كوردیو -


رێكخراوی تیرۆریستی داعش پیلانی دزەكردنی بۆناو هەرێمی كوردستان هەبوە، بەڵام لەلایەن دەزگا ئەمنییەكانەوە پوچەڵكراوەتەوە.

كەمال كەركوكی فەرماندەی هێزەكانی پێشمەرگە لە میحوەری خۆرئاوای كەركوك بە دەنگی ئەمریكای راگه‌یاندووه‌: "داعش پیلانی هەبوە خۆكوژ رەوانەی كەركوك‌ و هەرێمی كوردستان بكات‌ و لە شوێنە قەرەباڵغەكاندا تەقینەوە بكات".

ناوبراو وتویه‌تیشی : لەڕۆژانی جەژندا پێشمەرگەو دەزگا ئەمنییەكان دوو گروپ لە لایەنگرانی داعشیان لە سنوری كەركوك دەستگیركردوە، كە ویستویانە تەقینەوە بكەن ‌و ئاسانكاری بۆ هێنانی داعش بكەن.

ناوبراو ئاشكراشی كردووه‌ : "هەموو پیلانەكانی داعش ئەوەیە لەڕێگەی ئاوارەوە بگەنە ناوچەكانی ژێر دەسەڵاتی هێزەكانی پێشمەرگە، بەڵام شكست بە هەوڵەكان هێنراوە".


هونه‌ر بانه‌گوڵانی

 

 

 

لەچوارچێوەی ئەو هاریكاریانەی كە ئەمریكا بڕیاریداوە پێشكەشی هێزەكانی پێشمەرگەی بكات، چەندین ئۆتۆمبێلی سەربازی دەگاتە هەولێر.
بەپێی هەواڵێكی شەفەق نیوز، كاروانێكی چەك و جبەخانەی ئەمریكی گەیشتۆتە شاری هەولێر، كە پێكهاتوون لەزرێپۆش و هەمەری سەربازی.
بەپێی زانیارییەكان كاروانەكە لە (54) زرێپۆش و هەمەری سەربازی پێكهاتووەو بۆ شەڕی دژی گروپە چەكدارەكانی داعش گەیشتۆتە دەستی هێزەكانی پێشمەرگە.

 

ئـ . كـ

 

 

حكومەتی عێراق بۆ دروستكردنی یەكەی نیشتەجێبوون لەڕێگەی سندووقی نیشتەجێبوونەوە قەرز دەداتە هاوڵاتیان، هاوكات ڕێوشوێنەكانی پێدانی ئەو قەرزەش دەخاتەڕوو.

لەوباریەوە حسێن ئەلعەتبی جێگری بەڕێوەبەری گشتی سندووقی نیشتەجێبوون رایگەیاندووە، ئەوەی كەسەی دەیەوێت لەو بڕیارەی حكومەت سودمەند بێت، دەبێت سەردانی وەبەرهێنەرێك بكات و لە كۆمەڵگایەكی نیشتەجێبوون یەكەیەك وەربگرێت و گرێبەست ئەنجام بدات، پاشان لەڕێگەی ماڵپەڕی تایبەت بە سندووقی نیشتەجێبوون زانیاریەكان تۆمار بكات و فۆڕمێك پڕباتەوە.

ناوبراو جەختیشیكردەوە، دواتر ئەو كەسە دەبێت فۆڕمەكە ڕابكێشێت و سەردانی سندووقی نیشتەجێبوون بكات و لای دادنووس ئیمزای بكات و لە فەرمانگەی حكومەتەوە پشتگیری كەفیلیێك بهێنێت.

رونیشیكردەوە، لیژنەیەكی هونەری سەردانی كۆمەڵگای نیشتەجێبوونەكە دەكات بۆ ئەوەی لەبوونی ئەو یەكەی نیشتەجێبوونە دڵنیا ببێتەوە.

جێگری بەڕێوەبەری گشتی سندووقی نیشتەجێبوون ئاماژەی بەوەشكرد، سەرەتا بڕی 40%ی پارەكە خەرج دەكرێت و دوای وەرگرتنی بەڵگەنامەی فەرمی عەقارەكە بڕی 60%ی دیكەی پارەكە خەرج دەكرێت.


ڕێبین عه‌لی

 

لەناوەڕاستی ئەم مانگە بۆشایەكی تری یاسایی لە هەرێمی كوردستان دروست دەبێت و ئەوەش مەترسی دروستبوونی كێشەی كۆمەڵایەتی لێدەكرێت.

