فڕۆكە جەنگییەكانی سوپای توركیا بۆردومانی سنووری پارێزگای دهۆك دەكەن و ترس لەدڵی هاوڵاتیان دروست دەكەن.
بەپێی سەرچاوە میدیاییەكان، شەوی رابردوو فڕۆكە جەنگییەكانی سوپای توركیا بۆردومانی گوندی (كەشان) ی سنووری شاری زاخۆیان كردووەو زیانێكی زۆری ماڵیان بەر ناوچەكە گەیاندووە.
هاوكات باسیش لەوەكراوە، بۆردومانی فڕۆكە جەنگییەكانی سوپای توركیا زیاتر لە كاتژمێرێك بەردەوام بووە، ئەوەش بۆتە مایەی دروست بوونی ترس و دڵەڕاوكێ‌ لەدڵی هاوڵاتیانی سنوورەكە.

 

ئـ . كـ

 

 

دانێل بودیل بەرگریكاری هەڵبژاردەی چیك رەتیكردەوە رێگا بدات خێزانەكەی رووبكاتە ووڵاتی فەرەنسا كە خۆی یاوەری شاندی هەڵبژاردەی ووڵاتەكەی كردووە و بەشداری یۆرۆ دەكات".

بودیل ئەستێرەی یانەی شیفیلد وینزدای ئینگلیزی لە لێدوانێكیدا لەنێو شاری (تور)ی فەرەنسی ووتی : " تەنها باپیرم لەگەڵم هاتووە ، ئەو بەمنی ووت لەژیانی خۆیدا بەهەموو ئەزمونێك تێپەربووە و لەهیچ شتێك ناترسێت ، بۆیە من رێگەم پێدا و بلیتێكم بۆ وەرگرتووە".

ئەستێرەكەی هەڵبژاردەی چیك دەڵێت : " رێگەم نەداوە هیچ یەكێك لە ئەندامانی خێزانەكەم گەشتی ووڵاتی فەرەنسا بكەن ، ئەمەش بەهۆی هەرەشەی تیرۆریستان كە ئاراستەی فەرەنسایان كردووە".

ئەمەو جێی باسە هەڵبژاردەی چیك لەیەكەم رووبەرووبوونەوەی لە یارییەكانی یۆرۆی (2016) تووشی زەحمەتییەكی زۆر دەبێتەوە كاتێك بەرامبەر هەڵبژاردەی ئیسپانیا یاری دەكات".


 

رێكان عزیز

كوردیو ـ تایبەت


ئەمڕۆ پێنج شەممە لە سەرتاسەری كوردستان بەهۆی بەڕێوەچوونی تاقیكردنەوەی نیشتیمانی پۆلی 12ی ئامادەیی بە بڕیاری وەزارەتی گواستنەوە و گەیاندن هێڵەكانی ئەنتەرنێت ڕاگیراون و تاوەكو ئێستاش هەندێك كۆمپانیا پابەند نابن بە بڕیاری ڕاگرتنی هێڵەكانی ئەنتەرنێت.

بەگوێرەی زانیاریەكانی كوردیو بڕیارەكەی وەزیری گواستنەوە و گەیاندن لەسەر داوای وەزارەتی پەروەردە بووە و بۆ ماوەی حەوت ڕۆژ، ڕۆژانی تاقیكردنەوە لە كاتژمێر 8 بۆ 11ی نیوەڕۆ هێڵەكان ڕادەگیرێن.

بڕیاری ڕاگرتنی هێڵەكانی ئەنتەرنێت پاش ئەوەهات كە پرسیارەكانی پۆلی 12ی ئامادەیی دزەی پێكراو بەهۆیە وەزارەتی پەروەردە چەندین ڕێوشوێنی نوێی توندی گرتە بەر.

 

a.m

 

 

 

 

لەگەڵ ئەوەی لایەنە سوونییەكان لەهەوڵدان ڕێگری بكەن لەچوونی میلیشیا شیعەكانی حەشدی شەعبی بۆ نێو شاری فەلوجە، بەڵام فەرماندەی هێزی بەدر سوورە لەسەر چوونی بۆ نێو ئەو شارە.
(هادی عامری) فەرماندەی میلیشیا شیعەكانی حەشدی شەعبی بەیاننامەیەكی بڵاوكردۆتەوەو تێیدا داوا دەكات هاوڵاتیانی شاری فەلوجە بچنە دەرەوەو ئەوانیش سوورن لەسەر چوونیان بۆ نێو شارەكە.
عامری داوای لە عەبادی كردووە بایەخی سەرەكی بدات بۆ كۆنترۆڵ كردنەوەی شاری فەلوجە كە ئێستا لەژێر چنگی گروپە چەكدارەكانی داعشدایە.
هاوكات فەرماندەی حەشدی شیعی رەخنەی لەسستی بەڕێوەچوونی شەڕی شاری فەلوجە كردووە، راشیگەیاندبوو : پرۆسەی ڕزگاركردنی شارەكە تووشی خەیانەت بووە، بەتایبەتی پاش ئەوەی یەكەیەكی هێزەكان ڕەوانەی قەزای مەخمور كرابوو.

