۆ تاوان لێكراو وەربگرێتەوە و مافی تاوانباریش پارێزراو بێت”. جەختیشی لەوە كردووەتەوە كە وەك دەستەی مافی مرۆڤ، لە نزیكەوە چاودێریی ڕەوشەكەیان كردووە و‌ چاوەڕێی هەوڵەكانی پۆلیس و هێزە ئەمنییەكانیان كردووە،‌ بۆ ئەوەی لە ڕێگەی دادگاوە ئەو كەیسە یەكلا بكەنەوە. دووپاتیشی كردووەتەوە: “نەمانویستووە دەست وەردەینە قۆناغەكانی بەدواچوون و لێكۆڵینەوەكان و ڕێكارە یاساییەكان لەو كەیسە”.

هەر لەو ڕاگەیاندراوەدا ئەوە دووپات كراوەتەوە كە دەبێت دیاردەی چەكداری و هەڵگرتنی لە دەرەوەی دەوام و چەكداریی بێ مۆڵەت كۆنتڕۆڵ بكرێت و به ‌یاسا ڕێك بخرێت، سەرەڕای بوونی یاسای ژمارەی (16) ی ساڵی 1993ی تایبەت به ‌چەك، بەڵام ئەو یاسایە بۆ ئێستای هەرێمی كوردستان و ئەو قۆناغە ناگونجێت و پێویستە هەموار بكرێتەوە، وەك دەستەكە ئاماژەی پێ داوە. لە كۆتاییشدا دەستەی سەربەخۆی مافی مرۆڤ هیوای خواستووە، هەرچی زووە ئەو كەیسە ڕێكاری یاسایی خۆی وەربگرێت و لە ڕێگەی دادگاوە یەكلا بكرێتەوە.

 

لە كۆبونەوەی ئەنجومەنی وەزارەت, كە بەسەرپەرشتی د.یوسف گۆران وەزیری خوێندنی باڵا و توێژینەوەی زانستی بەڕێوەچوو، ڕێنماییەكانی خوێندنی باڵا (ماستەر و دكتۆرا) پەسند كرا.

لەو كۆبونەوەیەدا كە ئەمڕۆ دووشەممە, ڕێكەوتی (٩/٥/٢٠١٦) لە هۆڵی كۆبونەوەكانی وەزارەت بەئامادەبونی ڕاوێژكارو سەرۆكی سەرجەم زانكۆكان و بەڕێوەبەرە گشتیەكانی دیوانی وەزارەت بەڕێوەچوو, لەسەرەتادا د.یوسف گۆران كورتەیەكی لەبارەی گرنگی وەرگرتن و شێوازی وەرگرتن باسكرد و ئاماژەی بەوەشدا كە كۆبونەوەی داهاتوی ئەنجومەنی وەزارەت تەرخان دەكرێت بۆ ناوەندی وەرگرتن.

