بۆ ئەوەی دوربیت لە مەترسی، لەكاتی بەنزین كڕین ئەم هەڵەیە ئەنجام مەدە

05/06/2018 - 11:21 بڵاوکراوەتەوە لە هەواڵ/ئۆتۆمبێل

 

یەكێك لەو هەڵانەی شۆفێران لەكاتی تێكردنی بەنزینی ئۆتۆمبێلەكانیان ئەنجامیدەدەن، پڕكردنی تانكییەكەیە بەتەواوەتی تەنانەت پاش هەستانەوەی دەسكی بەنزینەكە ئەوەش مەترسی گڕگرتنی ئۆتۆمبێلەكەی هەیە.

 

بەنزین شلەیەكی تایبەتییەو زوو دەبێت بەهەڵم، بەتایبەتی لەكەشی گەرمدا، كۆمپانیاكانی ئۆتۆمبێلیش سیستمێكی تایبەتییان لەتانكی بەنزینەكانی ئۆتۆمبێلەكان جێگیركردووە، كە ئاگادارت دەكاتەوە لەوەی پێویستە بەشێك لەتانكییەكە بۆ هەڵمی بەنزینەكە بهێڵیتەوە.

 


ئەو سیستمە بەناوی (EVAP) ناودەبرێت، كۆمپانیاكان بە هەژماركردنی قەبارەی تەنكیی بەنزینی ئۆتۆمبێلەكان بەشێك لەتەنكییەكە دەهێڵنەوە، تا ئەو بەنزینەی بوە بەهەڵم بەزایە نەچێت‌و سودی لێ ببینرێت.

 


بەپێچەوانەوە تێكردنی بەنزین پاش چەند جارێك لەهەستانەوەی دەسكی بەنزینەكە، زیان بەسیستمی (EVAP) دەگەیەنێت‌و بۆ ماوەیەكیش (تا ئەو كاتەی بەشی سیستمەكە لەتانكییەكە خاڵی دەبێتەوە) مەترسییەكانی تەقینی تانكییەكەو سوتانی ئۆتۆمبێلەكە ئەگەرێكی كراوەیە.

 


هەروەك ئەوەی دەیبینین ڕۆژانە ئۆتۆمبێل لەهەرێمی كوردستان گڕ دەگرن‌و بەشێك لەهۆكاری گڕگرتنی ئەو ئۆتۆمبێلانە، دەگەڕێتەوە بۆ ئەو هەڵەیەی باسكرا.

 

 

 

 


سەرچاوە/ بەڕێوبەرایەتی هاتوچۆی سلێمانی
س ب