ئەندۆنۆیسیا چاوەڕوانی هەڵپژانی گڕكانێكە ‌

چوار شەممە, 18 تشرینی یەکەم 2017 05:48

 

 

 

پسپۆڕێكی گڕكانەكان لەئەندۆنۆسیا چەند ڕۆژێك لەمەوبەر لە لێدوانێكیدا ئاشكرایكرد، گڕكانی چیای (ئاگۆنگ) لە دوورگەی (بالێ) ی گەشتیاری ئامادەیە بۆ هەڵپژان دوای ئەوەی بۆ چەند ڕۆژێك ببووە هۆی چەند زەوی لەرزەیەك بێ وەستان.


(جید سوانتیكا) پسۆڕی گڕكانەكان وتی، چەند درزێك لە ملەی گڕكانەكان بینراوە‌و ئەمەش دەریدەخات گڕكانێك لەو چیایە ئامادەیە بۆ هەڵپژاندن.


(سوانتیكا) ئەوەشی ڕوونكردۆتەوە، كە كەس ناتوانێت ئەوە دیاری بكات كە كەی ئەو گڕكانە هەڵدەپژێت و وتیشی: ڕەنگە ئەو گڕكانە لەهەر كاتێكدا هەڵپژێت و ڕەنگە بۆ ماوەی چەند ڕۆژێك یان چەند هەفتەیەك بەردەوام بێت.
لەم سەروبەندەشدا لە (9/22) ەوە دەسەڵاتدارانی ئەندۆنۆسیا لەو ناوچەیە ڕێوشوێنی تەواویان گرتۆتەبەر بۆ خۆ ئامادەكردن بۆ ئەو گڕكانە.


چاڵاك بوونی ئەو گڕكانە وایكردووە كە نزیكەی (122) هەزار كەس لە ترسی نزیكبوونەوەی هەڵپژانی گڕكانەكەی چیای (ئاگۆنگ) لە دوورگەی بالێ كە ناوچەیەكی گەشتیارییە، پەنا بەرنە بەر ئەو شوێنانەی كە ئامادەكراوەو هەندێكیشیان ڕوویان كردۆتە دامەزراوە حكومییەكان و یاریگاكان.


گڕكانی چیای (ئاگۆنگ) لە سەدەی ڕابردوودا چاڵاكییەكی گەورەی بە خۆیەوە بینی و لەساڵی (1963) دا هەڵپژاو ماوەی ساڵێكی تەواوی خایاندو بەهۆیەوە نزیكەی (1200) كەس گیانیان لە دەستدا.

كوردستانی نوێ‌

 

ئـ . كـ