لە بەشێكی دیكەی كۆبونەوەكەدا گفتوگۆ لەبارەی ڕێنماییەكانی خوێندنی ماستەرو دكتۆرا كرا، لەو چوارچێوەیەدا دوای ئەوەی ڕێنماییەكانی خوێندنی دكتۆرا لەلایەن ئەندامانی ئەنجومەنی وەزارەتەوە تاوتوێ كرا، بەچەند گۆڕانكارییەك پەسند كرا، بەپێی ڕێنمایی خوێندنی دكتۆرا ئەمساڵ جیاواز لە ساڵی ڕابردوو ژمارەیەك لە كورسیەكانی دكتۆرا بۆ دەزگاو دامەزراوەكانی دەرەوەی وەزارەتی خوێندنی باڵا و توێژینەوەی زانستی بە سیستمی پارالێل دەبێت تەرخان دەكرێت, ئەوەش لە پێناو هاندانی خوازیارانی دكتۆرا بۆ ئەوەی ڕوو لە زانكۆ ئاست نزمەكانی دەرەوەی وڵات نەكەن، بەڵام بۆ هەڵگرانی بڕوانامەی ماستەر كە لە دەزگاو دامەزراوەكانی خوێندنی باڵان و خوازیارن درێژە بە خوێندنی دكتۆرا لە زانكۆكانی هەرێم بدەن، ئەوا خوێندن بەپێی پلانی زانكۆكان بێ بەرامبەر دەبێت. لەهەمان كاتدا ڕێنماییەكە دەرفەتی خوێندنی بەو خوازیارانەش داوە كە دانیشتووی دەرەوەی ئێراقن (واتە هەڵگڕی رەگەزنامەی ئێراقی نین) بەمانەش دەوترێ پێشكەشكاری نێودەوڵەتی, بەهەمان شێوەی ئەو خوازیارانەش لە كاتی دەستەبەركردنی مەرجە زانستیەكاندا ڕاستەوخۆ بە سیستمی پارالێل وەردەگیرێن و ناچنە پێشبركێ، مەبەست لەم هەنگاوەش بریتییە لە هاندانی پێشكەشكاری نێودەوڵەتی بۆ مەبەستی ئەنجامدانی خوێندنی دكتۆرا لە زانكۆكانی هەرێمی كوردستان.

بەپێی خاڵێكی دیكەی ڕێنماییەكەدا هەر پێشكەشكارێك لە ناوەو دەرەوەی وەزارەتی خوێندنی باڵا و توێژینەوەی زانستی ئەگەر تەمەنی لە سەروی مەرجی یاساییەوە بێت بەهەمان شێوە بۆی هەیە داواكاری خوێندن پێشكەشی بكات، بەڵام خوێندنەكەی بەسیستمی پارالێل دەبێت.

