ئەمرۆ ژمارەیەك مامۆستای وانەبێژ كە تا ئێستاش پارەی وانە بێژیان وەرنەگرتوە گردبونەوەیەكیان ئەنجامداو داوایان لە بەرپرسانی پەروەردە كرد كە كرێی وانەبێژیەكەیان بۆ خەرج بكەن.


لە گردبونەوەكەدا مامۆستایان داواشیان كرد كەبكرینە هەمیشەیی و دابمەزرێن چونكە لە ئێستادا بارودۆخی دارایی حكومەت باش بووە.


أ.س


ئازاد جوندیانی ئەندامی پێشووی مەكتەبی سیاسیی یەكێتی و ڕاوێژكاری ئێستای مەسعود بارزانی سەرۆكی پارتی دیموكراتی كوردستان ڕایدەگەیەنیت كەس ناتوانێت لە كوردستان دوو ئیدارەیی دروست بكات وئەگەر تا 4/1 یەكێتی هەروا بڕوات دڵنیام پارتی لەو مەسەلەیە دەسوڕێتەوە و یەكێتی دەخاتە دواوە و ئاماژەش بۆئەوە دەكات كە مەسعود بارزانی تاكەسەركردەی بێ ڕكابەر و كاریزمایە


لەچاوپیكەوتنیكیدا لەگەڵ دەنگی ئەمریكا ئازاد جوندیانی رایگەیاندوە" نەك هەر من هەر هاوڵاتەكی كوردستان نیگەرانە لە درێژەكێشانی ئەم كۆبونەوانە بەڵام پێم وانیە درێژە بكێشێت وای بۆ دەچم لەسەرەتای مانگی چوار واتە(1 یا2 / 4) كۆتایی بەم ڕێگرییانە بهێنرێت كەلەبەردەم پێكهێنانی كابینەی نوێی حكومەتدا لە ئارادان كە حەقیش نیە ئەو ڕێگرییانە هەركەس هەیە بیكات ئەوەی دیارە ئێستا یەكێتیە ڕێگری دەكات لەپێكهێنانی حكومەت، بەشێكی وەك دەڵێن پەیوەندی هەیە بە كێشە نێوخۆییەكانی یەكێتی لەسەر پۆستەكان بۆیە گرێ كوێرەكان دروست دەكات."


ئازاد جوندیانی ئەوەشی وتوە" بەڵام من تەنها ئەو لایەنەی نابینم بەڵكو یەكێتی تا "حەد"ێك توشی "غرورێك" ببوو لەماوەی ڕابردوودا كە پێم وایە دەبێت وردە وردە ئەو غرورە بنیشێتەوە وەك زاراوەی ڕەواندوزی دەڵێن دابمركێتەوە، ئەگەرچی ئەم ڕێگرییانەی یەكێتی پێكهێنانی حكومەت دوادەخات بەڵام یەكێتی دەیەوێت زۆرترین "نوقورچك" لە پارتی بگرێت ،بەڵام پارتی ئێستا ئازادە لە پێكهێنانی حكومەت بەتایبەت دوای ڕێككەوتنی لەگەڵ بزوتنەوەی گۆڕان چونكە بەشێك لەو پۆستانەی یەكێتی داوای دەكردن درا بە گۆڕان و لایەنەكانی تر لەگەڵ ئەوەشدا كاتێك پارتی دەستپێشخەریەكی دەكرد بۆ یەكێتی بۆ ڕۆژی دواتر یەكێتی گرێ كوێرەیەكی تری دروست دەكرد."