لەو بارەوە تەلار لەتیف ئەندامی لیژنەی یاسایی لەپەرلەمانی كوردستان لە لێدوانێكی رۆژنامەوانیدا رایگەیاند:" لە ١٥ی ئەم مانگەوە یاسای بەكرێدان وادەكەی بەسەر دەچێت كە ھەردوو ساڵ جارێك لەھەرێمی كوردستان ئەو یاسایە نوێ دەكرایەوە بەڵام پێشتر بریار بوو یاسایەكی نوێی بۆ ئامادە بكرێت كە تایبەتە بە رێكخستنی پەیوەندییەكانی نێوان خاوەن موڵك وكرێچی و بەھۆی پەكخستنی پەرلەمانەوە نەتوانرا ئەو یاسایە ھەموار بكرێتەوە و ھەرچەندە پێشتر بریار بوو ئەو پرسە یاسای نوێی بۆ دەربكرێت ".

راشیگەیاند:" بەھۆی قەیرانی داراییەوە مەترسی ئەوە هەیە، پەیوەندییەكانی نێوان خاوەن موڵك وكرێچیی روو لەخراپ بوون بكات بەتایبەت لەدوای كۆتاییھاتنی ئەو یاسایەش كە بۆشایی یاسایی دروست دەبێت و و ئەوەش مەترسیەكی گەورە دروست دەكات ".


ڕێبین عه‌لی

 

كوردیو -

نرخی دراوه‌ بیانیه‌كان له‌بازاره‌كانی هه‌رێمی كوردستان له‌كاتی كردنه‌وه‌ی بازار به‌مشێوه‌یه‌ :

100 دۆلار به‌ 127 هه‌زار و 300 دیناره‌،

100 پاوه‌ن به‌ 168 هه‌زار و 750 دیناره

100 یۆرۆ به‌ 141 هه‌زار و 500 دیناره‌

100 هه‌زار تمه‌ن به‌ 36 هه‌زار 750 دیناره‌

100 لیره‌ی توركی به‌ 44 هه‌زار دیناره‌

 


هونه‌ر بانه‌گوڵانی

سەرلەبەیانی ئەمڕۆ دووشەممە 11ی تەموز نرخی هەردوو جوری نەوتی خاو و برێنت دابەزینی بەخۆیەوە بینی.

لەئێستا یەك بەرمیل نەوتی برێنت بە 46 دۆلار و 35 سەنتە و لەكاتی كردنەوەی بازاڕەكان بە 46 دۆلار و 37 سەنت بووە.

هاوكات یەك بەرمیل نەوتی خاو كە لەكاتی كردنەوەی بازاڕەكان بە 44 دۆلار و 95 سەنت بووە، لەئێستادا بە 45 دۆلار و 17 سەنتە.

هەرچەندە نرخی نەوت بەبەراورد بەكاتی كردنەوەی بازاڕەكان تارادەیەك بەرزبووتەوە، بەڵام لەئێستادا بۆ جارێكی تر رووی لەدابەزین كردووە.


ڕێبین عه‌لی

 

كوردیو -

به‌رپرسی بانكی تووی مه‌لیك له‌ سلێمانی رایده‌گه‌یه‌نێت ئه‌مڕۆ دووشه‌ممه‌ یه‌كه‌م رۆژی ده‌وامیانه‌ دوای پشووی جه‌ژن، بۆ ده‌ستكردن به‌ دابه‌شكردنی مووچه‌ی خانه‌نشینان چاوه‌ڕێی وه‌زاره‌تی دارایین.

سالار غه‌ریب، به‌ڕێوه‌به‌ری بانكی تووی مه‌لیك له‌ سلێمانی  راگه‌یاند: ئه‌مڕۆ دووشه‌ممه‌ 11ی ته‌مموزی 2016، یه‌كه‌م رۆژی ده‌ستكردنه‌وه‌ به‌ده‌وامه‌ دوای پشووی جه‌ژنی ره‌مه‌زان كه‌ ماوه‌ی زیاتر له‌ هه‌فته‌یه‌ك به‌رده‌وام بوو.