‌لە بەشێكی دیكەی كۆبونەوەكەدا گفتوگۆ لەبارەی ڕێنماییەكانی خوێندنی باڵا/ ماستەر لە زانكۆ حكومیەكانی هەرێمی كوردستان بۆ ساڵی خوێندنی (٢٠١٦-٢٠١٧) كرا، لەو چوارچێوەیەشدا یەكە یەكەی خاڵەكانی ڕێنماییەكە گفتوگۆی چڕی لەبارەوە كرا، دواجار ڕێنماییەكان بەهەندێك گۆڕانكاری، ئەنجومەنی وەزارەت ڕێنماییەكەی پەسند كرد، بەپێی رێنماییەكانی خوێندنی ماستەر تێكرای نمرە (معدل)ی بەكالۆریۆسی پێشكەشكار (60%) دیاریكراوە، جگە لە دەرچووانی فاكەڵتی/كۆلێژ و سكوڵەكانی ( پزیشكی، پزیشی ددان، دەرمانسازی) كە رەچاوی كۆنمرەیان بۆ ناكرێت.
سەبارەت بە مەرجی زمانیش، بەپێی ڕێنماییە پەسندكراوەكە لە قۆناغی پرۆسەی پێشكەشكردن هەموو خوازیارێك مافی پێشكەشكردنی بۆ خوێندنی ماستەر هەیه ، ‌بەبێ هەبوونی مەرجی توانستی زمانی ئینگلیزی، بەڵام قوتابی/خوێندكاری ماستەر دوای وەرگیرانی لە خوێندن، مەرجە ئاستی توانستی زمانی ئینگلیزی بەرزبكاتەوە بۆ نمرەی (5)ی ئایلتس یان نمرەی(56ی TOEFL-IBT) یان نمرەی (495ی TOEFL-PBT) یاخود (47ی (PEARSON ACADEMIC-PTEبە مەبەستی چوونه ‌ناوەوەی بۆ كۆڕسی ئەكادیمی خوێندن، بە پێچەوانەوە مافی بەشداریكردنی لە كۆرسی ئەكادیمی نابێت تا مەرجی زمانی ئینگلیزی نمرەی داواكراوی سەرەوە بەدەست دەهێنێت تەنها دەبێتە كاندیدی خوێندنی ماستەر, كاتێك كە ئاستی زمانی پێویستی هێنا ئەو كات دەبێتە خوێندكاری ماستەر. لەهەمان كاتدا ئەو خوازیارانەی كە مەرجی توانستی زمانی ئینگلیزی داواكراوی سەرەوەیان تێدا بوو، ئەوا ڕاستەوخۆ دەست بە خوێندنی ئەكادیمی دەكەن. بۆ ئەو خوازیارانەشی كە مەرجی توانستی زمانی ئینگلیزی داواكراوی سەرەوەیان تێدا نیە، دەتوانن ئاستی توانستی زمانی ئینگلیزی خۆیان بەرز بكەنەوە ئەوەش بە ئەنجامدانی تاقیكردنەوەی توانستی زانستی بۆ گەیشتن بە ئاستی (56ی TOEFL-IBT) و هاوشێوەی ئاستی ستانداردی نێودەوڵەتی زمانی ئاماژەپێكراو. ڕێنماییە پەسندكراوەكە جەختی لەسەر ئەوەش كردۆتەوە كە ئەو پێشكەشكارانەی هەڵگری بڕوانامەی (بەكالۆریۆسن لە پسپۆری زمانی ئینگلیزی و وەرگێڕان)، پێویستە تاقیكردنەوەی توانستی زمانی ئینگلیزی ئەنجام بدەن و هەمان ئاست كە لە خالەكانی سەرەوە ئاماژەی پێدراوە بەدەست بهێنن.
بۆ مەرجی تاقیكردنەوەی توانستی زانستی لە ڕێنماییەكەدا جەخت لەسەر ئەوە كراوەتەوە كەتاقیكردنەوەی توانستی زانستی (30%) نمرەی بۆ تەرخان دەكرێت و، (70%)ی دیكەی نمرە لەسەر تێكرای نمرەی بەكالۆریۆس بۆ چوونە پێشبركێ ئەژمار دەكرێت، هەروەك مەرجە پێشكەشكار لەو تاقیكردنەوەیە دەربچێت (واتە مەرجە 15 نمرە یان زیاتر لەسەر 30 نمرەی تەرخانكراو بۆ تاقیكردنەوە بەدەست بهێنێت، بە پێچەوانەوە مافی چوونه ‌پێشبركێی نیە)، ئاماژە بەوەش كراوە كە نمرەی (15) پانزە لە تاقیكردنەوه هیچ خاڵ وەرناگرێت واتە (0) سفر (خاڵ)ی دەبێت و بە زیادبونی هەر نمرەیەك (1) یەك خاڵی بۆ زیاد دەكرێت.
سەبارەت مەرجی میچی تەمەنیش نابێت تەمەنی خوازیار لە (45) چل و پێنج ساڵ (لەسەر بنەمای ساڵی لەدایكبوون) بۆ كارمەندانی سەر بە دەزگاو دامەزراوەكانی وەزارەتی خوێندنی باڵا لە كاتی پێشكەشكردندا زیاتر بێت. سەبارەت بە پێشكەشكارانی دەرەوەی دەزگاو دامەزراوەكانی وەزارەتی خوێندنی باڵا خوێندنەكەیان بە شێوازی پارالێل دەبێت، هەروەك ئەو معید و فەرمانبەرانەی سەر بە دەزگاو دامەزراوەكانی سەر بە وەزارەتی خوێندنی باڵان و تەمەنیان لە (45) چل و پێنج ساڵ زیاترە، بۆیان هەیە داوا پێشكەشكەشی بكەن بە هەمان پێوەرەكانی‌ سیستمی پاراڵێڵ.
