مەسعود بارزانی : وڵاتەکەمان بە هەستیارترین قۆناغدا تێدەپەڕێت

22/04/2016 - 09:01 بڵاوکراوەتەوە لە هەواڵەكان

مەسعود بارزانی پەیامێكی بەبۆنەی ساڵیادی ڕۆژنامەگەری كوردییەوە بڵاوكردەوە و ڕایگەیاند وڵاتەكەمان بە هەستیارترین قۆناغدا تێدەپەڕێت.

مەسعود بارزانی بەبۆنەی ساڵیادی ١١٨ هەمینی ڕۆژنامەگەری كوردییەوە پەیامێكی بڵاوكردووەتەوە و تێیدا هاتووە "ئێستایش كە وڵاتەكەمان بە هەستیارترین قۆناخدا تێدەپەڕێت و لەبەردەم دەرفەت و بەرەنگاریی گەورەدایە، ئەركی میدیاكارانی كوردستانە بە قەڵەمی خۆیان و ڕوحێكی پێشمەرگانەوە بەرگریی لە گەل و وڵاتەكەیان بكەن و ڕێگە نەدەن مێژووی شۆڕش و بەرخودانی گەلی كوردستان چەواشە بكرێت و هەوڵی ناحەزان بۆ بڵاوكردنەوەی بێ ئومێدی و بێ ئیرادەیی لەناو خەڵكی كوردستان، سەربگرێت".

هەر لە ڕاگەیەندراوەكەی بارزانیدا هاتووە "هەروەها لە كاتێكدا پێشمەرگەی كوردستان لە سەنگەرەكانی بەرگرییدا بەو گیانفیداییە بێ وێنەیەوە بەرگریی لە خاك و گەلەكەمان دەكەن، تیرۆریستان بە سوود وەرگرتن لە تەكنۆلۆژیای زانیاری و هەموو جۆرەكانی میدیا، شەڕی دەروونی لەدژی خەڵكی كوردستان و پێشمەرگە دەكەن. پێشمەرگە و خەڵكی خۆڕاگری كورستانیش ئەو چاوەڕوانییەیان لە میدیاكارانی خۆشەویستی كوردستان هەیە كە لەبەرانبەر ئەم هەوڵەی تیرۆریستان بوەستنەوە و ببنە بەشێكی كاریگەر لە بەرەی ڕووبەڕووبوونەوەی تیرۆر و هزری توندڕۆیی".


دەقی ڕاگەیەندراوەكەی بارزانی

بەناوی خوای گەورە و میهرەبان

بەبۆنەی 118ـمین ساڵیادی دەرچوونی یەكەم رۆژنامەی كوردی (رۆژی رۆژنامەگەری كوردی) و هاوكات هەژدەمین ساڵیادی دامەزراندنی سەندیكای رۆژنامەنووسانی كوردستان، پیرۆزبایی لە سەندیكای رۆژنامەنوسانی كوردستان و میدیاكار و رۆژنامەنووسانی كوردستان دەكەم.

ڕۆژنامەگەریی كوردی لە قۆناغە جیاجیاكانی خەباتی گەلەكەماندا لەدژی داگیركاری و دیكتاتۆری وەستاوەتەوە و بەشێك بووە لە بەرخودانی گەلەكەمان.

ئێستایش كە وڵاتەكەمان بە هەستیارترین قۆناخدا تێدەپەڕێت و لەبەردەم دەرفەت و بەرەنگاریی گەورەدایە، ئەركی میدیاكارانی كوردستانە بە قەڵەمی خۆیان و ڕوحێكی پێشمەرگانەوە بەرگریی لە گەل و وڵاتەكەیان بكەن و ڕێگە نەدەن مێژووی شۆڕش و بەرخودانی گەلی كوردستان چەواشە بكرێت و هەوڵی ناحەزان بۆ بڵاوكردنەوەی بێ ئومێدی و بێ ئیرادەیی لەناو خەڵكی كوردستان، سەربگرێت.
هەروەها لە كاتێكدا پێشمەرگەی كوردستان لە سەنگەرەكانی بەرگرییدا بەو گیانفیداییە بێ وێنەیەوە بەرگریی لە خاك و گەلەكەمان دەكەن، تیرۆریستان بە سوود وەرگرتن لە تەكنۆلۆژیای زانیاری و هەموو جۆرەكانی میدیا، شەڕی دەروونی لەدژی خەڵكی كوردستان و پێشمەرگە دەكەن. پێشمەرگە و خەڵكی خۆڕاگری كورستانیش ئەو چاوەڕوانییەیان لە میدیاكارانی خۆشەویستی كوردستان هەیە كە لەبەرانبەر ئەم هەوڵەی تیرۆریستان بوەستنەوە و ببنە بەشێكی كاریگەر لە بەرەی ڕووبەڕووبوونەوەی تیرۆر و هزری توندڕۆیی.
خۆشبەختانە لە ساڵانی ڕابردوودا بە كەڵك وەرگرتن لە پێشكەوتنە خێراكانی گەیاندنی زانیاری، ڕاگەیاندن و ڕۆژنامەگەری لە كوردستانیش پێشكەوتنی باشی بەخۆیەوە بینی و كاری ڕۆژنامەگەری لە كوردستاندا هەنگاوی باشی ناوە بە بەراورد لەگەڵ وڵاتانی ناوچەكە میدیا و ڕۆژنامەنووسی لە دۆخێكی زۆر باشدایە لەڕووی ئازادی و نەبوونی كوسپ و تەگەرە بۆ كاری ڕۆژنامەنووسی. بۆ گەلێك كە هێشتا لە قۆناخی بەرگریی و پاراستنی ناسنامەكەیدا بێت، ئەركی یەكەمی میدیاكارانی ئەوەیە كە ڕۆڵیان هەبێ لە بەرزكردنەوەی هۆشیاریی نەتەوەیی و پێكەوەژیان و خۆشەویستیی نیشتیمان.
دووبارە پیرۆزبایی لە هەموو ڕۆژنامەنووسانی ئازیزی كوردستان دەكەم و هیوای سەركەوتنیان بۆ دەخوازم.