ناوبراو راشیگه‌یاند: تاوه‌كو ئێستا خانه‌نشینانی سه‌ربازی و مه‌ده‌نی مووچه‌ی مانگی نیسانی 2016یان وه‌رنه‌گرتووه‌، و چاوه‌ڕوان ده‌كرێت وه‌زاره‌تی دارایی راگه‌یه‌ندراوێك له‌و باره‌وه‌ بڵاوبكاته‌وه‌.

ناوبراو بۆ وێستگه‌ی ئاماژه‌ی به‌وه‌شدا : "ئێمه‌ چاوه‌ڕوانی بڕیاری وه‌زاره‌تی دارایی ده‌كه‌ین، هه‌ركات ئه‌وان فه‌رمان بكه‌ن، دابه‌شكردنی مووچه‌ ده‌ستپێده‌كات".

ئه‌مه‌ش له‌كاتێكدادێت كه‌ ته‌واوی وه‌زاره‌ته‌كانی حكومه‌تی هه‌رێم پێش هاتنی جه‌ژنی ره‌مه‌زان مووچه‌ی مانگی ئایاری 2016یان وه‌رگرت، ته‌نها خانه‌نشینان وه‌ریان نه‌گرتووه‌.

 

هونه‌ر بانه‌گوڵانی

 

ئەمڕۆ دوو شەممە لە پارێزگای هەڵەبجە، بەڕێوبەری گشتی شارەوانیەكانی هەڵەبجە بە فەرمی كرایەوە.


لە مەراسیمێكدا لە پارێزگای هەڵەبجە، حەسەن ڕەشید وەك بەڕێوبەری بەڕێوبەرایەتی شارەوانیەكانی هەڵەبجە بە وەكالەت دەست بەكاربوو.


بەرێوبەرێتی شارەوانیەكانی هەڵەبجە دەبێتە هەشتەم بەڕێوبەرایەتی كە بە فەرمی لە پارێزگای هەڵەبجەدا دەكرێتەوە و تاوەكو ئێستاش بەهۆی پەسەند نەكردنی ناوی ئەندامانی كاندید بۆ ئەنجومەنی پارێزگای هەڵەبجە، ئەنجومەنی پارێزگاكە نەیتوانیوە دەستبەكاربێت.

 

am

 

رۆژنامەیەكی ئیسپانی زانیاری نوێ لەبارەی پێكانی كریستیانۆ رۆناڵدۆی پورتوگالی و ئەستێرەی هێڵی پێشەوەی یانەی ریال مەدرید بڵاو دەكاتەوە".

رۆژنامەی ماركای ئیسپانی بڵاوی كردەوە : " لە پشكنینی یەكەمی رۆناڵدۆ دەركەوتووە ، ئەو ئەستێرەیە بەهۆی كێشەی چۆكی چەپی دەناڵێنێت".

وەك سەرچاوەكە بڵاوی كردەوە : " رۆناڵدۆ بەهۆی ئەم پێكانە ئەگەری دووركەوتنەوەی لێ دەكرێت لەنێوان یەك مانگ تا دوو مانگ ، بەمەش بەشداری كردنی لەیاری كۆتایی جامی سوپەر دەبێتە كارێكی مەحاڵ".

رۆژنامەی ماركا دەڵێت : " ئێوارەی ئەمرۆ پشكنینی پزیشكی زیاتر بۆ رۆناڵدۆ ئەنجامدەدرێت و دواتر لەگەڵ پزیشكی تایبەت لە ریال مەدرید كۆدەبێتەوە بۆ ئەوەی قۆناغەكانی چارەسەری بۆ دیاری بكات".


 

رێكان عزیز

 

 

 

ئەمڕۆ بەیانی دووشەممە، وەزیری بەرگری ئەمریكا بەسەردانێكی لەناكاو گەیشتۆتە شاری بەغدا.
ئاژانس و سەرچاوە هەواڵییەكان باس لەوەدەكەن، ئەمڕۆ دووشەممە (ئاشتۆن كارتەر) وەزیری بەرگری ئەمریكا بەسەردانێكی لەناكاو گەیشتۆتە شاری بەغدا.
بەپێی سەرچاوە هەواڵییەكان كارتەر لەشاری بەغدا لەگەڵ هەریەكە لەسەرۆك وەزیران و وەزیری بەرگری عێراق كۆدەبێتەوەو دوا پێشهاتە سیاسی و ئەمنییەكان تاوتوێ‌ دەكەن.

 

ئـ . كـ