حکومەتى هەرێمى کوردستان نرخى بەکارهێنانى ئاو دیارى دەکات و بەرێوەبەری گشتی ئاو و ئاوەڕۆکانی هەرێمی کوردستانیش ڕایدەگەیەنێت، لەکاتی تەواوبوونی پرۆژەی بەستنی پێوەری ئاوی ماڵانەوە دەخرێتە بوارى جێبەجێکردنەوە.

مەسعود کاڕەش بەرێوەبەری گشتی ئاو و ئاوەڕۆکانی هەرێمی کوردستان، بۆ دواڕۆژ ڕایگەیاندووە "سەرجەم بەڕێوەبەرایەتییەکانی ئاو لە کۆبوونەوەیەکدا داوایانکرد نرخێکی هاوسەنگ دابنرێت، دوای کۆبوونەوەکە خشتەیەک دیاریکرا بۆ دانانی نرخی ئاوی ماڵان بەپێوەر، بۆئەم مەبەستە پێشنیارێکیان داوەتە سەرۆکایەتی ئەنجومەنی وەزیرانی هەرێم تا رەزامەندی لەسەر بدات".

ناوبراو ئاماژەى داوە بەوەى "بەپێی ئەو خشتەیەی دیاری کراوە نرخەکان بەم جۆرە دەبێت، بەکار هێنانی ئاوی ماڵان لە"1 مەتر بۆ 15مەتر سێ‌ جا" 300 دینار و لە16 بۆ30 مەتری سێجا 500 دینار هەروەها لە 31 بۆ 70 مەتری سێجا هەزار دینار و لە 71 بۆ 120 مەتری سێجا بە هەزار و 500 دینار دەبێت".

بەرێوەبەری گشتی ئاو و ئاوەڕۆکانی هەرێمی کوردستان هەروەها ڕایگەیاندووە، بەکارهێنانی ئاو لە 120 مەتری سێجا بەسەرەوە بە 5 هەزار دینار دەبێت و هەروەک شوێنە ئاینیەکان بۆ یەک مەتری سێجا بە هەزاردینارە و دام و دەزگاکانی حکومەت بە دوو هەزادینار و کەرتی هاوبەشی حکومی و گشتی بۆ یەک مەتری سێجا بە 2 هەزار و 500 دینار دەبێت و کەرتی بازرگانی و پیشەسازی و وەبەرهێنا، بۆ هەر مەترێکی سێجا بڕی سێ‌ هەزار دینار دەبێت، بڕیاری ئەم نرخانە لەکاتی تەواوبوونی پرۆژەی بەستنی پێوەری ئاوی ماڵان لە هەر چوار پارێزگاکەی هەرێم دەچێتە بواری جێبەجێ‌ کردنەوە.

لەگەڵ ئەوەی سەرۆك وەزیرانی عێراق رایگەیاندبوو، شاری فەلوجەیان لەژێر چنگی گروپە چەكدارەكانی داعش دەرهێناوە، بەڵام شەڕ لەچەند بەشێكی ئەو شارە درێژەی هەیە.

لەتۆڕە كۆمەڵایەتییەكانی فەیس بووك بڵاوكراوەتەوە، ئەمڕۆ گروپە چەكدارەكانی داعش دژە پەلامارێكیان كردۆتە سەر میلیشیا شیعەكان لەسنووری شاری فەلوجەو توانیویانە چەند گەڕەكێك بخەنەوە ژێر چنگی خۆیان.
هەروەها باس لەوەشكراوە، كە داعش لەدژە پەلامارەكەیدا توانیویەتی هەریەكە لەگەڕەكەكانی (جوبەیل و پیشەسازی) كە كەوتوونەتە بەشی شارەكە لەژێر چنگی میلیشیا شیعەكانی دەربهێننەوە.
هاوكات ئاماژە بەوەشدراوە، شیعەكان سەربازگەی مەزرەعەیان لەخۆرهەڵاتی شارەكە تەرخان كردووە بۆ هەڵگرتنی تەرمی كوژراوەكانیان و رادەستی كەس و كارەكانیان ناكەنەوە لەبەر ووروژانی شەقامی گشتی.
سەرچاوەكە باسیشی لەوەكردووە، ئێستا شەڕێكی سەخت لەناوچەكانی باشووری شاری فەلوجە لەنێوان شیعەكان و چەكدارەكانی داعش دەستی پێكردووە.


ڕێبین عه‌لی

 

 

ئەم هەفتەیە تەنها یەكە سەربازی و دەزگا ئەمنیەكان مووچە وەردەگرن، وەزارەتی دارایی تا نزیكبوونەوە لە جەژن مووچەی وەزارەتە مەدەنیەكان دابەش ناكات..

