ئەمریكا ٤٥ ڕۆژی دیكە مۆڵەت بە كۆمپانیای هواوی دەدات

16/02/2020 - 09:51 بڵاوکراوەتەوە لە هەواڵ/هەمەڕەنگ

 

وەزارەتی بازرگانی ئەمریكا‌ ٤٥ رۆژی دیكە ماوەی زیادەی دا بە هواوی بۆ مۆڵەتی گشتیی كاتی بۆ ئەوەی هاریكاری لەگەڵ كۆمپانیا ئەمریكییەكاندا بكات.

 

وەزارەتی بازرگانی ئەمریكا، بڵاویكردەوە كە ٤٥ رۆژی دیكە ماوەی زیادەی داوە بە كۆمپانیای تەكنەلۆجی چین هواوی بۆ مۆڵەتی گشتیی كاتی كە هاریكاری لەگەڵ كۆمپانیا ئەمریكییەكان دەستەبەر دەكات.

 

بە پێی روونكردنەوەی وەزارەتەكە، ماوەی نوێ دراوە بە هواوی بۆ مۆڵەتی كاتیی كە خۆی لە كاروبارەكانی وەك هەناردەی بەرهەم و گواستنەوە دەبینێتەوە.

 

ئەو كۆمپانیایە كە بە هۆی ئەوەی ئاسایشی نیشتمانی ئەمریكای خستووەتە مەترسیەوە لە لایەن واشنتۆنەوە سزای بەسەردا سەپێندراوە، لە ١٩ی ئابدا لە لایەن وەزارەتی بازرگانی ئەمریكاوە سێ مانگ مۆڵەتی كاتیی پێدرا، پاشان لە ١٨ی تشرینی دووەمدا ماوەی مۆڵەتەكە ٩٠ رۆژ درێژكرایەوە.

 

هەروەها وەزارەتەكە بە بڕیارێكی نوێی ٤٥ رۆژی دیكەی درێژكردەوە تا هواوی و كۆمپانیاكانی سەربە هواوی هاریكاری لەگەڵ كۆمپانیا ئەمریكییەكاندا بكەن.