تا ئێستا زانیوتە ئۆتۆمبێلەكەت سیخوڕیت بەسەرەوە دەكات؟

23/10/2019 - 09:25 بڵاوکراوەتەوە لە هەواڵ/ئۆتۆمبێل

 

گومانی تێدانییە بەكارهێنانی تەكنەلۆژیا لەئۆتۆمبێلە مۆدێرنەكاندا، سوودێكی زۆری هەیە بۆ پارێزگاریكردن سەلامەتی ئێمە‌و باشكردنی ئەدای ئۆتۆمبێلەكان‌و خۆشگوزەرانی ئێمە، بەڵام خاڵێك هەیە كە زۆرمان ئاگاداری نین، ئەویش لەڕێگەی تەكنەلۆژیای ئۆتۆمبێلەكانمانەوە دەتوانرێت سیخوڕیمان بەسەرەوە بكرێت!.


شارەزایان ئەوە ئاشكرادەكەن، كە كۆمپانیاكانی دروستكردنی ئۆتۆمبێل بەئاسانی دەتوانن زانیاری كەسێتی خاوەن ئۆتۆمبێلە نوێیەكان دەستبخەن‌و سیخوڕیان بەسەرەوە بكەن، ئامانجەكەشیان ئاشنابوونە لەبارەی كەسێتی بەكاربەرەكانیان‌و هەڵسوكەوتیان‌و خواستەكانیان، بۆئەوەی دوای توێژینەوەكانیان جۆرە ڕێكلامێك بۆ ئۆتۆمبێلە مۆدێل نوێیەكانیان بكەن، كە جێگەی سەرنج‌و گرنگی كڕیارەكان بن‌و كاریگەریی گەورە لەسەر بڕیاردانیان دروست بكەن‌و بیان كڕن.


كۆمپانیاكانی بەرهەمهێنانی ئۆتۆمبێل ئەم كارە سیخوڕانەیان لەبەندەكانی گرێبەست لەگەڵ كڕیارەكانیان داناوە، بەڵام كڕیار یاخود بەكاربەر بەبێ سەرنجدانی ورد‌و خوێندنەوە واژۆی لەسەر ئەكەن، ئەمەش چوارچێوەیەكی یاسایی دەداتە كارە سیخوڕییەكەیان.


سەبارەت بەو بابەتە، سایتی (CBC)ی ئەمریكی بڵاویكردەوە، كۆمپانیاكانی بەرهەمهێنانی ئۆتۆمبێل زۆر شت لەبارەی ئۆتۆمبێلەكانمان‌و چۆنیەتی شۆفێریكردنمان دەزانن، ئەویش لەڕێگەی چاودێریكردنی ئۆتۆمبێلەكە لەڕێگەی تەكنەلۆژیا، بۆ نموونە كۆمپانیاكان ئاگاداردەبن لەئاراستەی‌و شوێنی سەفەرەكانمان‌و پەیوەندییە تەلەفۆنیەكانمان، ئاگادارییەكانی ئۆتۆمبێلەكە لەكاتی هەڵبوونی گڵۆپی خزمەتگوزارییەكان.


ئۆتۆمبێلە مۆدێرنەكانی ئەم سەردەمە، سیستمی زانیاری‌و كات بەسەربردن‌و خۆشیان تێدایە‌و پەیوەست دەكرێن بەهێڵی ئینتەرنێت، بەوەش ئۆتۆمبێلەكە لەڕێگەی تەكنەلۆژیاوە داتا‌و زانیاریەكان خەزن دەكات‌و دەیان نێرێت بۆ كۆمپانیای بەرهەمهێنەر.


لەو بارەیەوە سەرۆكی كۆمپانیای (ئۆتۆ گێڕ) دەڵێت:"ئەوان واتە "كۆمپانیاكان" دەزانن ئێمە بەچ خێراییەك شۆفێری ئەكەین، لەكوێ ئەژین، چەند منداڵمان هەیە، كاتێكیش مۆبایلە زیرەكەكەت پەیوەست دەكەیت بەئۆتۆمبێلەكەتەوە، ڕاستەوخۆ دەزانن پەیوەندی بەكێوە ئەكەیت‌و نامە بۆ كێ دەنێریت"!.


كۆمپانیاكان چاودێریی بەكارهێنانی خزمەتگوزاریەكانی ئۆتۆمبێلەكان ئەكەن، بۆئەوەی زانیاری وردیان لەبەردەستدابێت‌و ئەو خزمەتگوزاریانە بۆ نەوەی نوێی ئۆتۆمبێلەكان باشتر بكەن، بەڵام مەترسی ئەم كارە، سیخوڕیكردنەكەیە، كۆمپانیاكە دەزانێت پەیوەندی بەكێوە ئەكەیت‌و ئاگاداردەبن لەگەشت‌و سەفەرەكانت، گوێ لەكام مۆسیقا ئەگریت، ئەمەش پێشێلكارییەكی ڕوونە بۆ سەر ژیانی تاكەكەسیمان.


كۆمپانیاكان دەتوانن ئەو زانیاریانەی كە كۆی ئەكەنەوە، بەبڕە پارەیەكی زۆر بەكۆمپانیاكانی دیكەی بەرهەمهێنانی ئۆتۆمبێل بفرۆشنەوە، كە ئەو زانیارییانە ڕۆڵیان ئەبێت، لەپێشخستنی خزمەتگوزاریەكانی ئۆتۆمبێلەكان، بەو شێوەیەی كە بگونجێت لەگەڵ خواست‌و ویستی كڕیاردا.

 

 


ئامادەكردنی: فوئاد هەورامی