"كوردیو " لە سەرچاوەیەكی تایبەت و باوەڕ پێكراو زانیاری دەستكەوتووە، كە ئێستە حكوومەتی هەرێم لە هەوڵدایە لە ماوەی دوو رۆژی داهاتوو ئەو بڕە پارەیەی نەوت كە پێشبینی دەكرێت زیاتر بێت لە 300 ملیۆن دۆلاری ئەمریكی لە بازاڕەكان بیگۆڕێتەوە، بۆ ئەوەی لەگەڵ ئەو بڕە پارەیەی وەك داهات دەستی كەوتووە مووچەی فەرمانبەرانی پێ دابین بكەن.

وەك سەرچاوەكە روونی كردەوە، چاوەڕوان دەكرێت لە دوای تەواوبوونی دابەشكردنی مووچەی هەموو یەكەكانی وەزارەتی پێشمەرگە، رۆژی سێ شەممە مووچەی ئەنجومەنی ئاسایش دابەش بكرێت، هەروەها رۆژانی چوارشەم و پێنج شەم مووچەی هێزەكانی زێرەڤانی و هێزی ئامادە دابەش دەكرێت.

بەپێی زانیاریەكانی كوردیو كە لە سەرچاوەیەكی وەزارەتی دارایی دەستیكەوتوو ئەم هەفتەیە تا نزیكبوونەوە لە جەژن مووچەی وەزارەتە مەدەنیەكان دابەش ناكات، بەڵكو تەنها یەكە سەربازی و دەزگا ئەمنیەكان مووچە وەردەگرن.

 

په‌یامنێری‌ "نیقاش" كۆپی‌ چه‌ند نوسراوێكی‌ "ویلایه‌تی‌ ئه‌نبار"ی‌ داعشی‌ ده‌ستكه‌وت له‌رێی‌ یه‌كێك له‌و هێزانه‌ی‌ به‌شداریی‌ كردبوو له‌ئازادكردنی‌ ئه‌و ناوچانه‌ی‌ داعش پێشتر ده‌ستی‌ به‌سه‌رداگرتبوون.

 

نوسراوه‌كان زیاتر په‌یوه‌ستن به‌كاروباری‌ ناوخۆی‌ رێكخراوه‌كه‌و چۆنێتی‌ مامه‌ڵه‌كردن له‌به‌ڕێوه‌بردنی‌ سامان‌و لێخوڕینی‌ ئۆتۆمبێل‌و نه‌نوسینی‌ ناوه‌ڕۆكی‌ نامه‌ له‌سه‌ر به‌رگی‌ نامه‌كان بۆ ئه‌وه‌ی‌ ئاشكرا نه‌بن.

 

ره‌نگه‌ كه‌سێك له‌ده‌ره‌وه‌ی‌ داعش ئاگاداری‌ ئه‌وه‌ نه‌بێت كه‌ یه‌كێك له‌كێشه‌كانی‌ ئه‌و رێكخراوه‌ خێرا لێخوڕینی‌ ئۆتۆمبێله‌ له‌لایه‌ن ئه‌میرو ئه‌ندامه‌كانیه‌وه‌، به‌جۆرێك به‌و هۆیه‌وه‌ چه‌ندین قوربانی‌ كه‌وتوونه‌ته‌وه‌.

 

یه‌كێك له‌نوسراوه‌كانی‌ له‌باره‌ی‌ ئه‌و بابه‌ته‌وه‌ نوسراوه‌ كه‌ كه‌سێك ئاگادار ده‌كاته‌وه‌ له‌وه‌ی‌ خێرا لێنه‌خوڕێت‌و هه‌ر له‌و نوسراوه‌ ئاستی‌ لێخوڕینی‌ له‌ناوخۆو ده‌ره‌وه‌ی‌ شاره‌كاندا دیاریی‌ كردووه‌.

 

كێشه‌یه‌كی‌ تری‌ داعش كه‌ له‌نوسراوه‌كانیدا ده‌رده‌كه‌وێت ئه‌وه‌یه‌ ئێستاش هه‌ندێ‌ له‌ئه‌میرو ئه‌ندامه‌كانی‌ زانیاری‌ گرنگ له‌سه‌ر به‌رگی‌ ئه‌و نامانه‌ ده‌نوسن كه‌ له‌ناوخۆدا له‌نێوان ویلایه‌ت‌و دیوانه‌كان ده‌گۆڕێنه‌وه‌، بۆیه‌ به‌نوسراو داوایان لێده‌كات بۆ پاراستنی‌ نهێنی‌ نابێت هیچ زانیارییه‌كی‌ گرنگ له‌سه‌ر به‌رگی‌ نامه‌كان بنوسن.