ڕاوێژكاری ڕوناكبیری و سیاسی سەرۆكی پێشووی هەرێمی كوردستان( مەسعود بارزانی) ئەوەش دەڵێت" یەكێتی تا ئێستا تاكە هۆكاری پێكنەهێنانی حكومەتە، بەڵام هەموو كات ئەم داخرانە مەرج نیە سودی هەبێت بەڵكو هەندێك جار ئەنجامی پێچەوانەی دەبێت سوڕان و دواكەوتن-ی بەدوادا دێت، بۆیە من پێم وایە ئەگەر تا 4/1 یەكێتی هەروا بڕوات دڵنیام پارتی لەو مەسەلەیە دەسوڕێتەوە و یەكێتی دەخاتە دواوە پڕۆسەكە دەڕوات ئەوكات ئەو وەزارەتانەی بۆ یەكێتی دانراوە یا بە بەتاڵی دەهێڵرێتەوە یا بەوەكالەت بەڕێوەدەبرێن كە ئەمە بۆ یەكێتی زۆر ترسناك دەبێت وە بۆ پڕۆسەی سیاسی هەرێمی كوردستانیش من ناڵێم مەترسیدار دەبێت بەڵام حاڵەتێكی خۆش نابێت، بۆیە یەكێتی لەم 10 ڕۆژەی ماوە ئەو گرێ و كێشانەی ناوخۆی خۆی یا ئەو گڕێ كوێرانەی بۆ پێكهێنانی حكومەتی نوێ دروستی كردووە دەكاتەوە چونكە دواجار ئەوەی زیان دەكات یەكێتیە، نەك پارتی و گۆڕان و ئەو لایەنانەی تر كەبەشداری ڕاستەقینەیان دەبێت لەپێكهێنانی حكومەتدا."

جوندیانی لەقسەكانیدا باسی لەوەكرد" پارتی زۆركات ئەمجارەش زۆر حسابی كورسی لەگەڵ یەكێتی نەكردووە بەڵكو زۆرتر پۆستی پێداون ئەوەتا وەك باس دەكرێت لەڕاگەیاندنەكانەوە پۆستی جێگری سەرۆكی حكومەت و سەرۆكی پەرلەمانی داوە بەیەكێتی بۆیە ئیتر پێویستە لەم چەند ڕۆژەدا ڕون بێتەوە كە یەكێتی مەبەستێتی حكومەت پێكنەیەت یا چی؟"

ڕاشیگەیاند" من ئەوە ناونانێم "نازكێشان" چونكە ڕەنگە ئەو دەستەواژەیە لەسیاسەت بەكارنەیەت بەڵكو زیاتر شاعیرانەیە هەتا دەكرێت ڕاگەیاندن بەكاریبهێنێت، بەڵام پارتی مەبەستیەتی كابینەیەكی هەمەلایەن پێكبهێنێت تا هەمووان پێكەوە ڕوبەڕوی دۆخەكان لەكوردستان و بەغداد ببنەوە تا سبەی بیانویەك بۆ یەكێتی نەهێڵنەوە بڵێ پارتی نەیهێشت من بەشداربم واتە ئەوە پیشاندانی نیەت پاكی پارتیە بەوەی كەهەموو لایەنەكان بەشداربن بۆیە ئەم چەند مانگە پارتی زۆر بە"تەحەمول" و "ئیجابیانە" مامەڵەی لەگەڵ یەكێتی كردووە."

لەبارەی داواكاری یەكێتی بۆ بەشداری كردنی كارای لە كابینەی نوێی حكومەتی هەرێمی كوردستان، ئازاد جوندیانی وتی" یەكێتی تا ئێستا بەشداری كارای هەبووە لە حكومەت هەر بۆ نمونە باسكردن لە بابەتی نەوت كاتی خۆی یەكەم "سوكانی" بۆریە نەوتی كوردستان بەدەستی "خودا لێخۆشبوو بەڕێز مام جەلال" وە هەروەها بەڕێز كاك مەسعود بوو لەبەرچاوی نوێنەرانی وڵاتان و ملیۆنان خەڵك، یا نمونەیەكی تر ئەوكاتەی لەناو یەكێتی بووم كاتێك لەكۆبونەوەی مەكتەبی سیاسی بەتوندی ڕەخنەمان لەوەزیرێكی یەكێتی دەگرت بەڵام ڕەخنەكان لەسەر ئەوەنەبوو كە بەرنامەی یەكێتی جێ بەجێ نەكردووە بەڵكو لەسەر ئەوەبوو كە لەوەزارەتەكەیدا 10 فەرمانبەری پارتی زیاترە لەفەرمانبەری یەكێتی واتە بەداخەوە تێگەیشتن لەبەشداری كارا بەم جۆرە بووە كەژمارەی فەرمانبەری لایەنێك زیاتر بووە لەوی تر."