 

ئـ . كـ

 

 

 

 

شەوی رابردوو چەند چەكدارێكی فەڵەستینی لەناوەڕاستی شاری تەلئەبیب هێرشیان كردۆتە سەر قاوەخانەیەك و چەند ئیسرائیلییەكانیان كوشتووەو بریندار كردووە.
ئاژانس و سەرچاوە هەواڵییەكان باس لەوەدەكەن، شەوی رابردوو دوو چەكداری فەڵەستینی لەناوەڕاستی شاری تەلئەبیب هێرشیان كردۆتە سەر قاوەخانەیەك و دەستڕێژی گولەیان كردوەو لەئەنجامیشدا چوار كەسیان كوشتووەو (10) كەسی تریشیان بریندار كردووە.
ئەمڕۆ بەرەبەیانی (بنیامین نەتنیاهۆ) بەیاوەری ژمارەیەك گەورە بەرپرسی ئیسرائیلی شوێنی رووداوەكەیان بەسەر كردۆتەوەو بۆ رۆژنامەنووسان رایگەیاندووە، ئەوان بەتووندی وەڵامی ئەو كردەوەیە دەدەنەوە.
دوای رووداوەكەش پۆلیسی ئیسرائیلی لەگوندەكانی نزیك شاری خەلیل لەكەناری خۆرئاوا دوو كەسیان دەستگیركردووە بەگومانی دەستهەبوون لەو رووداوە، یەكێك لەوان بەبرینداری دەستگیركراوە.

ئـ . كـ

 

 

 

 

هێزەكانی سوپای عێراق رایانگەیاند، گەڕەكێكی باشووری شاری فەلوجەیان لەژێر چنگی گروپە چەكدارەكانی داعش دەرهێناوە.
دەزگای بنەبڕكردنی تیرۆری عێراقی رایگەیاند، ئێوارەی دوێنێ‌ هێزەكانیان توانیویانە بەربەستەكانی داعش ببڕن و گەڕەكی شەهیدان كە دەكەوێتە بەشی باشووری شاری فەلوجە كۆنترۆڵ بكەن.
(سەباح نەعمان) ووتەبێژی هێزی بنەبڕكردنی تیرۆر رایگەیاند، ئاڵای عێراقیان لەسەر باڵەخانەكانی گەڕەكی شەهیدان بەرز كردۆتەوە، دواتریش بەپەلە (حەیدەر عەبادی) سەرۆك وەزیران گەیشتۆتە ئەو گەڕەكەو هێزەكانی بەسەر كردۆتەوە.
جێگەی باسكردنە شاری فەلوجە (18) رۆژە لەلایەن (45) هەزار چەكدار گەمارۆدراوەو دوای بۆردومانێكی چڕو هاریكاری فڕۆكە جەنگییەكانی ئەمریكا تواندراوە بچنە نێو گەڕەكێكی باشووری شارەكە.

 

ئـ . كـ

 

لە ئێستادا 100 دۆلار بە 126 هەزار و 850 دینارە، لەکاتێدا دوێنێ نرخەکەی لەسەر و 127 هەزار دیناربوو.

نرخی دراوەکانی دیکە بەم شێوەیەیە:

100 پاوەن بە 184 هەزار دینارە.

100 یۆرۆ بە ١٤٤ هەزار و 500 دینارە.

100 هەزار تمەنی‌ ئێرانی‌ بە 37 هەزار دینارە.

100 لیرەی تورکی بە 44 هەزار دینارە.


ڕێبین عەلی

 

 

لەمیانی یارییەكانی دۆستانە و ئامادەكاری بۆ كۆتاییەكانی یۆرۆی (2016) كە سبەی یارییەكانی لە فەرەنسا دەستپێدەكات ، هەڵبژاردەی پورتوگال بە سەركردایەتی كریستیانۆ رۆناڵدۆ بە ئەنجامی (7 – 0) لە هەڵبژاردەی ئیستوانیای بردەوە".

