فیتەری ژنان لەنێوان خواست و كۆمەڵگەدا

14/12/2018 - 09:57 بڵاوکراوەتەوە لە هەواڵ/هەمەڕەنگ

 

 

كاری فیتەری بە پێی كلتوری كۆمەڵگە بۆ پیاو دانراوە، بەڵام سۆزان ئەو كلتورەی بە ئیرادەی خۆی تێكشكاندووەو (18) ساڵە لە سلێمانیدا فیتەری دەكات، داواش دەكات شوێنێكی بۆ بكرێتەوەو ژنانی دیكە فێری پیشەكە بكات.

وەرشەی ئالان، دەكەوێتە نزیك پێشانگایەكی فرۆشتنی ئۆتۆمبێلەوە كە پێی دەوترێت مەعرەزی علوجەكان و دەكەوێتە سەر ڕێگەی تاسڵوجە – سلێمانی، (سۆزان ڕەفیق) هاوڕێ لەگەڵ بنەماڵەكەیدا ماوەی (18) ساڵە كاری چاككردنەوەی ئۆتۆمبێل لە وەرشەكەدا دەكات و توانیویەتی بەهۆی وردبوونی لە كارەكەی شوێن پەنجەی خۆی دیاریی بكات و نازناوی وەستا سۆزان لە ناو سلێمانیدا تۆمار بكات.

سۆزان تەمەنی (24) ساڵەو دەرچووی كۆلێژی زمان بەشی عەرەبییە، كە ماوەی (18) ساڵە لەگەڵ باوك و براكەیدا لە پاڵ خوێندنەكەی سەرقاڵە بەم كارەوەو لە دوكانەكەدا ڕۆڵێكی باش دەبینێت و ڕۆژانە دوو تا سێ ئۆتۆمبێل چاك دەكاتەوە.

ئەم ژنە فیتەرە هۆكاری كاركردنی لەم بوارەدا دەگەڕێنێتەوە بۆ پاڵپشتییەكانی باوكی و حەزی خۆی كە هەر لە منداڵییەوە تامەزرۆی بۆ ئەم كارە هەبووەو لە تەمەنی (6) ساڵییەوە بەردەستی باوكی كردووە، ئەگەرچی ڕۆژانە دێتە شوێنی كاركردن و زەحمەتی و ماندووبوونی جەستەیی زۆر دەبینێت، بەڵام بە خۆشەویستییەوە لە كارەكەی دەڕوانێت و هەر ئەمەشە وایكردووە كە لای هەمووان بە هۆی ڕێكوپێك كاركردنی دیار بێت و چەندین سەردانیكەری تایبەتی هەبێت.

ناوبراو لەگەڵ برا گەورەكەی ئالان و خوشكەكەی سازان كە زیاتر كاری كارەبایی دەكات، ئەو دووكانە بەڕێوە دەبەن و باوكیشیان كە مامۆستای سەرەكییانە لە ساڵدا تەنیا چەند ڕۆژێك سەردانیان دەكات، وەك خۆیان دەڵێن، هەر لەسەرەتاوە باوكی پەروەردەی كردوون كە تەنها پەیوەستبن بە ئیرادەی خۆیانەوەو لەسەر پێی خۆیان بووەستن.

ئەم ژنە گەنجە شارەزاییەكی باشی لە ناسینەوەی كەلوپەلی ئۆتۆمبێلدا هەیەو زۆر جار لەگەڵ باوكی دەچنە بەغداو ئیمارات بۆ هێنانی كەرەستەكانی تایبەت بەو پیشەیە.

سۆزان لە بارەی كارەكەیی و تێروانینی كۆمەڵگە بۆی، بۆ ڕۆژنیوز وتی: لە تەمەنێكی كەم و بە خولیایەكی زۆرەوە دەستم بەم كارە كردووەو باوكم هاندەری سەرەكی بووە بۆ هەر یەك لە ئێمە، ئەگەرچی كۆمەڵگە ئەم جۆرە كارانە بۆ ژن ڕەتدەكاتەوە، بەڵام بە پێچەوانەوە بە ئیرادەوە بەردەوامم، چونكە ئەگەر ترس و بێ ئیرادەیی نەبێت ئەوا سەركەوتنت هەر دەسەلـمێنرێت و هەر ئەو خەڵكە دێن و دەستخۆشیت لێدەكەن، بێگومان مامەڵەكردنی خەڵكیش لەو چوارچێوەیەدا زۆر باشە لەگەڵمان.

سۆزان لە ناو قسەكانیدا داوایەكی ئاڕاستەی حكومەت كرد، كە شوێنێكی بۆ بكاتەوە بۆ ئەوەی كۆمەڵێك ژن لەسەر دەستی ئەو فێرببن، تا ئەم كلتورە دەستكردەو بە كەم سەیركردنی ژنان بڕەوەێتەوە و ژنانیش بتوانن ئەو كارانە بكەن كە خوازیارین.

بنەماڵەی سۆزان جگە لەپیشەكەیان كە سەرچاوەی سەرەكی ژیانیانە، هەموویان وەك ئەندامی خۆبەخش لە ڕیكخراوی كوردستانێكی سەوزدا كە تایبەتە بە پاراستنی ژینگە ئەندامن، هەر كات هەر هەڵمەتێك كە بۆ ژینگە ئەنجام بدرێت لە گەورە تا بچووك ڕۆڵیان دەبێت تێیدا.

 

 

ئـ . كـ