لەوەڵامی ئەو پرسیارەی كێ بوون ئەوانەی لەناو یەكێتی بەشدار بوون لە دۆسیەی نەوت؟ ئازاد جوندیانی وتی" ڕۆژێك دێت ئەوانەی پشت پەردە ئاشكرا دەبن، ئەوانەی وەك من وازیان هێناوە یا تا ئێستا لەناو یەكێتیدا ماون و وەك ئێمە بێ ئاگابوون لە دۆسیەی شەریكایەتی دۆسیەی نەوت لە ناو یەكێتی ئەگەر لیژنەیەك پێكهات بۆ لێكۆڵینەوە وە جدی بوون لە لێكۆڵینەوە بانگم بكەن دەچم زانیارییەكانیان پێدەدەم."

لەوەڵامی ئەو پرسیارەی ئایا پێتان وایە هەرێمی كوردستان لەبەردەم دروستبونی دوو ئیدارەدا بێت بەفەرمی؟ ئازاد جوندیانی وتی" ئەوكاتەی ئێمە لەناو یەكێتی بوین لە 1996 تا دوای 2000 ئێمە لەناو یەكێتی لەهەموو كەس زیاتر جەختمان لەسەر یەكگرتنەوەی ئیدارە دەكردەوە، بۆیە پێم وانیە لەناو سەركردایەتی یەكێتی دوو ئیدارەیی هەواداری زۆری هەبێت بەڵام خۆ ئێستاش دوو ئیدارەییە بەجۆرێكی تر هەر بۆ نمونە پارتی "موڕاعاتی" یەكێتی زۆر كردووە بۆ نمونە لەو پڕۆژانەی لەسلێمانی دەكرێتەوە كاك قوباد دەچێت دەیانكاتەوە ڕاستە لەپەراوێزدا ئاماژە بە حكومەت دەكات بەڵام وەك دەسكەوتی یەكێتی پیشان دەدرێت ئەم دەرفەتەش پارتی بەتایبەت سەرۆكی حكومەت كاك نێچیرڤان بارزانی دا بە یەكێتی تا لەو ناوچەیەی یەكێتی توشی قەیرانی متمانەبوو ئەو حیزبە لەناو بنكەی جەماوەریدا جارێكی تر یەكێتی هەستێتەوە و وزە بەخۆی بداتەوە."

ئازاد جوندیانی جەختی كردەوە كەس ناتوانێت دوو ئیدارەیی لەكوردستاندا بچەسپێنێت، وتی" ئەوەی بەتەنها دەتوانێت دوو ئیدارەیی بچەسپێنێت وڵاتانی هەرێمی-ین ئیتر توركیایە یا ئێران بەتایبەت ئێران، چونكە ئێران دەیەوێت "حەدیقەیەك"ی تەواو كراوەی هەبێت لە ناوچەی پشتی خۆی لە "زۆنی سلێمانیدا".

هەروەها وتی" من پێم وایە ئەگەر ئەمە ببێتە ستراتیژی ئێران بەتایبەت بیەوێت لەناوچەیەكی سنوری گرنگ بۆ دژایەتی ئەمریكا دروست بكات لە زۆنی سلێمانیدا دەتوانێت ئەم حاڵەتە (دوو ئیدارەیی) ف"ەرز" بكات، ئێران دەسەڵاتی هەیە هەندێك شت "فەرز" بكات، من پێم وانیە ئێڕان بێ ئاگا بێت لە سیاسەتكردنی سلێمانی هەتا لەبەرزكردنەوەی ئاستی داواكارییەكانی یەكێتی بۆ بەشداریكردن لەكابینەی نوێ من پێم وانیە ئێران بێ ئاگا بێت."

