وێنەیەكی وردەكاری مێشك، زانایان سەرسام دەكات

30/07/2019 - 10:52 بڵاوکراوەتەوە لە هەواڵ/هەمەڕەنگ

 

 

زاناكانی نەخۆشخانەی گشتی بۆستن لە ئەمریكا توانیان لەڕێگەی تیشكی موگناتیسییەوە وێنەیەكی وردەكاری مێشك بەدەست بهێنن كە تا ئێستا لەو جۆرە وێنەیە بەردەست نەبووە.

ئەو وێنەیەی كە لەڕێگەی لەرینەوەی موگناتیسی دەست زاناكان كەوتووە، بە ماوەی چوار ڕۆژ گیراوەو بە لای زاناكانەوە دەبێتە دەروازەیەك بۆ زیاتر تێگەیشتن لە حاڵەتەكانی وەك خەمۆكی و بێهۆشبوونی ماوەدرێژو ئۆتیزم.

یەكێك لە بەشدارانی ئەم پرۆسەیە ئاماژە بەوە دەدات ئەو لەرینەوەیە بۆ كەسێكی مردوو ئەنجامداوە، كە ژنێكی تەمەن (54) ساڵ بووە‌و بەهۆی هەوكردنی سییەكانییەوە مردووەو هیچ زیانێك بەر مێشكی نەكەوتووە، چونكە مرۆڤی زیندوو ناتوانێت بەرگەی پشنكنینی لەو جۆرە بگرێت كە ماوەی چوار ڕۆژ بخایەنێت، هەروەها بەرلە كارەكەیان زاناكان دۆخێكی تایبەتیان بۆ مێشكەكە دروستكردووە كە بە جێگیریی هێشتویانەتەوەو ڕێگەی داوە بە بەرگری كردنی شەپۆڵە موگناتیسییە جێگیرەكان.

خاڵێكی تریش لە پرۆسەكەدا كە بۆتە هۆی ئەوەی كەسێكی مردوو هەڵبژێردرێت ئەوەیە گەر ئەو وێنەیە بۆ كەسێكی زیندوو بگیرایە لەوانەبوو وێنەكە زۆر ڕوون نەبێت بە هۆی هوروژم و جووڵەی خوێن بۆ مێشك، نەك هەر ئەوەندە، بەڵكو ئەو ڕووپێوە تیشكییەی لەو وێنەگرتنەدا بەكارهێنراوە زۆر بەهێزترە لەوانەی لە نەخۆشخانەكاندا بەكاردێت، چونكە چەند وێنەیەكی خستۆتەڕوو كە زۆر ووردەو هەندێكیان قەبارەیان لە (0.1) ملیمەتر بچووكترە.

زاناكان سەرسامی خۆیان لەوە دەربڕیوەو ئاماژەیان بەوەداوە كە پێشتر وێنەی وا وردەكاریان نەبینیوەو هیوادارن ئەم كارەیان ڕێخۆشكەر بێت بۆ توێژینەوەی زیاتر سەبارەت بە دروستی مێشك.

هەر ئەو زانایانە ئەوەشیان خستۆتەڕوو كە ئەو ئەنجامانەی پێیگەیشتوون وایان لێدەكات زیاتر لە شیكاری مێشكی مرۆڤ تێبگەن لە هەردوو دۆخی لەشساغی و نەخۆشییدا.

زاناكان لەو وێنە نوێیەدا بەشی بادامە دەمارییان بە ڕوونی بینی كە بریتییە لەكۆمەڵە دەمارێك و بە ئەندازەی دەنكە بادامێك دەبێت ‌و حاڵەتەكانی وەك نیگەرانی و ئۆتیزم وخەمۆكی و پشێویی و ماندوێتی كە بەهۆی شۆك یان ترسەوە دروستدەبێت، هۆكارەكەی ئەركی ناسروشتی ئەو دەنكە بادامە بێت ئەویش بە هۆی نەمان یان ناهاوسەنگی كیمیاییەوە ڕوودەدات.

هەروەها ئەوەی لەو وێنە نوێیەدا بەڕوونی دەركەوتووە بەشی مێشكۆكەیە، كە ڕۆڵی سەرەكی هەیە لە كۆنتڕۆڵكردنی جووڵەی مرۆڤدا، هەموو ئەمانەش لە پێشتردا بەو ڕوونییە نەبینراون بەبێ ڕووپێوێكی تیشكی وا بە هێز كە هێزەكەی گەیشتۆتە (7) تسێلا، خودی تسێلاش یەكەیەكی پێوانەی كایەی موگناتیسییە، ئەمەش لەكاتێكدایە هێزی ئامێری لەرینەوەی موگناتیسی نەخۆشخانەكان تەنها (3) تسێلایە.

كەشتی نووح