 

هه‌روه‌ك چۆن داوایان لێده‌كات "له‌به‌ر هۆكاری‌ ئه‌منی‌، پاش خوێندنه‌وه‌ ناونیشانه‌كان بسڕننه‌وه‌" ئه‌مه‌ش بۆ شاردنه‌وه‌ی‌ ئه‌و جێگایانه‌ی‌ به‌لای‌ خه‌ڵكی‌ ناوچه‌كه‌وه‌ دۆزینه‌وه‌یان ئاسانه‌.

 

گه‌نده‌ڵی‌‌و دزه‌ پێكردنی‌ زانیاری‌

داعش دان به‌وه‌دا ده‌نێت كه‌ گه‌نده‌ڵی‌ دارایی‌ هه‌یه‌ له‌گوێزانه‌وه‌ی‌ پاره‌ له‌نێوان ویلایه‌ن‌و دیوانه‌كان‌و "به‌یتولمال"، سه‌ره‌ڕای‌ ئه‌و رێوشوێنه‌ توندانه‌ی‌ بۆ به‌ڕێوه‌بردنی‌ داراییه‌كه‌ی‌ گرتوویه‌تیه‌ به‌ر، له‌یه‌كێك له‌نوسراوه‌كاندا باسی‌ ئه‌و حاڵه‌تانه‌ كراوه‌و تیایدا هاتووه‌ "رێگه‌ به‌هیچ كه‌سێك ناده‌ین ئه‌گه‌ر له‌م دنیاو له‌و دنیا به‌راستگۆیی‌ مامه‌ڵه‌مان له‌گه‌ڵدا نه‌كات، ئه‌مه‌ خیانه‌ته‌و فێڵه‌ له‌ئه‌ماره‌ت".

 

ئه‌م رێنماییه‌ بۆ هه‌موو ئه‌و كه‌سانه‌یه‌ كه‌ مامه‌ڵه‌ به‌دارایی‌ داعشه‌وه‌ ده‌كه‌ن، جا ئه‌گه‌ر ئه‌و مامه‌ڵه‌یه‌ به‌پاره‌ ئاڵتونیه‌كه‌ی‌ داعش بێت یاخود دیناری‌ عێراقی‌‌و لیره‌ی‌ سوری‌، یان دۆلارو یۆرۆ.

 

له‌نوسراوه‌كاندا داعش ده‌سه‌ڵاتی‌ دارایی‌ به‌چه‌ند كه‌سێك ده‌سپێرێت كه‌ ته‌نها ئاماژه‌ی‌ به‌ناوی‌ خوازراوو نازناوه‌كه‌یان كردووه‌، بێ‌ ئه‌وه‌ی‌ ناوی‌ راسته‌قینه‌ی‌ خۆی‌ ئاشكرا بكات، وه‌ك "ئه‌بو قه‌تاده‌ی‌ ئه‌یوبی‌" له‌نوسراوه‌كاندا ده‌رده‌كه‌وێت بۆ به‌رگرتن له‌گه‌نده‌ڵی‌‌و بردنی‌ پاره‌ ئه‌و رێوشوێنانه‌ی‌ گرتووه‌ته‌ به‌ر.

 

داعش سیسته‌مێكی‌ به‌ڕێوه‌بردنی‌ تایبه‌ت به‌خۆی‌ هه‌یه‌ كه‌ پشت ده‌به‌ستێت به‌لامه‌ركه‌زیی‌ ره‌هایی‌ وه‌ك ئه‌وه‌ی‌ هاشم هاشمی‌ پسپۆڕی‌ كاروباری‌ گروپه‌ توندڕه‌وه‌كان ئاماژه‌ی‌ پێده‌كات.

 

هاشمی‌ به‌"نیقاش"ی‌ وت "نوسراوه‌كان ده‌ریده‌خه‌ن كه‌ رۆتینێكی‌ ئیداری‌ كارپێكراو له‌هه‌موو جومگه‌كانی‌ داعشدا هه‌یه‌، هه‌موو ئه‌و رێنماییانه‌ش كه‌ ده‌رده‌كرێن له‌سه‌ر ئاستی‌ لۆكاڵی‌ ده‌رده‌كرێن‌و سه‌رتاسه‌ری‌ نین، واته‌ به‌رپرسانی‌ ویلایه‌ته‌كان خۆیان بڕیار ده‌ده‌ن ویلایه‌ته‌كانیان چۆن به‌ڕێوه‌ ببه‌ن".

 

هاشمی‌ ده‌شڵێت "هه‌ر ویلایه‌تێك ده‌سه‌ڵاتێكی‌ زۆری‌ لامه‌ركه‌زی‌ هه‌یه‌ له‌كاروباری‌ سه‌ربازی‌‌و ئه‌منی‌، هه‌ر ئه‌مه‌ش وایكردووه‌ له‌زۆر جێگا توانای‌ مانه‌وه‌و خۆڕاگرتنیان هه‌بێت".