واتە ئێران داوا دەكات یەكێتی داواكاری و مەرجەكانی بۆ بەشداری لەحكومەت بەرامبەر پارتی زۆر بكات یا ئاگادارە؟"
ئازاد جوندیانی بەم جۆرە وەڵامی دایەوە و وتی" من دەڵێم ئێران بە ئاگایە لە بەرزكردنەوەی داواكارییەكانی یەكێتی بۆ بەشداری كردن لەكابینەی نوێی حكومەت" ئیتر دوای شیكەرەوەیەكی تر بهێنن بۆتان شی بكاتەوە ئەو قسەیە واتای چی؟"
ئازاد جوندیانی وەڵامی ئەو پرسیارەشی دایەوە ئایا گۆڕان دەتوانێت ببێتە جێگرەوەی یەكێتی بۆ پارتی؟ لەو ڕوەوە وتی" وەك سەرەتا وتم من لەگەڵ دەستەواژەی "ناز كێشان" نیم چونكە ئەوە زیاتر "شاعیرانەیە" نەك سیاسیانە بەڵام گۆڕان قەبارەی خۆی هەیە لەگەڵ ئەوەشدا پارتی نازی ئەویشی كێشاوە، هەرخۆی پارتی لە ڕووی ژمارەی كورسی و ژمارەی دەنگ و هەبونی سەركردەیەكی كاریزمای وەك كاك مەسعود بارزانی حساب بكەی حیزبی "برا گەورە"یە، ئێ "برا گەورە"ش دەبێت كەمێ بەسۆز بێت لەگەڵ برا بچوكەكانی تر."

وتیشی" حیزبی (الف) یا (با) دانی پێدا دەنێت یا نا ئەوە جیایە بەڵام هەموو دنیا دان دەنێت بەوەی كە كاك مەسعود تاكە سەركردەی بێ ڕكابەر و كاریزمایە لەكوردستان كە ئێستا مابێتەوە ئیتر نازانم دوای 10 ساڵ یا 15 ساڵی تر كێ دێت و دەڕوات ئەوە جیایە، بەڵام بەڵێ پارتی برا گەورەیە وە كاك مەسعودیش تاكە سەركردەی یەكەمی كاریزما و بێ ڕكابەرە ئێستا لەكوردستان."
أ.س


دوێنێ سێ شەممە، ڕەجە تەیب ئەردۆگان سەرۆك كۆماری توركیا چەند پەیامێكی ئاڕاستەی ئەو وڵاتانە كرد كە هەڕەشە لە توركیا دەكەن و داوا دەكات بچنە كتێبەكانی مێوو بخوێننەوە، هەروەك داوای لە دەسەڵاتدارانی نیوزلەندا كرد سزای لە سێدارەدان بگەڕێننەوە و سزای توانبارەكە بدەن ئەگەر نا توركیا خۆی لێپێینەوە دەكات.


ئەردۆگان لە میانەی وتارێكی جەماوەریدا لە هەرێمی كوجا ئالی سەبارەت بە هێرشەكەی نیوزلەندا و پەیامی هێرشەبەرەكە بۆ توركیا ووتی: "دەبێت باجی ئەمە بدەن. ئەگەر بەهەر جۆرێك بێت نیوزیلاند لێپێچینەوە نەكات، ئێمە دەزانین چۆن لێپێچینەوە بكەین".


وتیشی: توركیا بوەتە هێمای ئاشتی بۆ جیهان.

 

بنكەی‌ پۆلیسی‌ وارماوەی‌ سەر بەبەرێوەبەرایەتی‌ پۆلیسی‌ پارێزگای‌ سلێمانی‌ ڕێگریی لەئەنجامدانی‌ تاوانێكی‌ كوشتن دەكات‌و بەتۆمەتی‌ ئەنجامدانی‌ تاوانەكە كەسێك دەستگیر دەكات.

پۆلیسی سلێمانی رایدەگەیەنێت دوای‌ كۆكردنەوەی‌ زانیاریی ورد لەسەر تۆمەتبار (ق،ع،ك) كە بەنیاز بووە لەرێگەی‌ كەسێكە ترەوە هاوڵاتییەك بباتە دەرەوە بەبیانوی‌ كڕین‌و فرۆشتنی‌ مەڕو ماڵات ‌و بڕێك پارە لەگەڵ خۆی‌ ببات‌ و هەستن بەكوشتنی‌‌ كەسەكەو بردنی‌ پارەكەی‌.

