مەترسی شۆفێری ماتۆڕ زۆرترە لەئۆتۆمبێل

30/07/2018 - 11:58 بڵاوکراوەتەوە لە هەواڵ/ئۆتۆمبێل

 

لەڕۆژگاری ئەمڕۆدا هاوشێوەی ئۆتۆمبێل ماتۆریش بەشێوەیەكی بەرچاو بەكار دەهێندرێت، بەڵام بەكارهێنانی ماتۆڕیش بێ‌ مەترسی نییە‌و توێژینەوەكان ئەوەیان سەلماندوە كە ماتۆرسكیل (ماتۆر) زۆر ترسناكترە لە ئۆتۆمبێل بەتایبەت لەڕووداوە كوشندەكانی هاتوچۆدا بەڕێژەی %20 مەترسی مردن زیاد دەكات.

 

ئەو كەسانەی كەماتۆر بەكاردەهێنن زۆرترین كەسن كەڕوبەڕوی مەترسی دەبنەوە لەبەكارهێنەرانی شەقامەكاندا، چونكە پارێزراوی شۆفێری ماتۆر خۆی لە هەلومەرجی بێوەی ‌و سەلامەتیدا دەبینێت كە ئەویش بەكارهێنانی ئامرازەكانی خۆ پارێزییە، بەڵام بەداخەوە ئەوەی بەدی دەكرێت زۆرینەی شۆفێرانی ماتۆر گوێ بەو كەرەستە‌و ئامرازە خۆپارێزیانە نادەن.

 

ئامرازەكانی خۆپارێزی خۆی دەبینێتەوە لە (كڵاوی سەرپارێز) كە پارێزگارێكی زۆر چالاك و كارایە‌و كاریگەری هەیە لەسەر كەمكردنەوەی ئەو مەترسیانەی كە ڕوبەڕوی شۆفێری ماتۆڕەكە دەبێتەوە‌و لەكاتی ڕوداوەكاندا ئەگەری مردن كەمدەكاتەوە.

 

پشتێنی سەلامەتی لەئۆتۆمبێلدا یەكێكە لەخۆپارێزە گرنگەكان ‌و ڕۆڵێكی كاریگەری هەیە لەپاراستنی شۆفێردا، نەبەستنیشی شۆفێرەكە ڕوبەڕوی مەترسی دەكاتەوە، بەڵام لەگەڵ ئەوەشدا ماتۆر زۆر ترسناكترە لەئۆتۆمبێل، چونكە ماتۆڕ بەڕێژەی لە %17 مەترسیدارترە لەچاو ئەو شۆفێری ئۆتۆمبێلانەی كە پشتێنی سەلامەتی بۆ كاردەهێنن، هاوكات بەڕێژەی %24 مەترسیدارترە لەچاو ئەو كەسانەی كە پشتێنی سەلامەتی بەكارناهێنن.

 

ماتۆر و ئۆتۆمبێلەكان لەژێر كاریگەری یاسا فیزیاییەكان گوزەر دەكەن كە فەرامۆش كردنی ئەو یاسایانە كارێكی ئاستەمە، بۆ نمونە ئۆتۆمبێل‌و ماتۆر توانایان نیە بەشێوەیەكی یەكسەریی و كتوپر رابوەستن، بەكات و ساتی بەكارهێنانی برێك واتە ئیستۆپ، هەرچەندە جۆر و توانای ئیستۆپەكانی تۆكمە‌و شایستە بێت، ماوەی راوەستان تەنها پشت بە ئیستۆپەكان نابەستێت بەڵكو بەكاریگەری تریش وەك توانا و جۆری تایەكان و رووی شەقام ئیتر (زبر ، ساف ، تەر ، بەستەڵەك ، وشك ، زیخ و چەو ، چەوری ) بێت، هەرچەندە ئەو سێ لایەنە ( ئیستۆپ ، تایە ، شەقام ) زۆر لەبار‌و باش بن، هێشتا مانای ئەوە نیە كە ئۆتۆمبیلەكە بە كتوپر رابوەستێت، بەڵكو پێویستی بەماوەیەكە بۆ ڕاوەستان بەهۆی خێرایی ئەو ئۆتۆمبیلە و كێشەكەی، هەروەها بەڕێژەی پەستانی هەوا لە تایەكان، جگەلەوەش هەتا چەقە هێزی ئەو ئۆتۆمبیلە نزیك بێت لە زەوی ئەوەندە بەرەنگاری زیاد دەكات بەرامبەر بە (وەرگەران ) ی ئۆتۆمبێلەكە، هەروەها بوونی ئیستۆپ لە جۆری (ABS) هۆكارێكی دیكەی فەراهەم كردنی سەلامەتییە لەرووداوەكانی هاتوچۆو ماوەی راوەستان كەم دەكات كە بەشێوەیەكی چالاكتر لەجۆری ئیستۆپەكانی تر كار دەكات.

 

 

 

 

 

سەرچاوە/ هاتوچۆی سلێمانی
س ب