 

به‌ڵام هاشمی‌ پێی‌ وایه‌ "هه‌موو ئه‌وانه‌ی‌ باس ده‌كرێت له‌باره‌ی‌ دزی‌‌و گه‌نده‌ڵی‌ له‌ناوخۆی‌ داعشدا، چه‌ند باسێكن ناتوانرێت بسه‌لمێنرێن".

 

تیمی‌ ئه‌ندازه‌یی‌ پارێزگای‌ ئه‌نبار ئاماژه‌ به‌وه‌ ده‌كات كه‌ ژێرخان‌و باڵه‌خانه‌و خانووه‌كانی‌ شاری‌ رومادی‌ زیانی‌ ئێجگار گه‌وره‌یان پێگه‌یشتووه‌و بۆ ئه‌وه‌ی‌ بگه‌ڕێنه‌وه‌ باری‌ ئاسایی‌ خۆیان لانی‌ كه‌م پێویستیان به‌بڕی‌ نۆزده‌ ملیارو 500 ملیۆن دۆلار ده‌بێت.

 

به‌پێی‌ راپۆرتی‌ ناوه‌نده‌ لۆكاڵی‌‌و نێوده‌وڵه‌تییه‌كان، ئاستی‌ وێرانكاریی‌ له‌رومادی‌ گه‌یشتووه‌ته‌ رێژه‌ی‌ له‌سه‌دا 80، ئه‌مه‌ش خانوبه‌ره‌ی‌ هاوڵاتیان‌و باڵه‌خانه‌و بینا حكومییه‌كان‌و ژێرخانی‌ شاره‌كه‌ی‌ گرتووه‌ته‌وه‌.

 

زیاتر له‌(32) هه‌زار خانووی‌ هاوڵاتیان له‌ناو جه‌رگه‌ی‌ رومادی‌ به‌شێكیان به‌ته‌واوی‌ وێرانبوون‌و به‌شێكی‌ تریان پێویستیان به‌نۆژه‌نكردنه‌وه‌یه‌، ئه‌مه‌ سه‌ره‌ڕای‌ فه‌رمانگه‌ حكومییه‌كان‌و خوێندنگاو شه‌قامه‌كان، هه‌ندێ گه‌ڕه‌كیش هه‌یه‌ دیزاینكردنه‌وه‌یان ده‌وێت، چونكه‌ به‌هۆی‌ وێرانكارییه‌وه‌ شێواون.

 

ناسر عه‌بدولمحه‌یمید (52 ساڵ) له‌ناوچه‌ی‌ حه‌ی‌ به‌كر نیشته‌جێیه‌، به‌"نیقاش"ی‌ وت "یاساو رێنماییه‌كان وه‌ك یه‌ك به‌سه‌ر هه‌مواندا جێبه‌جێ‌ ناكرێت، بیست رۆژه‌ چاوه‌ڕێم بۆ ئه‌وه‌ی‌ نۆره‌م بێت‌و پشكنین بۆ خانوه‌كه‌م بكه‌ن كه‌ به‌ته‌واوی‌ وێران بووه‌، به‌ڵام كه‌س نایه‌ت به‌لاماندا، لیژنه‌كه‌ به‌بێلایه‌نی‌ ناچن به‌ده‌م دۆسێكانه‌وه‌".

 

ده‌شڵێت "ئه‌و لیژنانه‌ی‌ بۆ مه‌زه‌نده‌كردنی‌ زیانه‌كان ده‌ستنیشانكراون زۆر هێواش كاره‌كانیان راده‌په‌ڕێنن، وه‌ك پێویست ئۆتۆمبێلیان له‌به‌رده‌ستدا نییه‌ بۆ به‌سه‌ركردنه‌وه‌ی‌ ناوچه‌ جیاجیاكان، ئه‌مه‌ جگه‌ له‌وه‌ی‌ واسیته‌و ناسیاوی‌ رۆڵی‌ هه‌یه‌ له‌نۆره‌بڕێدا".

 

ناسر درێژه‌ به‌قسه‌كانی‌ ده‌دات‌و ده‌ڵێت "ئاگام لێیه‌ هه‌ندێ‌ كه‌س به‌ئۆتۆمبێلی‌ خۆیان ئه‌ندامانی‌ لیژنه‌كان ده‌به‌ن بۆ سه‌ر ماڵه‌كانیان، ئه‌مه‌ش كارده‌كاته‌ سه‌ر ده‌ستپاكی‌‌و سه‌رڕاستی‌ لیژنه‌كه‌و مافی‌ خه‌ڵكی‌ تری‌ تیا ده‌خورێت".

