نسرەددین سندی: شەش سالە لژنا ماددێ ١٤٠ ھاتیە راوستاندن

دوو شەممە, 14 تشرینی دووەم 2016 17:41

سەرۆکێ دەستەیا گشتی یا ناوچێن دەرڤەی ئیدارەیا ھەرێما کوردستانێ، ئاشکراکر کو پتریا دەڤەرێن کوردستانی ھاتینە ئازادکرن و نوکە ل بن کونترۆلا پێشمەرگەی نە و دیارکر کو بەرھەڤی دھێنەکرن بۆ کومبوونەکێ ل سەر دەڤەرێ ل گەل قونسلخانێن بیانی ب مەرەما ئاڤەدانکرنا دەڤەرێ.

نسرەددین سندی سەرۆکێ دەستەیا گشتی یا ناوچێن دەرڤەی ئیدارەیا ھەرێما کوردستانێ زێدەتر بۆ رۆژناما ئەڤرۆ گۆت: جھێ دلخوشێ یە چارەنڤسیێ ھەموو دەڤەرێن ماددێ ١٤٠ یێ دکەڤنە بن کونترۆلا پێشمەرگێ کوردستانێ، سالێن بوری حوکمەتا مەرکەزی نەھاتە سەر خەتی بۆ چارەسەرکرنا ئەڤان ناوچان، لەوما گرنگە پێشمەرگە ئەڤان ناوچان بپارێزت، ھەڤدەم بزاڤ بھێنەکرن کو حوکمەتا عیراقێ بھێـتە سەر خەتی بۆ چارەسەرکرنێ و ئەگەر نە، حوکمەتا ھەرێمێ دگەل یوئینێ و ھەڤپەیمانان ڤی بابەتی ب زووترین دەم چارەسەر بکەن، چونکە خەلکێ مە بێزار بوویە و ھەتا کەنکی نوزانن دگەل کیش حوکمەتێ نە و ئەڤە پشتی شەرێ داعش بھێتەکرن.

نسرەددین سندی ھێشتا ژی گۆت: سەرەدانا شاندێ ھەرێمێ یا بۆ بەغدا دانوستاند ل سەر چەند تەوەران ھاتبووکرن و دیسا تەوەرێ سەرەکی شەرێ داعش بوویە، رێکەفتن ل سەر بابەتێ لەشکەری ھاتەکرن چونکە ھەڤپەیمان و ئەمریکا بلەز بوون بو شەری، لێ بابەتێ سیاسی جھێ داخێ یە ھاتە پائێخستن بۆ پشتی شەری.

ھێشتا گۆت: مەترسی ل سەر ئەڤان دەڤەران ھێشتا مایە چونکە ئەڤێن سەر ڤی جھی خودان ھێزن، حەشەدا شەعبی ل کەرکووکێ و دەردوران دڤێت سستاھی بەرامبەر نەبیت، حەشەدا شەعبی ل دووڤ داخویانیێن وان یا بەرھەڤیا دکەت وەک ھێز ئەڤان دەڤەران ھێزتر بکەت، چەوا دوزخورماتو مەترسی بوو و ھەتا نوکە ژی مەترسی بدووماھی نەھاتیە، دیسا دڤێت خەم ژ ئەڤان جھێن دی ژی بھێتە خوارن.

ھێشتا گۆت: ئەگەر ھێزا سیاسی یا pkk نەھێتە چارەسەرکرن مەترسیا وێ چەندێ ھەیە، کو شنگالێ ژی مەترسی ھەبیت و ھیڤدارین چ تشت دناڤ ھێزێن کوردی دا نەھێتە ئەنجامدان و ب رێکێن دانوستاندنێ بابەت بھێتە چارەسەرکرن، دا خەلکێ مە ل شنگال جارەکا دی قوربانیێ نە دەت چونکە ھاتنا داعش بۆ وێ ناوچێ، چونکە قوربانیێن گەلەک مەزن دان و کارەساتێن مەزن ھاتنە سەری و ھەکە بابەت نەھێتە چارەسەرکرن ئەگەرێ چێبوونا ھندەک روودانێن دی ھەیە پشتی داعش.

نسرەددین سندی ئاشکراکر ژی کو حەوێجە ژی دکەڤیتە چارچووڤێ مادێ ١٤٠ دا، شنگال ھەتا دگەھیتە مەخمور و بەر ب کەرکووک و سەعدیە و جەلەولا و حوکمەتا بەعس گەلەک گھورین ئەڤان دەڤەران کرینە و دەرکرنا کوردان و تورکمان و ئینانا عەربان بۆ ئەڤان دەڤەران ھەتا لایێ چەپێ یێ مووسل کوردن لێ ھەتا دەشتا مووسل سنورێن مادێ ١٤٠ ن.

شەش سالە لژنا مادێ ١٤٠ ھاتیە راوستاندن چار سالێن کابینا مالکی و دو سالێن عەبادی ژی، داخاز دکەین حوکمەتا عەبادی پشتی شەرێ مووسل بھێنە سەر خەت و دیسا ب زووترین دەم حوکمەتا ھەرێما کوردستانێ دەست ب ئاڤەدانکرنێ بکەت وئینانا خەلکی بۆ سەر دەڤەرێن وان و دەسپێکرنا ریفراندوومێ .

ھێشتا گۆت: مە داخاز کریە ب رێکا فەرمانگەھا دەرڤە یا حوکمەتا ھەرێمێ ل گەل قونسلێن وەلاتێن بیانی ل ھەولێرێ کومبین و بشێن بێنە سەر خەتی بۆ ئاڤەدانکرنا ئەڤان ناوچان چونکە حوکمەتا ھەرێما کوردستانێ و عیراقێ د قەیرانێن دارایی دانە و ئەگەر ب ھیڤیا ئەڤان ڤە بیت دێ گیروبیت، کا چەوا ھەڤپەیمان ھاریکاریا شەرێ دژی داعش کرینە ئەھا بڤی رەنگی ھاریکاربن بۆ ئاڤەدانکرنا ئەڤان ناوچان.

ئەو ژی گۆت: مە پرۆژەک پێشکێشی ئەنجوومەنێ وەزیران کریە بۆ سەرژمێریەکێ ئەڤان دەڤەرا و ئەو زیانێن ب خەلکی کەفتین، لێ ژبەر قەیرانا دارایی دەست ب پرۆژەی نەھاتیە کرن، دیسا ئەڤ سەرژمێریە یا ھووربیت و ھەتا چەند کەس شەھید بووینە و چەند بەرزەنە، ھیفی خوازین ب زووترین دەم ئەف پرۆژە بھێتە بجھئینان.