گرانترین ئاهەنگی هاوسەرگیری لەجیهان لەهیندستانە

14/12/2018 - 09:05 بڵاوکراوەتەوە لە هەواڵ/هەمەڕەنگ

 

 

لە وڵاتی هیندستان ئاهەنگی هاوسەرگیری كچە بازرگانێك ماوەی پێنج رۆژ دەخایەنێت و تێچووی ئاهەنگەكەش نزیكەی (100) ملیۆن دۆلار دەبێت.

بەپێی هەواڵێكی ماڵپەری (بلۆمبێرگ)، ئاهەنگی هاوسەرگیری نێوان (ئیشا) كچی گەورە بازرگانی هیندستانی (موكیش ئەمبانی) و بازرگانێكی ناسراوی هیندستان بە ناوی (ئاناند بیرمال) ماوەی پێنج رۆژ دەخایەنێت و پێشبینی دەكرێت ببێتە گرانترین ئاهەنگی هاوسەرگیری لە هەموو جیهان كە تێچووەكەی نزیكەی (100) ملیۆن دۆلاری ئەمریكی دەبێت.

ئەم ئاهەنگە لە دوو شاری گەورەی هیندستان ئەنجام دەدرێت كە ژمارەیەك لە سیاسەتمەدارو گۆرانیبێژی بەناوبانگ داوەتكراون كە لە نێویاندا (هیلاری كلینتۆن) وەزیری پێشووی دەرەوەی ئەمریكا هەیە، لە ئاهەنگەكەدا گۆرانیبێژی ناوداری جیهان (بینوسیە) بۆ ماوەی (45) خولەك گۆرانی دەڵێت.

بەپێی هەواڵێكی كەی تی ڤی، (ئیشا) لە ئێستادا تەمەنی (27) ساڵەو كچی گەورە بازرگانی هیندستانی (موكیش ئەمبانی) یە كە سەروەت و سامانەكەی (47) ملیار دۆلاری ئەمریكییە.

 

 

ئـ . كـ