 

بۆ ئاسانكردنی‌ كاروباری‌ هاوڵاتیان پارێزگای‌ ئه‌نبار سێ‌ باره‌گای‌ بۆ لیژنه‌كان دروستكردووه‌ له‌ناوچه‌ی‌ حه‌ی‌ ته‌ئمیم‌و له‌ناوه‌ندی‌ شارو له‌ده‌وبه‌ری‌ شاره‌كه‌ش، ئه‌م لیژنانه‌ فۆرم به‌سه‌ر هاوڵاتیاندا دابه‌ش ده‌كه‌ن بۆ قه‌ره‌بووكردنه‌وه‌ی‌ خانوو كه‌لوپه‌ل، پاش ئه‌وه‌ ژماره‌یه‌كی‌ تایبه‌ت ده‌درێت به‌هاوڵاتییه‌كه‌ تا له‌رێیه‌وه‌ سه‌ردانی‌ به‌شی‌ قه‌ره‌بوو بكات.

 

ئیبراهیم عوسه‌ج قایمقامی‌ قه‌زای‌ رومادی‌‌و سه‌رۆكی‌ لیژنه‌ی‌ قه‌ره‌بووكردنه‌وه‌ به‌"نیقاش"ی‌ وت "لیژنه‌كه‌ له‌مانگی‌ ئایاری‌ ئه‌مساڵه‌وه‌ ده‌ستی‌ كردووه‌ به‌كاره‌كانی‌‌و حه‌ڤده‌ هه‌زار داواكاریی‌ قه‌ره‌بووی‌ وه‌رگرتووه‌، مه‌زه‌نده‌ ده‌كه‌ین ئه‌و داواكارییانه‌ بگاته‌ په‌نجا هه‌زار".

 

ده‌شڵێت "لیژنه‌كه‌ پشكنینی‌ بۆ سێ‌ هه‌زار داواكاری‌ كردووه‌و هه‌موو رۆژێكیش (30 بۆ 50) جێگه‌ له‌رێی‌ شه‌ست ئه‌ندازیارو كه‌سی‌ پسپۆڕ به‌سه‌ر ده‌كرێنه‌وه‌، به‌شێوه‌یه‌كی‌ زۆر پیشه‌ییانه‌ كاره‌كانیان راده‌په‌ڕێنن".

 

جه‌خت له‌وه‌ش ده‌كاته‌وه‌ كه‌ حكومه‌تی‌ لۆكاڵی‌ زۆر گه‌رموگوڕه‌ له‌بابه‌تی‌ قه‌ره‌بوكردنه‌وه‌ی‌ هاوڵاتیان، به‌ڵام حكومه‌تی‌ ناوه‌ند ته‌نها بڕی‌ یه‌ك ملیۆن دۆلاری‌ ته‌رخانكردووه‌ بۆ بوژاندنه‌وه‌ی‌ فه‌رمانگه‌ حكومییه‌كان، ده‌شڵێت "به‌پێی‌ مه‌زه‌نده‌ سه‌ره‌تاییه‌كان بڕی‌ دوو بۆ چوار ملیار دۆلارمان پێویسته‌ ته‌نها بۆ قه‌ره‌بووكردنه‌وه‌ی‌ خانووبه‌ره‌ی‌ هاوڵاتیان له‌به‌ری‌ باشورو ناوه‌ندو باكوری‌ رومادی‌".

 

ته‌ها عه‌بدولغه‌نی‌ ئه‌ندامی‌ ئه‌نجومه‌نی‌ پارێزگای‌ ئه‌نبار له‌مڕووه‌وه‌ به‌"نیقاش"ی‌ وت "ئه‌نجومه‌نی‌ پارێزگا ده‌یه‌وێت ئاسته‌نگی‌ به‌رده‌م هاوڵاتیان كه‌مبكاته‌وه‌و خێراتر كاره‌كان رایی‌ بكرێن، بۆ ئه‌وه‌ش كات‌و كارمه‌ندی‌ زیاتر بۆ لیژنه‌كان ته‌رخانكراون".

 

ده‌شڵێت "بۆ ئاوه‌دانكردنه‌وه‌ی‌ رومادی‌ لانی‌ كه‌م پێنج ساڵ كاركردنی‌ به‌رده‌وام پێویسته‌".

 

له‌لای‌ خۆیه‌وه‌ بیلال ئیبراهیم پسپۆڕی‌ ئابوری‌ به‌"نیقاش"ی‌ وت "ئه‌و زیانه‌ گه‌وره‌یه‌ی‌ به‌ر رومادی‌ كه‌وتووه‌ وایكردووه‌ بڕێك پاره‌ی‌ زه‌به‌لاحی‌ پێویست بێت بۆ ئاوه‌دانكردنه‌وه‌، به‌هۆی‌ ئه‌م قه‌یرانه‌ ئابورییه‌شه‌وه‌ دابینكردنی‌ ئه‌و بڕه‌ پاره‌یه‌ هه‌روا ئاسان نییه‌".