هەر بە پێیی ڕێنماییەكان مەرجی ساڵانی خزمەت و تێپەربوونی ماوەی پێویست بەسەر دەرچووندا بەم شێوەیە دیاریكرا بۆ خوازیارانی دامەزراو (واتە دامەزراو بن لە یەكێك لە دامودەزگاكانی حكومەتی هەرێمی كوردستان)، پێشكەشكار مەرجە دوو ساڵی تەواوی خزمەتی فعلی دوای بەدەستهێنانی بڕوانامەی بەكالۆریۆس تا رێكەوتی دوایین رۆژی پێشكەشكردن هەبێت، بە پێچەوانەوە مافی وەرگرتنی مۆڵەتی خوێندنی نییە، هەروەك ئەو خوازیارانەی كە دانەمەزراون لە هیچ لە دەزگاو دامەزراوەیەكی حكومەتی هەرێمی كوردستان، بەبێ هەبوونی مەرجی دوو ساڵ دەرچوون و تێپەڕین بەسەر بەدەستهێنانی بڕوانامەی بەكالۆرۆس ‌مافی پێشكەشكردنیان هەیە.
سەبارەت بەو پێشكەشكارانەی كە دانیشتوی شارەكانی دیكەی ئێراقن یان هەڵگڕی رەگەزنامەی ئێراقی نین، بەهەمان شێوە مافی پێشكەشكردنی بۆ خوێندنی ماستەر بە سیستمی پارالێل هەیە. بۆ دەرچووانی زانكۆ تایبەتەكان-یش بەهەمان شێوە مافی پێشكەشكردنیان بە هەمان مەرج و رێنماییەكانی سەرەوە بە سیستمی پارالێل هەیە، بە مەرجێك زانكۆكە مۆڵەتی فەرمی لە وەزارەتی خوێندنی باڵاو توێژینەوەی زانستی حكومەتی هەرێمی كوردستان وەرگرتبێت و بڕوانامەكەی لە لایەن وەزارەتەوە پەسەندكرابێت.
هەروەك مەرجە‌ خوازیار پێشكەشی هەمان بواری خوێندنی ماستەر بكات لەسەر بنەمای پسپۆری بڕوانامەی بەكالۆریۆسەكەی، بەڵام سەبارەت بەو بەش و پسپۆڕیانەی كە لێك نزیكن یان لێكچوون هەیە لە نێوان پسپۆری هەردوو بەكالۆریۆس و ئەو پسپۆرییەی كه خوازیار دەیەوێت‌ لە ماستەر پێشكەشی بكات ئەوا دوای ئەنجامدانی بەراوردی زانستی (المقاصە العلمیە) لە لایەن لیژنەی زانستی بەش لە نێوان بڕوانامەی هەردوو بەكالۆریۆس و دەستنیشانكردنی پێداویستی لە خوێندنی چەند بابەتێك، دەتوانێ داواكاری پێشكەش بكەن.
لە كۆتایشدا لە ڕێنماییەكەدا جەخت لەسەر ئەوە كراوەتەوە كە كورسیە گشتیەكان بۆ دەرەوەی خوێندنی باڵا بە سیستمی پارالێل دەبێت و، كورسیەكانی تر بۆ خودی زانكۆكە و زانكۆ تازەكان و زانكۆ پۆلیتەكنیكیەكان دەبێت. پێشكەشكاران بۆ كورسیە تەرخانكراوەكانی زانكۆ تازەكان و زانكۆ پۆلیتەكنیكیەكان پێشبركێ دەكەن لەسەر ئەو كورسیانە. هەروەك كاندیدانی خولی دوەم و سێیەمی بەرنامەی تواناسازی مرۆیی بۆ خوێندنی ماستەر ئەوانەی تا ئێستا مامەڵەكانیان پرۆسێس نەكراوە و سەفەری دەرەوەیان نەكردووە بۆ مەبەستی پەیوەندیكردن بە خوێندن، دەتوانن داواكاری پێشكەش بكەن، ئەگەر لە پێشبركێ سەركەوتوو بن و بە فەرمی وەرگیران ئەوا ناویان لە لیستی كاندیدانی تواناسازی دەسرێتەوە، بەڵام ئەگەر وەرنەگیران ئەوا مافیان وەك كاندیدی تواناسازی پارێزراو دەبێت.
لە بەشێكی دیكەی كۆبونەوەكەدا گفتوگۆ لەبارەی كێشەی دارایی زانكۆی حەیات بۆ زانست و تەكنەلۆژیا كرا، بۆ ئەوەش د.جەمال كەمال سەرپەرشتیاری زانكۆ تایبەتەكان لە دیوانی وەزارەت كورتەیەكی لەبارەی كێشەی زانكۆی حەیان بۆ زانست و تەكنەلۆژیا خستەڕوو، لەو چوارچێوەیەشدا دوای تاوتوێكردنی لایەنەكانی كێشەكە، بەپێی مادەی (٢٦/١) لە یاسای ژمارە (٢)ی ساڵی (٢٠١٣)ی زانكۆ تایبەتەكان ئەنجومەنی وەزارەت بڕیاریدا بەپێدانی ماوەی (٣) مانگ تا ڕێكەوتی (١٠/٨/٢٠١٦) بۆ ئەوەی زانكۆكە كێشە داراییەكانی چارەسەر بكات، بەپێچەوانەوە پاڵپشت بەو مادەیەی سەرەوە زانكۆ لەلایەنی دامەزرێنەر جیا دەكرێتەوە و ئەنجومەنی زانكۆ بەسەرپەرشتی وەزارەت بەڕێوەدەبرێت تا دۆزینەوەی جێگرەوەیەك بەپێی دیاریكردنی ڕێنماییەك بۆ بەڕێوەبردنی كاروبارەكانی لەئەستۆ دەگرن.