ئاماژەی بەوەشداوە"تۆمەتبارەكە لەلایەن هێزەكانی‌ پۆلیسەوە دەخرێتە ژێر چاودێرییەوەو سەرئەنجام پێش ئەنجامدانی‌ تاوانەكە، توانرا تۆمەتبار لەچالاكییەكەی‌ بنكەی‌ پۆلیسی‌ وارماوا دەستگیر بكرێت‌و دەستبگیرێت بەسەر سەرجەم ئەو بەڵگانەدا كە تۆمەتبار بەنیاز بووە لەتاوانەكەدا بەكاریبهێنێت.

لەئێستادا تۆمەتبارەكە بەپێی‌ مادەی‌ (56-57) لەیاسای‌ سزادانی‌ عێراقی‌‌و بەفەرمانی‌ دادوەر ڕاگیراوە. تۆمەتبارەكە پێشینەی‌ تاوانی‌ هەبوەو لەچەند بنكەیەكی‌ پۆلیس‌و بەچەند مادەیەكی‌ یاسایی جیاواز داواكراو بووە.

هاوكات لەماوەی‌ 17 رۆژی‌ رابردودا لەلایەن هێزەكانی‌ بنكەی‌ پۆلیسی‌ وارماوەوە، 27 تۆمەتبار بەپێی‌ مادەكانی‌ (443، 413، 482، 457، 21-23ی‌ هاتوچۆ، 11 زیادەڕویی، 386) لەیاسای‌ سزادان دەستگیركراون‌و روبەروی‌ دادگا كراونەتەوە.
أ.س

 


هەزاران پزیشك و كارمەندی تەندروستی و قوتابیانی زانكۆ دوێنێ سێ شەممە خۆپیشاندانێكی گەورەیان لە جەزائیری پایتەخت ڕێكخست دژی دەسەڵاتی عەبدول عەزیز بۆتەفلیقە دیكتاتۆری وڵات و دارودەستەكەی.

خۆپیشاندان و ناڕەزایەتیەكان لە 22ی شوبات ەوە خۆپیشاندان وناڕەزایەتیەكان دژی حكومەت و دەسەڵاتی ئێستای جەزائیر بەردەوامە و زەبر و زەنگی هێزە ئەمنیەكانیش نەیتوانیوە كۆتایی بە خۆپیشاندانەكان بهێنێت.

دوای چەند هەفتەەیكیش لە خۆپیشاندانەكان، عەبدول عەزیز بۆتەفلقیە پاشگەزبوەوە لە پێنجەم جار خۆكانددیكردنی بۆ هەڵبژاردنی سەرۆكایەتی، بەڵام شەقامی جەزائیری بەردەوامە لە خۆپیشندانەكان.

 

 

 

هەڵگرتنی خۆراك لە نایلۆندا ئەگەر بێت و خۆراكەكە گەرم بێت یات لە شوێنی گەرم دابنرێت سەلامەت نییە، چونكە بە كاریگەری پلەی گەرمی رێژەیەكی زۆر لە مادە كیمیاییەكانی ناو نایلۆنەكە دەچێتە ناو خۆراكەكەوە.

ئەمەش مەترسی دروستبوونی نەخۆشییە شێرپەنجەییەكان زیاد دەكات، چونكە هۆكارە بۆ دروستبوونی پاشماوەی پلاستیكی لەناو خوێندا.

بەداخەوە ئەم دیاردەیە زیاتر لە فڕنی سەموون و نانەواخانەكاندا زۆرە كە ڕاستەوخۆ بە گەرمی نان و سەموونەكە دەخرێتە ناو كیسی نایلۆنەوە، ئەمەش زیان بە سەلامەتی خۆراكەكە دەگەیەنێت.

بۆیە باشترە خۆراك لە كیسی كاغەزدا هەڵبگیرێت نەك لە كیسی نایلۆندا، سەرەڕای ئەمانەش وەك پاشەڕۆی نایلۆن زیانێكی گەورە بە ژینگەش دەگەیەنێت.

