سێ تەقینەوە روسیایان هەژاند

11/04/2016 - 12:29 بڵاوکراوەتەوە لە هەواڵەكان

كوردیو -
لە ناوچەیەكی باشوری روسیا و لە نزیك سنووری جۆرجیا، سێ كەسی خۆكوژ لەبەردەم بنكەیەكی پۆلیس خۆیان تەقاندەوە.

ئاژانسی هەواڵی رۆیتەرز بڵاویكردەوە سێ خۆكوژەكە پێكەوە لە ناوچەی ستافرۆپۆل- باشوری خۆرئاوای روسیا خۆیان تەقاندووەتەوە و هێشتا هیچ زانیاری و وردەكارییەك سەبارەت بە رووداوەكە نەزانراوە.

وەزارەتی ناوخۆی روسیا ئاشكرایكردووە كە هێرشە خۆكوژییەكە بۆسەر بنكەیەی پۆلیسی ناوچەكە بووە و هەرسێ خۆكوژەكە لەبەردەم بنكەكەدا خۆیان تەقاندووەتەوە و هێزە ئەمنییەكانیش دوو چەكداریان كوشتووە كە لەگەڵ خۆكوژەكاندا بەشداریی هێرشەكەیان كردووە.

چەند شایەتحاڵێكیش رایانگەیاندووە، گوێیان لە دەنگی زنجیرەیەك تەقینەوە و تەقە بووە و هێزەكانی پۆلیسیش داوایان لە هاوڵاتیانی ناوچەكە كردووە بەشێوەیەكی كاتی لە ماڵەكانیان بمێننەوە و دایەنگا و باخچەكانی ساوایانیش لە منداڵان چۆڵ بكرێن.

لای خۆشیەوە ئاژانسی هەواڵی نۆڤۆستی روسیا بڵاوكردەوە كە هێرشەكە لەلایەن چوار چەكدارەوە ئەنجامدراوە و یەكێكیان لە بەردەم بەربەرستە ئەمنییەكانی نزیك بنكەی پۆلیسی ناوچەی ستافرۆپۆل كوژراوە و ئەوی دیكەش خۆی تەقاندووەتەوە، بەڵام باسی لە چارەنووسی دوو چەكدارەكەی دیكە نەكردووە.
هـ ن