كەمخەوی بۆ ئافرەتان ئەم زیانەی هەیە

23/04/2016 - 08:25 بڵاوکراوەتەوە لە هەواڵەكان

 

 

بەپێی توێژینەوەیەكی ئەمریكی ئەوە دەركەوتووە كەئافرەتان زیاتر لەپیاوان پێویستیان بەنووستن هەیە.
(مایكل پریۆس) پسپۆری بواری نەخۆشییەكانی نووستن لەزانكۆی دیۆكای كارۆلینای باكوور رایگەیاندووە، بەپێی ئەو توێژینەوەیەی ئەوان ئەنجامیانداوە گەیشتوونەتە ئەو راستیەی كە ئافرەتان لەپیاوان زیاتر پێویستیان بەخەوتن هەیە، باسیشی لەوەكردووە، لەكەم خەویدا ئافرەتان زیاتر لەپیاوان تووشی خەمۆكی دەبن، ئەوەش كاریگەری هەیە لەسەر گۆڕانكاری لەهەڵسوكەوتەكانی، ئەمە لەكاتێكدا هەمان نیشانەكانی كەمخەوی لەسەر پیاوان دەرناكەوێت.
پسپۆری ناوبراو راشیگەیاندووە، كەمخەوی لەئافرەتان دەبێتە مایەی دەركەوتنی جۆرە هەوكردنێكی نوێ‌ كەدواتر ئێشێكی زۆری بۆ پەیدا دەكات، بەڵام ئەگەر لەرۆژیشدا (90) خولەك بنوێت ئەوا سوودی زۆری بۆ جەستەی دەبێت.
جێگەی باس كردنە كەم خەوی بەگشتی كاریگەری نێگەتیڤی لەسەر تەندروستی مرۆڤ هەیە وەك تووش بوون بەنەخۆشیەكانی دڵ و جەڵتەی مێشك و نەخۆشییە دەروونییەكان و هەوكردنە جۆراو جۆرەكان لەجەستەی مرۆڤ.
هەروەها باسی ئەوەش كراوە كەخەو ئارام كەرەوەی مێشكەو دەبێتە مایەی چاڵاكتر بوونی دەماغ، چونكە بەشێكی زۆر ماندووی جەستەی مرۆڤەو پێویستی بەپشووێكی زۆر هەیە.

 

ئـ . كـ