پەیامی مەكتەبی راگەیاندنی یەكگرتوو بەبۆنەی ڕۆژی ڕۆژنامەگەری كوردییەوە

22/04/2016 - 01:47 بڵاوکراوەتەوە لە هەواڵەكان

بەناوی خوای زاناو داناوە

پێشی 118 ساڵ و لەڕۆژێكی وەكو ئەمڕۆدا لەدەرەوەی نیشتمانی پان و پۆڕی كوردان، بەهەوڵ و هیممەتی بنەماڵەی سەربەرزی بەدرخانییەكان، ڕۆژنامەی (كوردستان) ی دایك لەلایەن (میقداد مەدحەت بەدرخان) ەوە لەشاری قاهیرە دەرچوو.
ئاشكرایە كە بۆ زیندو ڕاگرتنی ئەو یادەو نرخاندنی خەباتی ڕۆشنبیری و ڕۆژنامەگەریی (میقداد مەدحەت بەدرخان)، ساڵانێكە گەلی كورد لە سەرتاسەری كوردستان و ڕۆژنامەنوسان و ڕۆشنبیرانی كورد بەتایبەتی، ڕۆژی (22 ی نیسان) یان كردۆتە ڕۆژی ڕۆژنامەگەری كوردی و بەكارو چاڵاكی جۆراوجۆر، یادەكە بەرزڕادەگرن.
ئێمە لە مەكتەبی ڕاگەیاندنی یەكگرتوو لەكاتێكدا كە پیرۆزبایی گەرم پێشكەش بەڕۆژنامەنووسان و میدیاكارانی كورد دەكەین لەم  یادەدەدا، سڵاوو ڕێز بۆ گیانی (میقداد مەدحەت بەدرخان) ی پێشڕەوو هاوكارانی دەنێرین و كارەكەیان بەرز دەنرخێنین، چونكە ئەوان داهێنەرو پێشەنگی ئەم كاروانە شكۆدارە پڕ لە هەورازو نشێوە بوون و دەرگایەكی فراوانیان بە ڕووی ڕۆشنبیران و سیاسەتوانانی كورددا كردەوە، بۆ ئەوەی لەپاڵ خەباتی سیاسیدا، خەباتی ڕۆژنامەگەری لەخزمەتی ناسنامەی نیشتمانی گەلەكەیاندا بەكاربێنن و ئەم ناسنامەیە لە هەموو ڕەهەندەكانی نەتەوەیی و ئاینی و شارستانیەوە بڕەنگێنن.
(118) ساڵ لە مێژووی ڕۆژنامەگەری كوردی، كە چەندین قۆناغی هەڵكشان و داكشانی بەخۆیەوە بینیوە، گوزارشتە لە مێژووی نەتەوەیەكی چەوساوەو خەباتگێڕ، بەڵام ئاشتیخواز، گوزارشتە لە ئامانجی ڕەوای گەلێك، كە شانازی بەخاك و ناسنامەی خۆیەوە دەكات و سوورە لەسەر بەدەسهێنانی مافە ڕەواكانی.
بێگومان ڕۆژنامەگەری كوردی وەك ئامرازێكی شارستانی، لەقۆناغە جیاجیاكان و لەپارچەكانی كوردستاندا ڕۆڵێكی بەرچاوی هەبووە لە هۆشیاركردنەوەی كۆمەڵگەی كوردی و ئاشناكردنی بەدیرۆكە دوورو درێژەكەیی و پتەوكردنی گیانی خۆڕاگری و چەكێكی كاریگەربووە لە بڵاوكردنەوەی ڕۆشنبیری گشتی و پەڕەپێدانی خەباتی نیشتمانی.