 

ئەندامێکی پەرلەمانی کوردستان لەبارەی هەبوونی پارە بۆ موچەی مانگی ئایار دڵنیایی دەدات و ڕاشیدەگەیەنێت، لەم هەفتەیەدا چەند وەزارەتێکی تر موچە وەردەگرن.

ئاواز حەمید ئەندامی پەرلەمانی کوردستان لە فراکسیۆنی پارتی، لە لێدوانێکدا بۆ تۆڕی هەواڵی سلێمانی ڕایگەیاندووە، لەم یەک دوو ڕۆژەدا دابەشکردنی موچەی وەزارەتی پێشمەرگە کۆتایی پێ دێت و دەست بە دابەشکردنی موچەی وەزارەتەکانی تر دەکرێت.

ناوبراو ئاماژەی داوە بەوەی، پارەی پێویست بۆ موچەی مانگی ئایار لە بەردەستدایە، بەڵام هەندێک کێشە لە میکانیزمی دابەشکردنی موچە دروست بووە.

ئەو پەرلەمانتارە جەختی کردۆتەوە لەوەی، لەم هەفتەیەدا موچەی چەند وەزارەتێکی تر دابەش دەکرێت، تا ئێستا وەزارەتی دارایی ناوی ئەو وەزارەتانەی ئاشکرا نەکردووە.

 

كوردیو - هەولێر

كاتژمێر 10ی سەرلەبەیانی ئەمرۆ شەممە 18/6/2016 ئەنجومەنی سەركردایەتی یەكگرتووی ئیسلامی كوردستان بە سەرپەرشتی مامۆستا سەعید عەلی عەبۆ سەرۆكی ئەنجومەنی سەركردایەتی و بە ئامادەبوونی مامۆستا سەڵاحەدین محەممەد بەهائەدین ئەمینداری گشتی یەكگرتووی ئیسلامی كوردستان كۆبوونەوەی ئاسایی خۆی ئەنجامدا .

سەرەتا ئەمینداری گشتی وتەیەكی پێشكەش بە ئەنجومەنی سەركردایەتی كرد، تێیدا ئاماژەی بە رۆڵی یەكگرتووی ئیسلامی كوردستان كرد لە ئاشتەوایی نیشتمانی و خوێندنەوەیەكی شیكاری بۆ واقیعی ئێستای هەرێمی كوردستان كردوو و سوپاسی هەست و هەڵوێستی جەماوەری خەلكی كوردستان كرد لەسەر ئەو چاوەروانیەی كە هەیە لەسەر ئەوەی یەكگرتوو رۆڵی مێژووی خۆی ببینێ بۆ هێوركردنەوەی دۆخەكە و بەهاوكاری گشت ئاشتی خوازان و دڵسۆزانی كوردستان بۆ دۆزینەوەی دەرچەیەك بۆ دەربازكردنی واقعی سیاسی هەرێمی كوردستان لەم دۆخە ناهەموار و چەقبەستووەی تووشی بووە.

لەتەوەرەیەكی تردا جەختی كردەوە لەسەر زەرورەتی رێكخستنەوەی گوتاری ئیسلامی و یەك ریزی ئیسلامخوازانی كوردستان كە جەماوەری شەقامی ئیسلامی كوردستان و قۆناغەكە دەی خوازێت .

لە درێژەی كۆبوونەوەكەدا ئەنجومەنی سەركردایەتی یەكگرتوو جەختیكردەوە لەسەر بەردەوام بوونی یەكگرتوو لەسەر رۆڵی ئاشتەوایی و ( مصالحە ) و بەدەر لە دادگایی كردن و هەڵسەنگاندنی لایەنە ناكۆكەكان وەك بەشێك لە پرۆژەی چاكسازی ستراتیژی حزب.

پاشان ئەنجومەنی سەركردایەتی درێژەی دا بە كۆبوونەوەكان و چەندین بریار و راسپاردەی دەركرد پەیوەست بە ئۆرگانەكانی حزب و دەستنیشانكردنی بەرپرس بۆیان .

 

م. كانی

كوردیو - هەولێر

زیندانیانی سیاسی لە هەرێمی كوردستان رایدەگەیەنن: بە مەبەستی ناڕەزایەتی دەربڕین بەرامبەر بە هەموو ئەو ناعەدالەتی و بێ مافیانەی حكومەتی هەرێمی كوردستان ئەنجامی دەدات و بەنیازە لە داهاتوودا ئەنجامی بدات بەرامبەر بە ماف و ئیمتیازاتی زیندانی سیاسی، گردبونەوەیەكی ناڕەزایی ئەنجام دەدەین .

