بزانە لامبۆرگینی چی دروست كردووە ؟؟

یەک شەممە, 17 کانونی یەکەم 2017 07:11

 

 

هەروەك چۆن زۆربەی كۆمپانیا ناودارەكانی جیهان تای بەرهەمهێنانی ئۆتۆمبێلی شاسی بەرز دایگرتوون، ئەو تایە كۆمپانیای لامبورگینیشی گرتۆتەوەو پەردەی لەسەر یەكەم بەرهەمی شاسی بەرزی خۆی هەڵدایەوە.

ئەو شاسی بەرزە پڕ باق و بریقە ناوی ئۆرۆسە (Urus) و دیزاینەكەشی وەك زۆربەی مۆدیلەكانی دیكەی ئەو كۆمپانیایە سیمایەكی جەنگاوەرانەو هێرشبەرانەی هەیە.

مەكینەی ئەو ئۆتۆمبێلە نوێیەی لامبورگینی توانای بەرهەمهێنانی (650) ئەسپی هەڵمی هێزی هەیە، بەڵام سەرەڕای ئەوەش ئەو شاسی بەرزە بەتوانایە تەنیا (10 – 5) لتر لە هەر (100) كیلۆمەتردا دەسووتێنێت.

هەروەها ئۆرۆس لە توانایدایە خێراییەكەی بگەیەنێتە ئاستی (300) كیلۆمەتر لە كاتژمێرێكداو لە ماوەی كەمتر لە چوار چركەدا خێراییەكەی لە سفرەوە بگەیەنێتە (100) كیلۆمەتر لە كاتژمێرێكدا.

جێگەی باسە كە مۆدێلی ئۆرۆسی لامبورگینی بە كێشی (2154) كیلۆ یەكێك لە قورسترین ئۆتۆمبێلەكانە لەچاو هاوئاستەكانی خۆی.

بڕیاریشە یەكەم نموونەكانی بەرهەمهاتووی ئۆرۆسی لامبورگینی كە لە وڵاتی ئیتاڵیا بەرهەمدێت لە ساڵی (2018) ەدا بخرێتە بازاڕەوەو نرخی سەرەتایی لە (200) هەزار دۆلارەوە دەستپێدەكات.

شایەنی ئاماژەیە كە كۆمپانیای لامبورگینی ساڵی (1963) لەلایەن (فرۆچیۆ لامبورگینی) لە وڵاتی ئیتاڵیا دامەزراوەو لە ئێستادا یەكێك لە ناودارترین كۆمپانیاكانی بەرهەمهێنانی ئۆتۆمبێلە لە جیهاندا.

كوردستان تی ڤی

 

ئـ . كـ