چۆن لەكاتی بارانباریندا كۆنترۆڵی ئۆتۆمبێلەكەت دەكەیت بۆئەوەی نەخلیسكێت

30/10/2019 - 09:41 بڵاوکراوەتەوە لە هەواڵ/ئۆتۆمبێل

 

شۆفێریكردن لەوەرزەكانی پایز‌و زستاندا پێویستی بەئاگایی‌و وریایی زیاترە، ئەویش بەهۆی باران‌و بەفر بارین‌و بەستەڵەكەوە، ئەم گۆڕانكارییانەی كەشوهەواش، بەوتەی شارەزایان، ئەگەر شۆفێر بەوریاییەوە شۆفێریی نەكات‌و پابەندنەبێت بەڕێنماییەكانی هاتوچۆوە، ڕووبەڕووی مەترسی كارەسات‌و ڕووداوی هاتوچۆ دەبێت.


پرسیارە گرنگەكە لێردا ئەوەیە، كاتێك وەرزەكانی پایز‌و زستان دەگەڕێنەوە‌و گۆڕانكاریی بەسەر كەشوهەوادا دێت، ... لەگەڵ تەڕبوونی ڕێگەوبان یان دروستبوونی بەستەڵەك‌و بەفربارین‌و كەوتنەوەی لافاو شۆفێر چی بكات، بۆئەوەی تووشی ڕووداوی هاتوچۆ نەبێت؟.


تایبەت بەو بابەتە، دەستەی ئەڵمانیا بۆ كاروباری هونەری ئامۆژگاری شۆفێران دەكات، لەكاتی گۆڕانكاریی كەشوهەوادا‌و حاڵەتی خلیسكانی ئۆتۆمبێلدا پێش هەموو شتێك، دەبێت شۆفێر هێمن‌و لەسەرخۆ بێت‌و تیژڕەوی نەكات، لەبەرئەوەی بۆ نموونە لەكاتی تەڕبوونی شەقام‌و ڕێگەوبان‌و ئیستۆپگرتنی تونددا بۆئەوەی ئۆتۆمبێلەكە بوەستێنێت، تووشی خلیسكان دەبێت‌و ئەگەری ڕووداو‌و كارەساتی لێدەكەوێتەوە.


شارەزایانی ئەڵمانیا ئاماژە بەوە دەدەن، لەحاڵەتی خلیسكانی ئۆتۆمبێلدا، باشترین هەڵسوكەوت شۆفێر بیكات ئەوەیە، زۆر وریا بێت‌و سوكانەكە باش بگرێت، بەهەر ئاراستە‌و لایەكدا خلیسكا، بەهێواشی دەست بەلایەكی دیكەدا بشكێنێتەوە.


سیستمەكانی (ABS)‌و (ESP) ئەگەر لەئۆتۆمبێلەكەدا هەبێت، هاوكارییەكی باشی شۆفێر دەكەن، بۆ كۆنترۆڵكردنی ئۆتۆمبێلەكە‌و نەخلیسكانی‌و لانەدانی لەسەر ئاراستەی ڕێڕەوی خۆی.


بەشێوەیەكی گشتیش شارەزایان تەئكید دەكەنەوە، پێویستە شۆفێر شێوازی "شۆفێریكردنی بەوریایی" لەكۆتایی وەرزی پایز‌و زستاندا پەیڕەو بكات، لەپێناو سەلامەتی خۆیان‌و بەكارهێنەرانی دیكەی ڕیگەوبان.

 

 

 

 

 


ئامادەكردنی: فوئاد هەورامی