زیاتر لە هەزار چەكداری حیزبوڵای لوبنانی دەهێنرێتە كەركوك

24/04/2016 - 11:03 بڵاوکراوەتەوە لە هەواڵەكان


بۆ یەكەم جار فەرماندەیەكی پێشمەرگە ئاشكرای دەكات كە بە فەرمانی ئێران هێزێكی گەورەی میلشیای حیزبوڵای لوبنانی هێنراوەتە پارێزگای كەركوك ئەگەرچی بە بیانوی كۆنتڕۆڵكردنی گوندی بەشیر هێنراون بەڵام مەترسی گەورە لەسەر شاری كەركوك دروست دەكەن.


حسێن یەزدان پەنا فەرماندەی پێشمەرگەكانی پارتی ئازادی كوردستان بۆ یەكەم جار لە لێدوانێكیدا بۆ ڕۆژنامەی شەقول ئەوسەت ئاشكرای دەكات كە هێزێكی حیزبوڵای لوبنانی كە زیاتر لە هەزار چەكدار  دەبن هێنراونەتە ناوچەی تازەخورماتوو لە باشوری كەركوك كە چەندین چەكی قورسیشیان پێیە و  بە بیانوی كۆنترۆڵكردنی گوندی بەشیر هاتوون.


بە وتەی ئەو فەرماندەی پێشمەرگە ئێستا لیژنەیەكی ئەفسەرانی سوپای قودسی ئێرانی بە سەرۆكایەتی ئاغای ئیقبالی سەرپەرشتی هێزەكانی ملیشیای حەشدی شەعبی دەكەن كە ژمارەیان گەشتۆتە زیاتر لە حەوت هەزار چەكدار  ئەمەش هەموو بە بیانوی كۆنترۆڵكردنی گوندێك.


وتیشی پێ دەچێت هێزی حیزبوڵا بەشداری شەڕی موسڵیشیان پێ بكرێت.


جێگەی ئاماژەیە لە ڕۆژی ڕابردووەوە میلشیاكانی حەشدی شەعبی دەستیان بە هێرشكردنە سەر هاوڵاتیانی كورد و هێزی پێشمەرگە كردووە لە قەزای دووزخورماتوو و بەهۆیەوە فەرماندەیەكی پێشمەرگە  شەهیدبووە.

 

a.m