ئەمڕۆ كەیادی (118) ساڵەی نۆبەرەی ڕۆژنامەگەری كوردی دەكەینەوە، مایەی  خۆشحاڵیە كە میدیای كوردی بەتایبەت لەهەرێمی كوردستاندا دەرفەتی زێڕینی بۆ ڕەخساوەو ئەو هەموو فرەیی و فراوانییەی بەخۆیەوە بینیوەو تازەترین تەكنۆلۆجیای لەبەردەستایەو لەڕووی یاساییەوە ژینگەیەكی تاڕاددەیەك گونجاوی بۆ فەراهەم كراوە، بەڵام لەهەمان كاتدا جێی نیگەرانی و لەسەروەستانە، كەمیدیای كوردی لەبەردەم كۆمەڵێك لەمپەرو ئاستەنگی پیشەیی و ئیداری و ئابووریدایەو لەسایەی قەیرانە زۆرەكاندا بەشێك لەم میدیایە بەردەوام لەهەڵوەریندایە .. لەهەمان كاتدا میدیای كوردی نەیتوانیوە ببێتە خاوەن فەلسەفەو پەیامێكی تایبەتی خۆیی و سەرەڕای پێشكەوتنی لەڕووی فۆرم و تەكنۆلۆجیاوە، هێشتا نەیتوانیوە لەڕووی زمان و گوتارەوە وەك میدیایەكی گڵۆباڵ كاربكات و پەیامی گەلی كوردستان بگەیەنێتە ڕای گشتی دەرەوەو لەم ڕووەوە هێشتا سنوورەكانی نەبەزاندووە.
ئێمە لەم یادەدا بە پێویستی دەزانین جەخت لەسەر چەند خاڵێك بكەینەوە؛ كە پێمان وایە گرنگن بۆ بەهێزو پێزكردنی میدیای كوردی، بەجۆرێك كە گوتارەكەی زیاتر لەخزمەتی ئامانجە نیشتمانیە باڵاكان و ئاسایشی كۆمەڵایەتیماندا بێت :- 
یەكەم، بە گرنگی دەزانین كە لەچوارچێوەی یاساكاندا زانیاری پێویست بۆ ڕۆژنامەنووسان فەراهەم بكرێت.
دووەم، بەپێویستی دەزانین كە حكومەت ڕۆڵی هاوكارو هەماهەنگ بگێڕێت لەگەڵ دەزگاكانی ڕاگەیاندندا، لە پێناو پەڕەپێدانی ئاستی پیشەیی میدیاكاران و بنیاتنانی تواناكانیان.
سێیەم،  پێویستە لەڕێگەی یاسای پێشكەوتووی هاوچەرخەوە، بوارەكانی میدیای بینراوو بیستراو ڕێكبخرێتەوە.
چوارەم، بە پێویستی دەزانین لەڕێگەی یاسای ژمارە (35) ی ڕوژنامەگەریی و یاسای سەندیكای ڕۆژنامەنووسانەوە ئاستی ژیان و گوزەرانی میدیاكاران بەرز بكرێتەوە.
پێنجەم، جەخت لەسەر جێبەجێكردنی یاساكانی تایبەت بە ڕۆژنامەگەری دەكەینەوە، چ لەلایەن دەزگاكانی حكومەتەوە، چ لە لایەن دادگاكانەوە، بەتایبەت یاسای ژمارە (35).
شەشەم، داوا دەكەین حكومەت ڕاژەی كاری ڕۆژنامەنووسی وەك لە  بڕگە (‌19) ی ماددە ی (2) ی یاسای سەندیكای ڕۆژنامەنووساندا هاتووە بەوردی جێبەجێ بكات.
حەوتەم، داوا دەكەین وەزارەتی ڕۆشنبیری ئەو ڕێنمایی و ڕسوماتانەی كە تایبەت بە مۆڵەت پێدان و نوێكردنەوەی مۆڵەتی ڕادیۆو تەلەفزیۆنەكان دایناوە هەڵیوەشێنێتەوە؛ چونكە پشت بەیاسایەكی تایبەت نابەستێ و بارگرانی لەسەركەناڵەكان دروست دەكات.
هەشتەم، هیوادارین سەندیكای ڕۆژنامەنووسانی كوردستان بەشێوەیەكی كاراتر داكۆكی لەئازادی و مافی ڕۆژنامەنووسان بكات.
نۆیەم، لەكۆتاییدا هیوادارین كەڕۆژنامەنووسان و میدیاكارانی كوردستانیش، بە بەرپرسیارییەوە مامەڵە لەگەڵ پیشەكەیاندا بكەن و بۆ بەرژەوەندی گەل و ووڵات بەكاری بێنن.
مەكتەبی ڕاگەیاندنی
یەكگرتووی ئیسلامی كوردستان