دوو لە حەوت گۆڵەكەی پورتوگال كریستیانۆ رۆناڵدۆ تۆماریكرد ، دوو گۆڵی دیكەش یاریزان (ریكاردۆ كوارێزما) تۆماریكرد ، هەریەكە لە (دانیلۆ و ئیدیر لۆپێز) رۆڵیان لە گۆڵی پێنجەم و شەشەمی پورتوگال هەبوو ، كارلۆ میتس یاریزانی هەڵبژاردەی ئیستوانیا گۆڵێكی بۆ پورتوگال لە دژی هەڵبژاردەی ووڵاتەكەی تۆماركرد".

هەڵبژاردەی پورتوگال لەیارییەكانی یۆرۆی (2016) لە گرووپی شەشەم یاری دەكات شان بەشانی هەڵبژاردەكانی (ئایسلەندا و نەمسا و هەنگاریا)".


 

رێكان عزیز

 

 

ئەو نەخۆشانەی‌ دووچاری‌ شێرپەنجەی‌ مەمك بوون دەتوانن زیاتر لە ژیاندا بمێننەوە ئەگەر نەهێڵن كێشیان زیاد بكات. 

بەپێی ئەنجامی توێژینەوەیەكی پزیشكی دەركەوتووە، كۆنترۆڵكردنی‌ كێش «بیرۆكەیەكی‌ باشە لەهەر كاتێكی‌ ژیاندا بێت» بەتایبەتی‌ پاش تووشبوون بە شێرپەنجەی‌ مەمك ئێجگار گرنگ دەبێت.
لەمەوبەر ئەوە زانرابوو كە پەیوەندی‌ هەیە لەنێوان زیادكردنی‌ كێش‌ و رێژەی‌ مردن بەم جۆرە شێرپەنجەیە، بەڵام ئەم هەواڵە ئەوەمان پێدەڵێت : كە پارێزی‌ خواردن‌ و ئەنجامدانی‌ وەرزش ‌و راهێنان كاریگەری‌ باشی‌ هەیە لەسەر بەردەوامی‌ ژیان پاش دووچاربوون بەشێرپەنجەی‌ مەمك.
ئەنجامی توێژینەوەیەكە پاش لێكۆڵینەوەیەكی‌ چڕوپڕ بوو لەسەر ئەو نەخۆشانە ئەنجام درا كە لەئەمریكا دووچاری‌ شێرپەنجەی‌ مەمك ببوون ‌و لێكۆڵینەوەكەش (6) ساڵی‌ خایاندوەو گەیشتۆتە ئەوەی‌ هەر (5) كیلۆگرام زیادبوون لەكێشدا رێژەی‌ مردن بە شێرپەنجەی‌ مەمك ‌و هۆیەكانی‌ تریش بە رێژەی‌ (14%) زیاد دەكات.
زۆر لە پزیشكەكان ئەوە دەزانن كە ئەو نەخۆشانەی‌ قەڵەون‌ و تووشی‌ شێرپەنجەی‌ مەمك بوون، خراپترین پێشبینییان لێدەكرێت، ئەوانە زیاتر نەخۆشییەكە دەگەڕێتەوە سەریان (Relapse) ‌و زووتر دەمرن تا ئەوانەی‌ لەڕن ‌و قەڵەو نین.
لێكۆڵینەوەیەكی‌ پێشتر گەیشتبووە ئەوەی‌ كە ئەو نەخۆشانەی‌ دووچاری‌ شێرپەنجەی‌ مەمك بوون ئەگەر پارێزی‌ كەمكردنەوەی‌ كێش بكەن ‌و راهێنان ‌و وەرزشیش ئەنجام بدەن ئەوا چانسی‌ مردن بە نیوە كەم دەكەنەوە.
بۆیە زۆر گرنگە پاش دەستنیشانكردن (تشخیص) ی‌ شێرپەنجەی‌ مەمك، نەهێڵیت كێشت زیاد بكات.

ئەمڕۆ وەزارەتی دارایی و ئابووری مووچەی مانگی ئازاری كەس و كاری شەهیدان و ئەنفالكراوان دابەش دەكات.
بەپێی راگەیەندراوێكی وەزارەتی دارایی، ئەمڕۆ پێنج شەممە مووچەی مانگی ئازاری كەس و كاری شەهیدان و ئەنفال كراوان و زیندانیانی سیاسی دابەش دەكرێت كە دوێنێش بەشێك لەو موچانە دابەشكراون.
دیاریكردنی وادەی دابەشكردنی مووچەی مانگی سێی ئەم چینانە لەكاتێكدایە كە هەفتەی رابردوو حكومەت بڕیاریدا بەیەك رۆژ مووچەی سەرجەم وەزارەت و دەستەكان دابەش بكات.


ڕێبین عه‌لی