بەپێی بانگەوازێكی زیندانیانی سیاسی لە هەرێمی كوردستان كە بۆ سەرجەم زیندانیانی سیاسی بەبێ جیاوازی بیروبۆچوون و ئینتیمای حیزبی و سیاسی لە هەرێمی كوردستان ڕەوانە كراوە ئەوە هاتووە: بە مەبەستی ناڕەزایەتی دەربڕین بەرامبەر بە هەموو ئەو ناعەدالەتی و بێ مافیانەی حكومەتی هەرێمی كوردستان ئەنجامی دەدات و بەنیازە لە داهاتوودا ئەنجامی بدات بەرامبەر بە ماف و ئیمتیازاتی زیندانی سیاسی، كە لە ئەنجامی قوربانیدان و تێكۆشانی خۆیان و خانەوادەكانیان و بەپێی یاسا ئەو مافانەیان بۆ دەستبەركراوە، بەڵام ئەمڕۆ حكومەت كار بۆ نانبڕینی زیندانیانی سیاسی دەكات.

لە بانگەوازەكەی زیندانیانی سیاسی لە هەرێمی كوردستان ئەوەش هاتووە: بۆیە بانگهێشتان دەكەین بۆ ئامادەبوون و بەشداریتان لە گردبوونەوەیەكی جەماوەری زیندانیانی سیاسی و تێكۆشەرانی گەلەكەمان، لەبەردەم باڵەخانەی مۆزەخانەی نیشتمانی ئەمنە سوورەكە لە رۆژی دووشەممە كاژێر 11:00ی سەرلەبەیانی، كە تێیدا یاداشنامەیەك ئاراستەی دەسەڵاتی هەرێمی كوردستان دەكرێت و، تێیدا داخوازی و داواكاری زیندانیانی سیاسی دەخرێتەڕوو.

زیندانیانی سیاسی لە هەرێمی كوردستان دەشڵێت: پێویستە لەسەر هەموو زیندانیانی سیاسی بەخۆیان و خانەوادەكانیانەوە بەشداربن لە داكۆكیكردن لە مافەكانی خۆیان و داواكارین لە خانەوادەی سەربەرزی شەهیدان و پێشمەرگە دێرینەكانی كوردستان و كەمئەندامانی سەنگەر، پشتیوانی لە زیندانیانی سیاسی بكەن، بۆ وەڵامدانەوەی ئەو بڕیارە نایاسایی بێوەفاییەی حكومەتی هەرێم هەیەتی دەرحەق بە زیندانیانی سیاسی و تێكۆشەرانی گەلەكەمان.

لە كۆتاییشدا هاتووە: داواكارین لە سەرجەم زیندانیانی سیاسی لە شارو شارۆچكەكانی هەرێمی كوردستاندا، كە بۆیان دەگونجێت بێنە مەیدان بۆ داكۆكیكردن لە مافەكانیان بەشێوەیەكی مەدەنی.

م. كانی

كوردیو - محمد عمر كانی

لەسەر بارودۆخی ئێستای هەرێمی كوردستان ئەبوبەكر عەلی كاروانی ئاماژەیبەوەكرد: مرۆڤ سەریسوڕدەمێنێ لە نوخبە سیاسی و حیزبیە باڵادەستەكەی هەرێم، كە دۆخەكەیان بەم ئاستەی ئێستا گەیاندووە. قەیران بە قەیران چارەسەر دەكەن، دەشڵێت: ئەوەی دەگوزەرێ لەم سەرەپێچە مێژوویەدا جۆرێكە لە دێوانەگی و بەهەند نەگرتنی خوێنی كوڕە هەژارەكان كە لە بەرەكانی جەنگدا شەهید دەبن.

ئەبوبەكر عەلی كاروانی ، كەسایەتی سیاسی و نوسەرو رۆشنبیر بەناونیشانی (هەرێم و پوچگەرایی سیاسی) لەسەر بارودۆخی ئێستای هەرێمی كوردستان ئەوەی خستۆتەڕوو: مرۆڤ سەریسوڕدەمێنێ لە نوخبە سیاسی و حیزبیە باڵادەستەكەی هەرێم، كە دۆخەكەیان بەم ئاستەی ئێستا گەیاندووە. قەیران بە قەیران چارەسەر دەكەن! كە دیارە ئەو جۆرە چارەسەرەش هەروەك قورئان دەفەرموێت (باطنه فيه الرحمة و ظاهره من قبله العذاب) ڕواڵەتەكەی میهرەبانی و فەڕە و حەقیقەتەكەی سزا و ئازار و مەینەتیە .

