زانیوتە بەخێرایی لەتاسە بدەیت، ئۆتۆمبێلەكەت چەند زیانی پێدەگات؟

07/11/2019 - 09:12 بڵاوکراوەتەوە لە هەواڵ/ئۆتۆمبێل

ئێمەی شۆفێر ڕۆژانە لەتاسەكان ئەدەین، بەوتەی ئەندازیارانی میكانیكی ئۆتۆمبێلیش، لێدانی ئەو تاسانە كاریگەریی لەسەر ئۆتۆمبێلەكانمان دەبێت، بەتایبەتی ئەگەر بەخێراییەكی زۆر لەتاسەبدەین، كە كاریگەریی لەسەر بەشە هەستیار‌و گرنگەكان‌و توانای تەكنیكی ئۆتۆمبێل دەبێت.

ئەمانەش ئەو بەشە گرنگانی ئۆتۆمبێلن كە بەهۆی لێدانی تاسە بەتایبەتی بەخێرایی‌و بەتێپەڕبوونی كات، زیانیان پێدەگات: -

1 دەبڵی ئۆتۆمبێل: پێویستە شۆفێر لەكاتی تێپەڕبوون بەسەر تاسەكاندا خێراییەكەی كەمبكاتەوە، لەبەرئەوەی ڕۆیشتن بەسەر تاسەكاندا بەخێرایی زۆر، بەتەواوی دەبڵەكان خراپ دەكات.

2 قوڵاغی بزۆێنەر: تیژڕەوی لەكاتی تاسەدا كاریگەری بۆ سەر ڕاگر‌و قوڵاغی بزوێنەری ئۆتۆمبێل دروست دەكات‌و هەندێك كات ئەو خێرایی‌و فشارەی كە شۆفێر لەتاسەكان دەدات، برغو دەشكێنێت‌و كاریگەریی لەسەر ئەدا‌و بزوێنەری ئۆتۆمبێلەكە دروستدەكات.

3 باڵانسی ئۆتۆمبێل: هاوكات دان لەتاسەكان بەتایبەتی تاسە بەرز‌و كۆنكرێتیەكان، هاوسەنگی "تەوازون یان باڵانس"ی ئۆتۆمبێلەكە تێكدەدات.

4 زیان گەیاندن بەبەشەكانی ژێرەوەی ئۆتۆمبێل، بۆ نموونە زیان گەیاندن بەسندوقی تروس، شكان‌و زیان گەیشتنیش بەبەشەكانی ژێرەوە، واتە پێویستە شۆفێر بڕە پارەیەكی زۆر خەرجبكات‌و ئەو بەشانە بگۆڕیت یان چاك بكاتەوە.
5 زیان گەیشتن بەتایە‌و ویلەكان لەكاتی ڕۆیشتن‌و لێدانی تاسەكاندا.

ئەوەشمان بیرنەچێت كاتێك شۆفێر خێراییەكەی زۆر دەبێت‌و لەپڕ تاسەكان دەبینێت ئیستۆپێكی بەهێز دەگرێت، لەم حاڵەتەشدا ئەگەر شۆفێر‌و سەرنشینەكان پشتێنی سەلامەتیان بەستیبێت، زۆر باشترە‌و لەپێناو پارێزگاریكردن لەسەلامەتیان.

گومانی تێدا تییە لەزۆرێك لەگەڕەك‌و كۆڵانەكان، هاوڵاتیان خۆیان تاسەی دەستكرد دادەنێن، لەبەر ڕێگریكردن لەهەندێك شۆفێر كە نابەرپرسانە لەكۆڵانەكاندا كە جێگەی نیشتەجێبوونی چڕن‌و خێرایی دیاریكراوە، تیڕڕەوی دەكەن، بەبێ گوێدان بەبوونی پیادەی منداڵ‌و پیر‌و كەمئەندام، لەم حاڵەتەدا نابێت هاڵاتیان خۆیان سەربەخۆیانە تاسە دابنێن، بەڵكو پێویستە سەردانی هاتوچۆ بكەن، بۆ ئەو مەبەستە.

لەبەرئەوەی لەهەندێك شوێن هاوڵاتیان تاسەی نەشیاو دادەنێن‌و ئاستەنگ بۆ هاتوچۆی ئۆتۆمبێل دروستدەكات‌و زیان بەئۆتۆمبێلەكان دەگەیەنێت، بۆیە بەشی زیادەڕۆیی‌و شارەوانی سلێمانی بەهەماهەنگی لەگەڵ بەڕێوەبەرایەتی هاتوچۆ هاتوچۆی پارێزگای سلێمانی بڕیاریانداوە، لەهەموو گەڕەك‌و كۆڵانەكاندا تاسە نایاساییەكانیان لابردووە‌و لادەبن.

هەر هاوڵاتیەك لەكۆڵانەكەیدا بەهاوكاری‌و ئاگاداری دراوسێكانی، دەتوانێت سەردانی هاتوچۆ بكات‌و داواكاریی بۆ دانانی تاسە پێشكەش بكات، بەڕێوەبەرایەتی هاتوچۆی پارێزگای سلێمانیش بەئەركی خۆی هەڵدەسێت‌و لەسەر داوای هاوڵاتیان تاسەی یاساییان بۆ دادەنێت.

لەكۆتاییدا دەبێت ئەوە بزانین كە تاسە دەستكردەكان، بەتایبەتی تاسە بەرز كۆنكرێتیەكان سەرەڕای ئەوەی سودیان هەیە بۆ كەمكردنەوەی خێرایی، لەگەڵ ئەوەشدا ئەگەر شۆفێر بەتیژڕەوی لێان بدات زیان بەئۆتۆمبێلەكەی دەگات، بۆیە لەپێناو ئەوەی پارێزگاری لەسەلامەتی خۆمان‌و ئەوانی تر‌و زیانی مادیمان پێنەگات، دەبێت بەخێرایی لەتاسەكان نەدەین.

 

 

 

 

 

 

 

 

 

ئامادەكردنی: فوئاد هەورامــی