مەلای مەشهور كێیە ؟؟

یەک شەممە, 06 کانونی دووەم 2019 05:53

 

 

ڕۆژنیە ئێمەی كورد لە كۆڕو مەجلیس و یادو بۆنە جۆراو جۆرەكان باس و خواسی مەلای مەشهور نەكەین یان نووكتە بە تامو لەزەتەكانی نەگێڕینەوە بێ ئەوەی بزانین ئەو كەسایەتیە واقیعیە یان خەیاڵ و دروستكراوە، دیارە نەك ئێمە بەڵكو میللەتانی دیكەش ئەو جۆرە كەسایەتیانەی هەیە بۆ نموونە عەرەب پێی دەڵێن (جوحا) تورك پێی دەڵێن (مەلا نەسرەددین) و ... هتد، بۆیە بەپێی ئەو قسانە بێ دیارە كەسایەتیەكی لەو شێوەیە كە لە كۆندا بوونی هەبووە، بۆیە هەر میللەتێك بۆ خۆی ڕایدەكێشێ و فەخرو شانازی پێوە دەكات، هەر بۆ وەبیرهێنانەوەش ماوەیەك لەمەوبەر برای ڕۆژنامەنووسی بە ئەزموون (عەبدولڕەحمان پاشا) گۆڤاری خنجیلانە و پێكەنیناوی بە ناوی (مەلا مەشهور) دەردەكرد، بەڵام بەداخەوە چەند ژمارەیەكی لێ دەرچوو، پاشان لەبەر بارودۆخی دارایی ئەو كات وەستا، بەو ئومێدەی جارێكی دیكەو بە نەفەسێكی دیكەوە بكەوێتەوە كار تا ناوی (مەلا مەشهور) ون نەبێت، جا لە هەمووی سەیرتر زۆر بەیت و بالۆرە سەبارەت بەو مرۆڤە لە نێو كوردا بوونی هەیەو دەستاو دەست بۆ یەكتری دەیگێڕنەوە ئەویش ئەوەیە دەڵێن، هەر كەسێك تەنیا ناوی (مەلا مەشهور) بهێنێ دەبێ حەوت نووكتەی ئەو بگێڕێتەوە، ئەگینا ئەو جنوێكی بەو كەسە داوە كە لەو بارەوە بێدەنگی هەڵدەبژێرێ.

 

 

ئـ . كـ