ناوبراو دەشڵێت: ئەوەی لە كوردستان دەگوزەرێت، بەرزدەبێتەوە بۆ ئاستی خۆدان بەدەست شەپۆلی هەستی نەرێنی و گرێ ی دەروونی و هەستیاریی مێژوویی و كار و كاردانەوە و ڕووخاندنی زۆربەی پرد و ڕایەڵەكان و پوچگەرایی سیاسی؟ ئەوەی دەگوزەرێ درێژەدانە بە كردەی یەكتر شكاندن و بە دوژمنكردنی یەكتر و زیاتر دابەشكردنی ئیرادەی نیشتیمانی و وڵات، هەروەها هێندەی تر بێ ناوەڕۆك كردنی كوردایەتیە.

ئاماژەی بەوەش كردووە: وڵاتەكەمان لە كاتێكدا پێویستی بە پیشاندانی نیازپاكی و كەم كردنەوەی گرژیەكان و دروستكردنەوەی پردە ڕووخاوەكانی نێوان هێزەكان و گفتوگۆیەكی برایانە و جددیە، كەچی تازە بە تازە دادگاكان دەكرێن بە سەنگەرێكی تری هێرشكردنە سەر یەكتر و لە كاردانەوەی ئەوەشدا لاپەڕەی كۆن هەڵدانەوە و یەكتر بە گورگ كردن!! .

ئەبوبەكر عەلی كاروانی نمونەی ئەوەی هێناوەتەوەو نوسیویەتی: هەروەك لە كەیسی بڕیاری دەستگیركردنی بێ مانا و ناعەقڵانیانەی ڕێكخەری گشتی بزوتنەوەی گۆڕان و ئەو كاردانەوانەدا دەبینین بە دوای خۆیدا هێناویەتی و هێشتا هی تریش بەڕێوەیە .

لە كۆتاییشدا دەڵێت: ئەم بیركردنەوە و هەست و هەناسە هی گفتوگۆ و بە ئاشتی چارەسەركردنی كێشەكان و ڕێكخستنەوەی ناوماڵی حەیابەری كوردستان و خۆئامادەكردن بۆ ڕاپرسی و چاكسازیی و بیناكردنەوەی سیستم و ڕێكەوتن لەسەر پڕۆژەیەكی نیشتیمانی نیە. ئەوەی دەگوزەرێ لەم سەرەپێچە مێژوویەدا جۆرێكە لە دێوانەگی و بەهەند نەگرتنی خوێنی كوڕە هەژارەكان كە لە بەرەكانی جەنگدا شەهید دەبن. گەر ئەم دۆخەش بەم جۆرە بێ سەرو بەریە بەردەوام بێت، دەبێت چاوەڕوانی شتی نەخوازراوی گەورەتر بین.

م. كانی

 

ماڵپەری فەرمی گۆڕان بڵاوی كردۆتەوە كە وەفدێكی پارتی بە سەرۆكایەتی نێچیرڤان بارزانی، لە روسیا سەرقاڵی "گرێبەستێكی نهێنی"یە بە مەبەستی فرۆشتنی غازی سروشتی هەرێم بەو وڵاتە .

ماڵپەرەكە بڵاویشیكردۆتەوە: وەفدێكی پارتی بە سەرۆكایەتی نێچیرڤان بارزانی لە چوارچێوەی بەشداریكردنیان لە كۆڕبەندی ئابوری نێودەوڵەتی لە شاری سان پترس بۆرگی روسیا، سەرقاڵی ئامادەكردنی رێككەوتنێكی نهێنییە بە مەبەستی فرۆشتی غازی سروشتیی هەرێم بە روسیا.

ئەوەش هاتووە: وەفدەكەی پارتی رێكەوتنێكی هاوشێوەی رێككەوتنە (50) ساڵییەكەی لەگەڵ توركیا ئامادە كردوە، بەڵام هێشتا كاتی دیاری نەكردوە، تەنها ئامادەیی دەربڕیوە و داوای لە روسیا كردوە بۆ ئەو رێككەوتنە.

سەرچاوەیەكیش لەوبارەیەوە وتویەتی:"ئەگەر روسیا ئیستیجابەی هەبو، ئەوا لەدوای گەڕانەوەی وەفدەكە لە روسیا، پارتی پرۆژەیەك بۆ رێككەوتنەكە ئامادە دەكات، بەڵام بەر لە ئەنجامدانی داوای پێداچونەوە لە توركیا دەكات بەو رێككەوتنە (50) ساڵییەی كە ئەنجامی داوە، ئەگەر بە زەرەریش لەوەیان دەربچێت، ئەوا ئامادەیە ئەو رێكەوتنە لەگەڵ روسیادا هەر ئەنجام بدات".

م. كانی