تێكچوونی گێڕ، بەڵای ئۆتۆمبێلەكانی ئەم سەردەمەیە، زانیاری نوێ بزانە

28/11/2019 - 09:23 بڵاوکراوەتەوە لە هەواڵ/ئۆتۆمبێل

 

 

لەكاركەوتنی گێڕی ئۆتۆماتیكی ئۆتۆمبێل بەكەمی ڕوودەدات، بەڵام كاتێك گێڕی ئۆتۆماتیك پەكی دەكەوێت‌و "عەتەڵ"ی تێدا دروستدەبێت، گرفت بۆ شۆفێركردن‌و جوڵەی ئۆتۆمبێلەكە دروستدەكات‌و لەهەندێك حاڵەتیشدا كە ئۆتۆمبێلەكە جۆری "دەبڵ گێڕ" نییە، پەكی ئۆتۆمبێلەكە دەخات.

 

سەرەتا هۆكارەكانی لەكاركەوتن‌و خۆاپبوونی گێڕ ئۆتۆماتیك بریتین لە:


*خراپ بەكارهێنانی ئۆتۆمبێل.
*پشتگوێ خستنی چاكسازیی "صیانە"ی بەردەوام بۆ ئۆتۆمبێل.
*خراپبوونی گێڕی ئۆتۆماتیك لەهەندێك ئۆتۆمبێلدا بەتێپەڕبوونی كات.


لێرەشدا دیارترین لەكاركەوتنەكانی گێڕ ئۆتۆماتیك‌و هۆكارەكان‌و ڕێگەچارەكانی دەخەینەڕوو، كە بریتین لە:

 

1 - دواكەوتنی گۆڕینی گێڕ یاخود نەگۆڕینی
لەم حاڵەتەدا وەڵامەدانەوەی گۆڕینی گێڕەكە دوادەكەوێت‌و لەهەندێك حاڵەتیشدا نایگۆڕێت، ئەم پەككەوتنەش لەكاتی بەیانیان، یاخود لەدەستپێكی لێخوڕینی ئۆتۆمبێلەكە بەدیدەكرێت، بەشێوەیەك گێڕ لەحاڵەتی(P)ەوە بۆ حاڵەتی (D) دەگۆڕێت، لایەنی كەم ماوەی دوو چركە دەخایەنێت، تاوەكو گێڕەكە وەڵامەدانەوەی بۆ گۆڕینی حاڵەتەكە دەبێت، لەهەندێك حاڵەتەدا گێڕەكە وەڵامدانەوە نابێت‌و نایگۆڕێت، هۆكاری یەكەمی ئەم پەككەوتنەش خراپبوونی كلاجە‌و دەبێت بگۆڕدرێت، هۆكاری دووەمیش نیشتنی خڵتە‌و پیسیە لەبنی هایدرۆلیكی گێڕەكەدا یاخود كۆن بوون‌و ستۆك بوونی هایدرۆلیكی گێرەكە، بۆ چارەسەركردنیشی پێویستە هایدرۆلیكی گێڕ‌و فلتەرەكەی بگۆڕێت، ئەگەر جۆری ئۆتۆمبێلەكە فلتەری هایدرۆلیكی گێڕی هەبوو.

 

حاڵەتێكی دیكەی دواكەوتنی گۆڕینی گێڕ ئۆتۆماتیك یان بەتەواوی نەگوڕینی هەیە، بەشێوەیەك جوڵە‌و گۆڕینی گێڕەكە جیاوازی دەبێت لەگەڵ خێرایی ئۆتۆمبێلەكە، هۆكارەكەشی بۆ خراپبوونی بەشەكانی ناوەوەی گێڕەكەیە، پێویستە شۆفێر لەنزیكترین كاتدا سەردانی میكانیكی "فیتەر" بكات‌و دوای دەستنیشانكردنی پارچە خراپبووەكە بگۆڕدرێت.

 

2 - جێگیربوون لەسەر یەك خێرایی: لەم حاڵەتەدا ئۆتۆمبێلەكە لەكاتی ڕۆیشتندا، بەشی (تپ ترۆنك) كە جوڵە لەگێڕەكەدا دەگوازێتەوە، وەڵامدانەوەی نابێت بۆ زیادبوونی خێرایی ڕۆیشتنی ئۆتۆمبێلەكە، هۆكارەكەشی بۆ بەرزبوونەوەی پلەی گەرمای گێڕەكەوە دەبێت، بەهۆی سیستمی ساردەكەرەوە یاخود كەمبوونی بڕی هایدۆرلیك.

 

3 - لەرزینی ئۆتۆمبێل لەكاتی ڕۆیشتن‌و جوڵەدا لەسەر ڕێگەوبان: لەم حاڵەتەدا شۆفێر بەشێوەیەكی نائاسایی هەست بەلەرزینی ئۆتۆمبێلەكە دەكات لەكاتی شۆفێریكردندا، بەشێوەیەكی گشتیش هۆكاری ئەم حاڵەتە دەگەڕێتەوە، بۆ خراپبوون‌و لەناوچوونی قوڵاغی گێڕ یاخود قوڵاغی بزوێنەر، لەهەردوو حاڵەتەدا دەبێت، قوڵاغی گێڕ یان قوڵاغی بزوێنەر بگۆڕدرێن.

 

 

 

 

 

ئامادەكردنی: فوئاد جەلال