كورديو -

 


فەرماندەیی ھەولێر لەسەر كوژرانی گەنجێكی شارەكە لەلایەن ئەفسەرێكی فەرماندەییەكەیانەوە رونكردنەوەیەك بڵاودەكاتەوە و تێیدا رایدەگەیەنێت تاوانبار بەھیچ شێوەیەك دوای ئەنجامدانی تاوانەكە لەھیچ بارەگایەكی فەرماندەیی نەبووە.

لەسەر كوشتنی گەنجێكی شاری ھەولێر بەناوی(بارزان) فەرماندەیی ھەولێر لە رونكردنەوەیەكیدا رایگەیاندووە، كە تاوان ھەر تاوانە و ھەركەسێك ئەنجامی بدات لەھەر جێگا و پلە وپایە یەك بێت، تاوانباریش دەبێت سزا بدرێت.

لەبەشێكی دیكەی رونكردنەوەكەیاندا ئاماژەیان بەوەداوە كە "كوشتنی ھاوڵاتیەك بەناوی(بارزان) لەلایەن ئەفسەرێكی فەرماندەییمان، ھیچ پەیوەندییەكی بەفەرماندەییمانەوە نییە، دەستگیركردنی تاوانباریش ئەركی ھەمووانە، كاتێك تاوانبار شوێنی نادیاربێت پێویستە ھەموو ھاوكاربین بۆ رادەستكردنی بۆ بەردەم یاسا".

لەكۆتایی رونكردنەوەكەشیاندا، ھاتووە كە "تاوانبار بەھیچ شێوەیەك دوای ئەنجامدانی تاوانەكە لەھیچ بارەگایەكی فەرماندەیی نەبووە، تەنھا بەپێی پەیوەندی تەلەفونی كەمتر لەیەك كاتژمێر گەڕاوەتەوە رەبایەكەی خۆی لەگوندی قەراج و دواتر خۆی ونكردوە و نادیارە".

فەرماندەیی ھەولێر راشیدەگەیەنێت"بەڵێن دەدەین كە لەكاتی ھەبوونی ھەر زانیارییەك رادەستی یاسایی بكەین بۆئەوەی بەسزای خۆی بگات".


هونەر بانەگوڵانی 

 


ڕێكخراوی خێرخوازی ڕابیتەی ئیسلامی كورد لەماوەی ساڵی ڕابردوودا 2015، لە چەندین سێكتەری جیاوازدا لە هەرێمی كوردستان خزمەتی كردووە بەتایبەت لە بواری یارمەتی دانانی دارایی بۆ مندالانی نازدار و بێ باوكان و گەیاندنی هاوكاری بە ئاوارەكانی هەرێمی كوردستان و گەیاندنی هاوكاری بە هێزەكانی پێشمەرگە كە سەرجەمیان بە دەیان ملیار مەزەندە دەكرێت.