لەشكر حەمید – ئەندازیاری خۆراك

 


دوای ئەوەی لەسەرداوای مەڵبەندی 6ی كەركوكی یەكگرتوو لەچەند رۆژی رابردودا تەواوی لایەنە سیاسیە كوردیەكان لەشاری كەركوك كۆبونەوە، بەكۆی دەنگ بریاریاندا ئەمرۆ چوارشەممە كە هاوكاتی كردنەوەی ئاگری نەورۆزە لەسەرقەڵای كەركوك ئاهەنگێكی جەماوەری بەریوە دەچێت.


بەپیی زانیارییەكانی كوردیو لەئاهەنگەدا كە ئیوارەی ئەمرۆ چوارشەممە لە كاتژمێر 4 بەرێوە دەچێتو تیایدا یادەكانی راپەرین و بەهارو نەورۆزی تێدابەرز رادەگیریت.


هەرلە ئاهەنگەكەدا وتاری لایەنە سیاسیە كوردیەكانی تێدا دەخوێنرێتەوە و چەندین چالاكی جۆراو جۆرئەنجام دەدرێت.


جێگەی ئاماژەیە لە دوای رووداوەكانی 16ی ئۆكتۆبەری 2017ەوە ئەمە بۆیەكەمین جارە بەم شیوەیە یادی راپەرین و نەورۆز لەوشارەدا بكرێتەوە.


أ.س

چوار شەممە, 20 ئازار 2019 09:48

نه‌ورۆز مێژووی گه‌لێك

نووسراوە لەلایەن:


