كۆتایی سەدەی 22 رووداوێك بەسەر زەوی دێت !!

17/12/2018 - 08:41 بڵاوکراوەتەوە لە هەواڵ/هەمەڕەنگ

 

 

زاناكانی ناسا ڕایانگەیاند، سەتەلایتی ئاسامانی (ئۆسیریس ریكس) پێكهاتەی ئاوی لەسەر هەسارەی پچووكی (پینۆ) دۆزیوەتەوە كە هێندەی باڵەخانەی نهۆم بەرزەكانە، لەوانەیە بەڵگە لەسەر دروستبوونی ژیان لەسەر زەوی بخاتە بەردەست.

سەتەلایتی (ئۆسیریس ریكس) كە لە هەفتەی ڕابردوودا گەشتە نزیك هەسارەی پینۆ لەدووری (19) كیلۆمەتر، ئەوەی (2.25) ملیۆن كیلۆمەتر لە زەوییەوە دوورە، وردیلەی هایدرۆجین و ئۆكسجینی تۆماركردووە، كە بەشێكن لە پێكهاتەی ئاو، كە بنەمای ژیانەو ئەگەری بوونی لەسەر ئەو هەسارە بەردینەیە هەیە.

سەتەلایەتەكە لە ساڵی (2016) دا بۆ ئەركێك بۆ واڵایی هەڵدرا، بۆ بەدەستهێنانی نموونەی خاكی ئەو هەسارەیە بۆ زەوی بۆ توێژینەوە لەسەری، هەسارەی بچووكی پینۆ كە (500) مەتر پانە بەدەوری خۆردا دەسوورێتەوە لەدووری هەمان دووری نێوان خۆرو زەویە، زاناكان مەترسیان هەیە لەئەگەری پێكدادانی ئەو هەسارەیە لەگەڵ زەویدا لە كۆتایی سەدەی (22) دا.

(دانتی لۆریتا) زانای تایبەتمەند بەو هەسارەیە لە زانكۆی ئەریزۆناو توێژەری سەرەكی لەئەركی سەتەلایتی (ئۆسیریس ریكس)، ووتی : كانزامان بەدی كرد لەسەر هەسارەكە ئاوی تێدایە هاوشێوەی ئەوانەی پێشتر دۆزراونەتەوە لەسەر زەوی.

هەسارە بچووكە بەردینەكان پاشماوەی كۆمەڵی خۆرە كە (4.5) ملیار ساڵ لەمەوبەر دروستبووە، زاناكان لەو باوەڕەدان پێكدادانی هەسارە بەردینەكان و كلكدارەكان لەگەڵ زەویدا لەسەرەتادا بەبوونی ئاو، بۆتە هۆی دروستبوونی پێكهاتەی زیندەوەرو سەرەتاكانی ژیان، هەروەها بەدەستهێنانی نموونە لەو هەسارەیە وەڵامی پرسیارەكان دەداتەوە كە ڕەنگە پشتیوانی ئەو ئەگەرە بكات.

 

 

ئـ . كـ