بە گوێرەی ڕاپۆرتی ساڵانەی ڕێكخراوی خێرخوازی ڕابیتەی ئیسلامی كورد كە وێنەیەكی بۆ كوردیو نێردراوە، ساڵی ڕابردوو ( 19553) منداڵ لە پارێزگاكانی ( هەولێر و سلێمانی و هەڵەبجە و كەروكوك و موسڵ و بەغدا) سود مەندببوون و بڕی 5 ملیار و 224 ملیۆن دیناریان وەك هاوكاری پێ بەخشراوە.


هەروەك لە ڕاپۆرتەكەدا تەواوی وردەكاری سێكتەرە جیاوازەكانی خزمەتگوزاری ڕێكخراوی خێرخوازی ڕابیتەی ئیسلامی كورد خراوەتە ڕوو.

 

دەقی ڕاپۆرتەكە:

 

 

am

سەرۆكی‌ لیژنەی‌ وزەو سامانەسروشتییەكانی‌ پارێزگای‌ سلێمانی‌ ڕایدەگەیەنێت: بەرزبونەوەی‌ نرخی‌ بەنزین چەند هۆكارێكی‌ لە پشتەوەیە، دەشڵێت هەربازرگانێك ڕێگری‌ لێدەكرێت لە هێنانی‌ بەنزین با ئاگادارمان بكاتەوە.

د.غالیب محەمەد سەرۆكی‌ لیژنەی‌ وزەو سامانە سروشتییەكانی‌ پارێزگای‌ سلێمانی‌ بە كوردیو ڕاگەیاند:" لە ماوەی‌ ئەم هەفتەیەدا نرخی‌ بەنزین لە پارێزگای‌ سلێمانی‌ بەرز بوونەوەی بە خۆیەوە بینیوە و هۆكارەكەشی‌ دەگەڕێتەوە بۆ بەرز بونەوەی‌ نرخی‌ نەوت و بەهای‌ دۆلار ، بەڵام ئەوە هۆكارێك نییە كە بەم شێوەیە نرخی‌ بەنزین بەرز بۆتەوە ".

هەروەها وتیشی:‌" باس لەوەش دەكرێت كە پەیوەندی‌ بە كوالێتی‌ بەنزینەوە هەیە، چونكە سوتانی‌ بەنزین لە ڕێگەی‌ بزوێنەرەوە لە وەرزی‌ هاوین جیاوازی‌ هەیە لەگەڵ وەرزی‌ زستانەدا، واتا لە ئێستادا كوالێتی‌ بەنزین بەرزترە".

د.غالب ئەوەش خستەڕوو:" وەك ئەنجومەنی‌ پارێزگای‌ سلێمانی‌ بەدواداچونمان كردووە بۆ هۆكاری‌ بەرزبونەوەی‌ نرخی‌ بەنزین، بەڵام تا ئێستا هۆكارێكی‌ وامان دەست نەكەوتووە كە ببێتە هۆكاری‌ بەرزبونەوەی‌ نرخی‌ بەنزین بەم شێوەزە".

سەرۆكی‌ لیژنەی‌ وزەو سامانەسروشتییەكانی‌ پارێزگای‌ سلێمانی‌ ڕایگەیاند" داواكارم هەر بازرگانێك دەیەوێت بەنزین بهێنێتە پارێزگای‌ سلێمانی‌ و ڕێگری‌ لێدەكرێت با ئاگادارمان بكاتەوە، هاوكات هەر بازرگانێكیش دەیەوێت بەنزین بهێنیت بە هەموو شێوەك هاوكای‌ دەكەین".

وتیشی:" لەم ماوەیەدا 15بەنزینخانە لە پارێزگای‌ سلێمانی‌ داخراوە و هۆكارێكیشە بۆ بەرز بونەوەی‌ نرخی‌ بەنزین".