وه‌ك ڕوونه‌ لای هه‌موان نه‌ورۆز سه‌باره‌ت به‌ كورد له‌ مێژووی خۆیدا ته‌نها بۆنه‌یه‌كی ساده‌ نه‌بووه‌ به‌ڵكو ئه‌م بۆنه‌یه‌ تێكه‌ڵه‌ به‌ خه‌بات وبه‌رگری گه‌لی كوردستان له‌ پێناوی مانه‌وه‌ و گه‌یشتن به‌ مافه‌كانی و خۆ به‌ ده‌سته‌وه‌ نه‌دانی به‌رامبه‌ر به‌ ئیراده‌ی ئه‌وانه‌ی خێریان بۆی نه‌بووه‌.
كردنه‌وه‌ی ئاگری نه‌ورۆز له‌ ده‌یان ساڵی ڕابردوودا به‌ شێك بووه‌ له‌ تێكۆشانی گه‌لی كورد بۆ ئازادی وپارێزگاری له‌ ناسنامه‌ی نیشتمان و سه‌ربه‌خۆیی خۆی .
به‌ هۆی ڕزگار نه‌بوون به‌شێكی زۆری گه‌لی كورد له‌ هه‌ر چوار پارچه‌ی كوردستان له‌ زوڵم وسته‌م و ژێر ده‌سته‌یی ، نه‌ورۆز ئه‌و مۆركه‌ شۆڕشگێڕییه‌ و ڕه‌تكرنه‌وه‌ی ئه‌و زوڵم وسته‌مه‌ی له‌ ده‌ستنه‌داوه‌.
نه‌ورۆز بۆ به‌شێك له‌ كوردستانی باشور و كه‌ركوك وناوچه‌ دابڕاوه‌كانی تری ده‌ره‌وه‌ی هه‌رێم یادكردنه‌وه‌و به‌رز ڕاگرتنی ئه‌م بۆنه‌ نیشتمانییه‌ به‌ زیندوویی بۆته‌ به‌ شێك له‌ خه‌بات بۆ ڕه‌تكردنه‌وه‌ی خۆسه‌پاندن و هه‌وڵی سڕینه‌وه‌ی مۆركی كوردستانی بوونی به‌شێك له‌ كوردستان و ڕوو به‌ ڕوو وه‌ستانه‌وه‌ی به‌ عه‌ره‌ب كردن .
ئه‌گه‌ر نه‌ورۆز ڕه‌مزی شكاندنی زوڵم وزۆری و سته‌م بوبێت ، ده‌بێت ئێمه‌ش هه‌رگیز نائومێد نه‌بین له‌ شكستی شێوازه‌ جۆراوجۆره‌كانی زوڵم وناعه‌داله‌تی كه‌ ڕوویان له‌ نه‌ته‌وه‌كه‌مان كردووه‌ ، چونكه‌ به‌ڵێنی خوای گه‌وره‌یه‌ سته‌م هه‌رچه‌ند ڕه‌گ داكوتراو بێت له‌ناو ده‌چێت و چاكه‌كارو عه‌داله‌ت خواز وحه‌ق ویسته‌كانیش سه‌رده‌كه‌ون، بۆیه‌ نابێت به‌ ڕه‌شبینیه‌وه‌ سه‌یری ژیان و ئاینده‌مان بكه‌ین و نابێت ته‌سلیم به‌ هیچ واقیعێكی تاڵ ببین كه‌ ده‌یانه‌وێت به‌سه‌رماندا بیسه‌پێنن.
جێی خۆیه‌تی بیری ناسنامه‌ی هاوبه‌شی نیشتمانی نه‌ته‌وه‌ییمان بێته‌وه‌ و ئه‌و هه‌سته‌مان لا قوڵتركاته‌وه‌ كه‌ ئێمه‌ی كوردستانیان به‌ جیاوازی بۆچوون و ئینتمای سیاسی و دینی و ناوچه‌یی و مه‌زهه‌بیه‌وه‌ خاوه‌ن ناسنامه‌یه‌كی نه‌ته‌وه‌یی سیاسی هاوبه‌شین ، ده‌بێت ناكۆكیه‌كانی ناو ماڵی كورد كۆتایی پێ بهێنرێت و هه‌موومان له‌ ده‌وری پرۆژه‌یه‌كی هاوبه‌شی نیشتمانی كۆ ببینه‌وه‌ كه‌ به‌داخه‌وه‌ دوژمنانی كورد یه‌ك ده‌نگن و كوردیش له‌ناو خۆیدا په‌رته‌وازه‌و ناكۆك ، كه‌ ئه‌مه‌ش به‌ پله‌ی یه‌كه‌م ده‌سه‌ڵاتی سیاسی لێی به‌رپرسیاره‌ له‌به‌ر به‌رژه‌وه‌ندی ته‌سكی حزبایه‌تی نه‌یانتوانی ببنه‌ پارێزه‌ری به‌رژه‌وه‌ندییه‌ گشتیه‌كانی خه‌ڵكی كوردستان ، له‌ جیاتی چاكسازی گه‌نده‌ڵییان بنیات نا له‌ جیاتی یه‌كخستنه‌وه‌ی هێزه‌ چه‌كداره‌كان ئه‌وه‌نده‌ی تر به‌ حیزبی و به‌ شه‌خصه‌نه‌ كران ، له‌ جیاتی كاراكردنه‌وه‌ی دام ده‌زگا نیشتمانیه‌كان ئیفلیج كران كه‌ هه‌موو ئه‌مانه‌ش خزمه‌تی به‌ دوژمنانی گه‌لی كورد كرد .
له‌گه‌ڵ هه‌موو ئه‌م ناڕه‌حه‌تیانه‌دا نه‌ورۆز ئاماژه‌یه‌ بۆ كۆتایی هێنان به‌ وه‌رزی زستان وسه‌ره‌تای به‌هار .
بۆیه‌ ده‌بێت ئه‌و هه‌سته‌ له‌ دڵ وده‌رونی ئێمه‌ش دا هه‌بێت كه‌ پشت به‌ خوای گه‌وره‌ سه‌رئه‌نجام ته‌می خه‌مه‌كان ده‌ڕه‌وێت و به‌ مافه‌كانمان شادده‌بین و به‌ربه‌سته‌كانی سه‌ره‌ڕیی سه‌ربه‌رزی و به‌خته‌وه‌ریمان لا ده‌به‌ین و له‌ سه‌ر لوتكه‌ی هیواو ئاوات و ئامانجه‌كانمان پێكه‌وه‌ له‌گه‌ڵ سوپاسی په‌روه‌ردگار سرودی سه‌رفرازی ده‌ڵێینه‌وه‌ .
ئه‌م جه‌ژنه‌ نه‌ته‌وه‌ییه‌ له‌ هه‌موو لایه‌ك پیرۆز ده‌كه‌ین ، هیوای سه‌رفرازی و دڵ خۆشی وبه‌خته‌وه‌ری وئازادی بۆ گه‌له‌كه‌مان ده‌خوازین.

