كوردیو – تایبەت

ئەمڕۆ سێ‌ پێشەرگە لەناوچەكانی سەعدیەو كۆباشی لەكاتی گەیاندنی خواردن بۆ هێزەكانی پێشمەرگە بۆمبێكیان پێدا دەتەقێتەوەو لەئەنجامیشدا سێ‌ كەسیان شەهید دەبن.
بەپێی زانیارییەكانی كوردیو، یەكێك لەو سێ‌ پێشمەرگە شەهیدە عەمیدێكە بەناوی (جەلیل) و دووانەكەشی تریش پاسەوانەكانی بوونە.
هەروەها سەرچاوەكە ئەوەشی خستە ڕوو كە لەگەڵ ئەواندا لیوا (حەمە رەشید) و پاسەوانێكی برینداربوونە.
ئەمەو ئەو كۆمەڵە پێشمەرگەیە سەربە هێزەكانی (70) ی یەكێتی بوونەو بەرپرسی میحوەریش بوونەو ئەمڕۆش لەكاتی گەیاندنی خواردن بۆ هێزەكانی پێشمەرگە شەهیدو برینداربوونە.

 

خواردن ئەو ووزەیەیە كە جوڵە بەمرۆڤ دەدات، دەبێت لەبەرامبەریشدا مرۆڤ خواردن بەپێی خشتەو بەپێی پێویست بخوات و بەكاری بهێنێت.
خواردنی رۆژانەمان دەبێت بەشێوەیەكی هاوسەنگ ڕێكبخەین كە هەموو بەشەكانی بگرێتەوەو بەپێی یەكسانی بێت.
1. كاربۆهیدرات : (330) گرام رۆژانە بۆ جم و جۆڵ و ئیشی رۆژانەو زیندە چاڵاكیەكانی لەش.
2. پرۆتین : (100) گرام رۆژانە زیاتر پێویستە بۆ پێكهاتن و دروست كردنی بونیادی لەشی مرۆڤ ئینجا سەرچاوەی بەردەوامی وزەیە دوای كاربۆهیدرات.
3. چەوری : (75) گرام رۆژانە كە بەشدارە لە پێكهاتەی خانەكان و وەك سەرچاوەیەكی وزەی هەڵگیراو بۆ كاتی پێوست بۆ زیندە چاڵاكیەكانی لەش.
4. ئاو : (2) لیتر ئاو رۆژانە پێویستە لە پلەی گەرمیەكی ئاسایی، یارمەتی گواستنەوەو توانەوەی ماددە خۆراكیەكان دەدات لە هەموو خانەیەك هەیە بۆ رێك خستنی زیندە چاڵاكییەكان بە تایبەت بەشدارە لە پێكهاتەی ئەو شانانەی كە جوڵەیان تێدایە وەك خوێن و جومگە.
5. ڤیتامینات : نزیكەی (300) گرام لە ڤیتامینە هەمە جۆرەكان كە لە میوەو سەوزەكان هەیە بە شێوەیەكی سەرەكی كە ئەویش پێویستە بۆ ریكخستنی كارلێكە كیمیاوییەكانی لەش.
6. كانزاكان : (5 – 10) گرام رۆژانە پێویستە بۆ كرداری ئەنزیمەكان، بۆ هاوسەنگی كارەبایی خانەكان، بۆ گەیاندنی دەمارە هەستەوەرەكان، بۆ پێكهاتەی زۆرێك شانە وەك ئێسك.

 

ئـ . كـ



 

كوردیو – تایبەت

ئەمڕۆ هەینی ئۆتۆمبێلێكی هێزەكانی پێشمەرگەی كوردستان لەناوچەكانی سەعدیەو كۆباشی بەر بۆمبێكی چێندراو كەوتوون.
سەرچاوەیەكی ئەمنی لەناحیەی سەعدیە بۆ كوردیو رایگەیاندووە، ئەمڕۆ ئۆتۆمبێلێكی هێزەكانی پێشمەرگە كە خواردنیان بۆ بازگەكان گواستۆتەوە بەر بۆمبێكی چێندراو كەوتوون و لەئەنجامیشدا سێ‌ پێشمەرگە شەهید بوونە.
ئەمەو تاكو ئێستا ناسنامەی ئەو پێشمەرگانەی كە لەو ڕووداوەدا شەهید بوونە ئاشكرا نەكراون و نەشزاندراوە سەربە چ یەكەیەكی سەربازی بوونە.

 

ئـ . كـ

 

كوردیو – دووزخورماتوو 

بەپێی ئەو زانیارییەی كوردیو دەستی كەوتووە، ئەو هێزەی كە چوونەتە نێو سەنتەری قەزای دووزخورماتوو هێزێكی پڕچەك و جبەخانەیە.
لەدوو شەوی رابردوودا هێزێكی تایبەتی پێشمەرگە كە سەربە یەكەی (70) ی هێزەكانی پێشمەرگەن چوونەتە نێو سەنتەری قەزای دووزخورماتوو، ئەوەش بۆتە مایەی دروستكردنی ترس لەدڵی هاوڵاتیانی شیعە مەزهەب و دوێنێش بەسەدان خێزان قەزاكەیان جێهێشتووە.
كوردیو زانیویەتی، ئەو هێزەی پێشمەرگە لە (220) ئۆتۆمبێل پێكهاتوون و جۆرەها چەكی جۆراو جۆریان پێیەو دابەشی سەر (10) ناوچەی جیاجیای قەزای دووزخورماتوو بوون و فەرمانی وەڵامدانەوەی خێراشیان پێكراوە لەهەر ئەگەرێكی نەخوازراو.