دەربارەی‌ هۆكاری‌ داخستنی‌ ئەو 15بەنزینخانەیە لە پارێزگای‌ سلێمانی‌ وتی‌" بەهۆی‌ خراپی‌ كوالێتی‌ بەنزینەكەیانەوە بووە و لەم ماوەیەدا نزیكەی‌ 1000ئۆتۆمبێل فیلپەمپیان سوتاوە و لە كار كەوتووە".

دكتۆر غالیب محەمەد وتیشی‌:" پشتر پێشنیاری‌ ئەوەم كردبوو كە پێویستە ڕێژەیەك دابنرێت لەگەڵ بەرز بونەوی‌ نرخی‌ نەوت بەو ڕێژەیە نرخی‌ بەنزین بەرز بكرێتەوە، بەڵام تائێستا پێشنیارەكەم بە هەند وەرنەگیراوە".

ئەوەشی‌ خستە ڕوو" لە ئێستادا هێنانی‌ بەنزین شێوەی بازرگانییە و كە بازرگانیش بوو بازاڕ ئازادە كە لە پارێزگای‌ سلێمانی‌ 14كۆمپانیا بەنزین دەهێن كە زۆرینەیی‌ لە وڵاتی‌ ئێرانە دێت".

ئاماژەی بەوەش كرد:" هۆكارێكی‌ تری‌ بەرز بونەوەی‌ نرخی‌ بەنزین دەگەڕێتەوە بۆ ئەوەی‌ پێشتر وەزارەتی‌ سامانەسروشتییەكانی‌ هەرێم بەنزینی‌ پاڵاوگەكانی‌ بازیانی‌ دەدایە مەقاولەكان لە جیاتی‌ چەك بەڵام لە ئێستادا ئەوە ڕاگیراوە و تا مقاولەكان بیفڕۆشنەوە لە بازاڕدا".

 

 


سەلام بێستانسوری

 



كوردیو ـ سلێمانی
نزیكەی ساڵێكە بڕیاری پێكهێنانی ئیدارەی پارێزگای هەڵەبجە چووەتە بواری جێبەجێكردنەوە و تاوەكو ئێستاش بەهۆی ناكۆكی لایەنە سیاسیەكانەوە پرۆسەكە پەكی كەوتووە بە تایبەت پێكهێنانی ئەنجومەنی پارێزگای هەڵەبجە و بەرپرسی لقی 12ی پارتیش ئۆباڵەكەی دەخاتە ئەستۆی یەكێتی نیشتیمانی وەك لایەنی باڵادەست لە ناوچەكە.


فازڵ بەشارەتی بەرپرسی لقی 12ی پارتی دیموكرات لە پارێزگای هەڵەبجە بۆ كوردیو ووتی" تەقریبەن ئێمە وازمان هێناوە لە پرسی پێكهێنانی ئیدارەی پارێزگای هەڵەبجە، لەسەر ئەو بابەتە قسە زۆر كراوە و وتومانە مافی خۆمان بە تەواوەتی وەرنگەرین هیچ بەشداریەكمان نابێت، بۆیە ئێستا هیچ گفتوگۆ و قسەیەك لەنێوانماندا نەماوە".


بەرپرسی لقی 12ی پارتی وتیشی" لایەنی باڵادەست لە هەڵەبجە بەرپرسە و ئەگەر ئەو نەیەوێت ئەو كارە بەرەو پێش بچێت هەر ئاوای لێ دێت بۆیە خواست و قسەی ئێمە لەسەرەتاوە ڕوون بووە".


پارتی دیموكرات لە هەڵەبجە پۆستی قائیمقام و چوار ئەندامی ئەنجومەنەكە بە مافی خۆی دەزانێت و هەرچی یەكێتی نیشتیمانی كوردستانە ئامادە نیە ئەو پشكە بدات پارتی و لە گەرمی گفتوگۆكانیشدا قائمقامێكی نوێی لەسەر پشكی خۆی بۆ هەڵەبجە دانا.

 

am