بۆ دواجار لایەنە سیاسییەكان ئاگادار كرانەوە

15/04/2016 - 14:28 بڵاوکراوەتەوە لە هەواڵەكان

 


كوردیو - هەڵەبجە - حەیدەر حەمە ساڵح

جێگری پارێزگاری هەڵەبجە بۆ دواجار لایەنە سیاسییەكانی شارەكە لەناردنی كاندیدەكانیان بۆ ئەنجوومەنی پارێزگا ئاگادار دەكاتەوەو ڕاشیدەگەیەنێت كە دوا وادە (17/4/2016) یەو چی دیكە چاوەڕوانی هیچ لایەنێك ناكەن.
(كاوە شێخ عەلی) جێگری پارێزگاری هەڵەبجە بۆ كوردیو ووتی، داوایەكیان ئاڕاستەی لایەنە سیاسییەكانی هەڵەبجە كردووە بەتایبەت ئەو سێ‌ لایەنەی كە تاكو ئێستا ناوی كاندیدەكانیان نەناردوە تاكو بەرواری (17/4) ناوەكانیان بۆ پێكهێنانی ئەنجوومەنی پارێزگای هەڵەبجە ڕادەستی دیوانی پارێزگا بكەن.
ڕاشیگەیاند : ناوی كاندیدەكان لەڕۆژی (18/4) دا ئاڕاستەی وەزارەتی ناوخۆ دەكەن بۆ وردبینی و كارە یاساییەكان بۆیە ئەو بەروارە دوا وادەیە بۆیە داوا لەولایەنە بەڕێزانەی دەكەن ناوی كاندیدەكانیان بۆ پێكهێنانی حكومەتە خۆجێیەكە بنێرن بۆیە چی دیكە چاوەڕوانی هیچ لایەنێك ناكەن.
جێگری پارێزگاری هەڵەبجە ئاماژەی بەلایەنەكان كردو وتی، ئەو لایەنانەی كە ناوەكانیان نەناردوە بریتین لە هەرسێ لایەنی (گۆڕان، پارتی، كۆمەڵ).
لەلایەكی دیكەوە (حەسەن شێخ عەبدولڵا) لێپرسراوی مەڵبەندی پێنجی یەكگرتووی ئیسلامی كوردستان بە كوردیوی ڕاگەیاند : وەك یەكگرتوو هێچ كێشەیەكیان نیە ناوی كاندیدەكانی خۆیان بۆ ئەنجومەنی پارێزگاو بەڕێوەبەرایەتیەكانیش ناردوەو هەرزوو لە پێش وادەی دیاری كراو بەنووسراو وەڵامی پارێزگای هەڵەبجەیان داوەتەوە.
پاش تێپەڕ بوونی زیاتر لە (30) كۆبوونەوەی لایەنە سیاسییەكانی هەڵەبجە هێشتا ئەنجوومەنی پارێزگا دەستی بەكارەكانی نەكردوەو حكومەتە خۆجێیەكە پێكنەهێنراوە.

 

ئـ . كـ