 

ئـ . كـ

 

 

ئەنجوومەنی باڵای ئیسلامی لەبارەی هەڵپەساردنی كۆبوونەوەكانی ئەنجوومەنی وەزیران لەلایەن وەزیرەكانیانەوە روونكردەوەیەك بڵاودەكاتەوە.
(حەمید موعلە) وتەبێژی ئەنجوومەنی باڵای ئیسلامی لەعێراق رایگەیاند، دەنگۆی بایكۆتكردن لەبەشداری كردنی كۆبوونەوەكانی ئەنجوومەنی وەزیران لەلایەن وەزیرەكانیان هیچ بنەمایەكیان نییە.
ئەمەو دوێنێ‌ هەر سێ‌ وەزیری كوتلەی مواتن كە پێكهاتوون لە وەزیرەكانی نەوت و گواستنەوەو وەرزش و لاوان رایانگەیاندبوو، ئەوان تاكو پێكهێنانی حكومەتی نوێ‌ بەشداری كۆبوونەوەكانی ئەنجوومەنی وەزیران ناكەن.
موعلە راشیگەیاند، تاكو ئێستا تەنها (عادل عەبدولـمەهدی) وەزیری نەوت بەشداریكردنی لەكۆبوونەوەكانی ئەنجوومەنی وەزیران هەڵپەساردووە.
لەلایەن خۆشیەوە وەزیری نەوت، (فەیاز حەسەن) بریكاری وەزارەتەكەی لەشوێنی خۆی داناوە كە بەپێی ئەو دەسەڵاتانەی پێیدراوە لەمەودوا كارەكانی وەزارەتی نەوت بەڕێوەببات.

 

ئـ . كـ


 

كوردیو – مەخمور

هێزەكانی سوپای عێراق لەسنووری قەزای مەخمور گوندێكیان لەژێر چنگی داعش دەرهێناوە، ئەمەش دەبێتە سێیەم گوند كە لەدوێنێوە لەژێر چنگی داعش دەرهێندراون.
بەپێی زانیارییەكانی پێشمەرگە لەمیحوەری مەخمور، ئەمڕۆ هێزەكانی سوپای عێراق توانیویەتی گوندی (خرەبەردان) لەژێر چنگی داعش دەربهێنێت و ئێستاش ئاڕاستەی گوندی خەتابیان گرتووە، بەڵام زۆر بەسستی پێشڕەوی دەكەن.
لەسەرێكی ترەوە پێشمەرگە ترسی لەوە هەیە سوپای عێراق تووشی شكست بێت لەشەڕی دژی داعش و ئەو چەك و جبەخانانە جارێكی تر بكەوێتە دەستی ئەو گروپە، بۆیە ئەوانیش خۆیان ئامادەكردووە تاكو بەهەر شێوەیەك بێت هاریكاری هێزەكانی سوپا بكەن.
لەلایەكی ترەوە هەر ئەمڕۆ داعش هێرشێكی خۆكوژی كردۆتە سەر هێزەكانی سوپای عێراق و ژمارەیەك سەرباز كوژراون و برینداربوونە.
 

 

ئـ . كـ

 

 

حكومەتی عێراق بڕی (100) ملیار دیناری دیكەی بۆ جووتیارانی سەرتاسەری ووڵات تەرخان كردووەو بڕیارەكەش لەئەنجوومەنی وەزیران پەسەندكراوە.
(ئەشواق جاف) ئەندامی ئەنجوومەنی نوێنەران رایگەیاند، ئەو بەدواداچوونی بۆ پارەی گەنمی جووتیاران كردووەو لەلایەن وەزیری بارزگانی عێراق بەوەكالەتیش ئاگاداركراوەتەوە كە بڕی (100) ملیار دینار بۆ جووتیاران تەرخان كراوەو لە كۆبوونەوەی ئەنجوومەنی وەزیرانیشدا بڕیارەكە پەسەند كراوە.
(جاف) بۆ ماڵپەری پارتی وتیشی، بەگوێرەی زانیاری وەزیری بازرگانی بەوەكالەت، دابەشكردنی ئەو برە پارەیە بەهەمان شێوەی پێشوو دەبێ كە نیوەی بۆ ساڵی (2014) یەو نیوەكەی دیكەیشی بۆ ساڵی (2015) دەبێ، هەر پارێزگایەكیش چەند قەرزی هەیە لەلای حكوومەت (3) لەسەدی دەداتەوەو دواتر دابەش دەكرێ.
ئەو ئەندامەی ئەنجوومەنی نوێنەران ئاماژەی بەوەشدا، كە ئێستا وەزارەتی بازرگانی عێراق چاوەڕێی پەسەندكردنی خشتەی دابەشكردنەكەن لەلایەن (عەبادی) و دواتر ڕایدەگەینن هەر پارێزگایەك چەندی لەو‌ (100) ملیار دینارەی تەرخان كراوە بەردەكەوێ.