 

 

شارەوانی هەولێر رایگەیاند، پڕۆسەی گۆڕینی كارت بۆ سەنەد قۆناغێكی تری بڕیوەو ئێستاش كەرتی كەڕك یەك كە (3200) پارچە زەوی لەخۆ دەگرێت، كارەكانی تەواو بووە.

شارەوانی هەولێر ئاگاداری هاوڵاتیانی خاوەن زەوییەكان دەكاتەوە كە هەر هاوڵاتییەك خاوەن زەوی بێت لە چوار چێوەی ئەم ژمارانەی كە ڕایدەگەیەنین لە جیاكراوەكانی كەڕك یەك، دەتوانن سەردانی سەرۆكایەتی شارەوانی هەولێر بكەن بۆ ئەنجامدانی كارەكانیان بە پێی یاساو ڕێنماییەكان.

 

 

وەرزی بەهار بە وەزری سەیران و چوونەدەر ناسراوە، گومانی تێدا نیە گەشت و سەیران سودی تەندروستی زۆری هەیە گەر بە دروستی ئەنجام بدرێ.

گرنگە ئەمانەمان لە بیر بێت:

1. لە كاتی سەیراندا چاڵاكی جەستەیی و بە پێ ڕۆیشتن سوودی تەندروستی زۆری هەیە، بەڵام چوونە ناو ئاوو مەلەوانی كردن بەبێ شارەزایی ساڵانە كارەساتی جەرگ بڕ دروست دەكات. 

2. بە فڕێدانی شوشەیەك ڕەنگە ببینە هۆی برینداركردنی كەسێكی تر. 

3. بایی ئەوەندە ژینگە بپارێزین كە خودی خۆمان ڕۆژی دواتر بێینەوە هەمان شوێن بتوانین تێیدا بمێنینەوە. 

4. بە بەرزكردنەوەی دەنگی میوزیك با نەبینە هۆی بێزاركردنی لایەنی دەروونی كەسانی تر. 

5. لە كەش و هەوای سارددا پێویستە جل و بەرگی پێویست لەبەر بكرێ، بە تایبەت بۆ منداڵ و بە تەمەن. 

6. هەوڵدەین زیاتر تام و چێژ لە جوانی سروشت وەرگرین لەبری ئەوەی خواردنی زۆر بخۆین. 

7. تكایە، تكایە نەوت و مادەی سوتەمەنی نابێت لە ناو بوتڵی ئاو دابنرێ، گەر ناچاریش بوی ئەوا بە بەرگێكی جیاواز دایپۆشەو دووری خە لە دەستی منداڵ، خوا نەكا گەر دەستی منداڵ كەوت و بڕێكی لێخواردەوە ئەوا (هەوڵ مەدە منداڵەكە بڕشێنیەوە، وا پەسەندە خواردن و خواردنەوەی پێنەدەیت، سەردانی نزیكترین فریاكەوتن بكە). 

8. گەر كەسێك نەخۆشی درێژخایەنی هەبێت، پێویستە دەرمانەكانی لەیاد نەكات، تاكو لە كاتی خۆی وەریگرێت. 

9. جێهێشتنی كەسی بەتەمەن بە تەنیا لە ماڵەوە ئەگەری ئەوەی هەیە ڕووداوی نەخوازراو بهێنێتە كایەوە. 

10. بۆ ئەوەی ئەو خاڵانەی باسمان كرد بە تەواوی جێبەجێ بكرێ، پێویستە كەسی سەرەكی خێزان پلانی سەیرانەكە بۆ ئەندامانی ماڵەوە باس بكات، بەم جۆرە دەتوانرێ دەرچونێكی دروست و ئاسودە ئەنجام بدرێ.

د. هێرش دەربەندی – پزیشكی خولاو

پەڕەى 1 لەکۆى 4952 پەڕەدا