كاریگەریی مەی خواردنەوە لەكاتی شۆفێری لە كوردیو بزانە

11/06/2018 - 11:49 بڵاوکراوەتەوە لە هەواڵ/ئۆتۆمبێل

 

شۆفێریكردن كارێكی زۆر مەترسیدارە ئەگەر بەگوێرەی یاسا‌و ڕێنماییەكان جێ بەجێ نەكرێت و یەكێك لەو كاریگەریە زۆر مەترسیدارانەی كە كار دەكاتە سەر ڕەوشی شۆفێریكردن، خواردنەوەی مەی‌و مادە هۆشبەرەكانە.

 

بە گوێرەی توێژینەوە كان، شۆفێری كردن لەژێر كاریگەری مەی‌و مادە هۆشبەرەكاندا ڕوداوی كوشندەی لێ دەكەوێتەوە، لەساڵی 2006 دا لە ویلایەتە یەكگرتوەكانی ئەمریكا 16 هەزار‌و 885 كەس بەڕوداوی هاتوچۆ گیانیان لەدەست داوە كە شۆفێرەكانیان لەژێر كاریگەری مەی خواردنەوەدابون، هەمان توێژینەوە دەریخستوە لە هەر 14 شۆفێری مەست لەكاتی ڕوداوی هاتوچۆدا چواریان گیان لەدەست دەدەن.

 

مادە كهولیەكان چەند جۆرێكیان هەیە لەوانە مادەی كیمیایی ئیسانۆل كە مادەیەكی هایدرۆ كاربۆنیە لە گەڵ ژمارەیەك مادەی ژەهراوی، یان میسانۆل ئەویش مادەیەكی هادرۆ كاربۆنیە لەگەڵ تێكەڵەی گلیسرۆل كە بەهەمان شێوە مادەیەكی ژەهراویە.

 

ئەگەر بڕی كهول 100 ملگم بێت لە 100ملیلیتر خوێندا شۆفێر ئاگای لەخۆیەتی بەڵام توشی هەڵەشەیی‌و لەخۆبایی بونی دەكات تاڕادەیەكی كەم كۆنترۆڵ لەدەست دەدات، بەڵام ئەگەر ئەو ڕٍێژەیە بەرز یۆوە بۆ 200 ملگم، ئەوا بەتەواوی كۆنترۆڵ لەدەست دەدات‌و دەكەوێتە باری بێهۆشیەوە، ئەوەش هۆكاری سەرەكی ڕوداوەكانی هاتوچۆیە.

 

یاسای ڕێگەپێدراو بۆ مەی خواردنەوەی شۆفێر لەوڵاتانی جیهاندا جیاوازە، لەبەریتانیا رێگەدراوە بە 80 ملگم لەهەر 100 ملیلیتر خوێندا لەزۆربەی وڵاتانی ئەوروپا ئەو ڕێژەیە بۆ 50 ملگم كەمكراوەتەوە، لەویلایەتە یەكگرتوەكانی ئەمریكا تا 100 ملگم ڕێگەی پێدەدرێت، لەزۆربەی وڵاتەكانی ڕۆژهەڵات ڕێگە بەهیچ ڕێژەیەك نادرێت.

 

جێگای ئاماژەبۆ كردنە لەهەرێمی كوردستانیش ماوەی چەند ساڵێكە ئامێری پێوانی ڕێژەی مەی هاوردە كراوە‌و تیمەكانی هاتوچۆ بەكاری دەهێنن بۆ زانینی ڕێژەی مەی خواردنەوەی شۆفێران بە تایبەت لە كاتی رووداوەكانی هاتوچۆدا .

 

 



سەرچاوە/ بەڕێوبەرایەتی هاتوچۆی سلێمانی

س ب