 

ئـ . كـ


 

 

ووتەبێژی وەزارەتی تەندروستی رایگەیاند، بەهۆی كەمی پشكی دەرمان كە بەغدا دەینێرێ، ناچار بوون لە كۆمپانیاكانی بكڕن، تا ئێستاش پارەیەكی زۆریان لەسەر كەڵەكە بووە وەكو قەرز، كە زیاترە لە (100) ملیار دینار.
(د. خالس قادر) ووتەبێژی وەزارەتی تەندروستی ڕایگەیاند، بەهۆی كەمی دەرمان كە بەغدا دەینێرێت بۆ هەرێمی كوردستان، ناچاربوون ئەوەی تر لە داهاتی ناوخۆیی دابینی بكەن لە ڕێگەی كڕینی دەرمان و پێداویستیە پزیشكیەكان لە كۆمپانیاكانی تایبەت بە دەرمان لە كوردستان.
ئەو ووتیشی، هەموو ئەو گرێبەستانە لە ساڵی (2014) بەدواوە لە ڕێگەی وەزارەتی دارایی و بەڕەزامەندی ئەوان و حكومەتی هەرێم بووە، بەڵام بەهۆی قەیرانی دارایی حكومەتی هەرێمی كوردستان تاكو ئێستا زیاتر لە (100) ملیار دیناری كۆمپانیاكان قەرزارن.
(د. خاڵس قادر) بۆ باسنیوز وتیشی، داوایان كردووە لە وەزارەتی دارایی هیچ نەبێت بڕێك لەو پارەیەیان بۆ دابین بكەن تاكو بیدەنە كۆمپانیاكان، ئەوانیش گوتوویانە پارەیان بێتە دەست بۆیان تەرخان دەكەن.
بەوتەی (خاڵس قادر) بەهۆی كەڵەكەبوونی ئەو قەرزە زۆرەوە كۆمپانیاكانی تایبەت بە دەرمان مامەڵەیان زۆر ناخۆش بووە، لەگەڵ وەزارەتی تەندروستی و بەردەوام داوای وەرگرتنی قەرزەكانیان دەكەن.
 

 

ئـ . كـ

 

كوردیو – هەولێر

ئەمڕۆ هەینی نرخی دۆلار لەبازاڕەكانی هەرێمی كوردستان بەرز بوونەوەیەكی تۆماركردووە، ئەوەش لەچوارچێوەی ناجێگیری نرخی دراوەكان دێت لەماوەی چەن هەفتەی رابردوودا.
لەگەڵ ئەوەی تاكو ئێستا بەهۆی پشووەكانی نەورۆزەوە دۆخی بازاڕەكان ئاسایی نەبۆتەوە، بەڵام بەهای دۆلار لەبازاڕەكانی هەرێمی كوردستان بەرز بوونەوەیەكی تۆمار كردووە.
بەپێی زانیارییەكانی بازاڕی بۆرسەی هەولێر، ئەمڕۆ هەینی نرخی (100) دۆلاری ئەمریكی بەرامبەر بە (127.300) دیناری عێراقی بووە.

 

ئـ . كـ

 

 

 

كوردیو – مەخمور

 

ئەمڕۆ هەینی جارێكی تر هێزەكانی سوپای عێراق و گروپە چەكدارەكانی داعش لەباشووری قەزای مەخمور ڕووبەڕووی یەكتری بوونەتەوەو لەئێستاشدا شەڕێكی سەخت بەردەوامە.
سەرچاوەیەك لەهێزەكانی پێشمەرگە لەمیحوەری مەخمور رایگەیاند، لەئێستادا شەڕێكی سەخت لەنێوان هێزەكانی سوپای عێراق و گروپە چەكدارەكانی داعش لەنزیك گوندی شایالاری بەڕێوەدەچێت.
لەسەرێكی ترەوە فڕۆكە جەنگییەكانی هاوپەیمانان بۆردومانی پێگەكانی داعش دەكەن لەنزیك قەزای گەیارە، بەتایبەتی لەگوندەكانی حاجی عەلی لەباشووری خۆرئاوای قەزای مەخمور.
جێگەی باسكردنە شەڕو پێكدادانەكانی نێوان هێزەكان سوپای عێراق و گروپە چەكدارەكانی داعش لەدوێنێوە دەستی پێكردووەو تاكو ئێستاش هێزەكانی سوپا توانیویانە دوو گوند لەداعش وەربگرنەوە، ئەمە لەگەڵ ئەوەی داعش پاشەكشەی لەو دوو گوندە كردبوو.

 

ئـ . كـ