زانیاری و چۆنیەتی چارەسەركردنی كێشەیەكی كڕینی ئۆتۆمبێل بزانە

12/12/2019 - 09:58 بڵاوکراوەتەوە لە هەواڵ/ئۆتۆمبێل

 

زۆرجار ڕوودەدات خاوەنی ساڵانەی ئۆتۆمبێل وەڵامی تەلەفۆنی كڕیاری ئۆتۆمبێلەكەی ناداتەوە بۆئەوەی مامەڵەی یاسایی گواستنەوەی خاوەندارێتی (تحویل) ئەنجامبدات، لەحاڵەتێكی لەوشێوەیەدا لەڕووی یاساییەوە كڕیارەكە دەتوانێت چی بكات؟.

 

لەوبارەیەوە ڕائید ڕەوەند عومەر، لێپرسراوی ئیدارەی هونەری لەبەڕێوەبەرایەتی هاتووچۆی پارێزگای سلێمانی ڕاگەیاند:" ئەو كەسەی سەردانی بەڕێوەبەرایەتی هاتووچۆی سلێمانی دەكات بەمەبەستی ئەنجامدانی مامەڵەی گواستنەوەی خاوەندارێتی ئۆتۆمبێلەكەی، بەڵام خاوەن ساڵانەكە نایەت بەدەم داوای كڕیارەكەوەو كاروباری گواستنەوەی ساڵانەكەی بۆ ئەنجام بدات، ئەوا كڕیاری ئۆتۆمبێلەكە دەتوانێت ڕاستەوخۆ سەردانی نزیكترین بنكەی پۆلیس بكات بەمەبەستی تۆماركردنی سكاڵای یاسایی لەسەر خاوەنی ساڵانەكە، بەو مەرجەی پارە یاخود هیچ شتێكی دیكەی تێدا نەبێت".

 

وتیشی:" سكاڵاكە دەچێتە لای دادوەری لێكۆڵینەوە و ئەویش بڕیار لەسەر چارەنوسی ئەو ئۆتۆمبێلە دەدات".

 

لەبارەی ئەو كەسانەی لەدەرەوەی كوردستان نیشتەجێن و دەیانەوێت مامەڵەی گواستنەوەی خاوەنداری بكەن ڕائید ڕەوەند وتی:" ئەو كەسانەی لە كوردستان نین مامەڵەی گواستنەوەی خاوەندارێتییان بۆ ئەنجام نادرێت، تەنیا بەڵێنامەیەكیان لێوەردەگیرێت و ساڵانەكەیان بۆ نوێدەكرێتەوە بەناوی ئەو كەسەی كە لە دەرەوەی كوردستان و بەتایبەت لە وڵاتانی ئەوروپا نیشتەجێیە".