ئۆباما پیرۆزبایی مانگی رەمەزان لەموسڵمانان دەكات

07/06/2016 - 09:02 بڵاوکراوەتەوە لە هەواڵ/گشتی

 

 

 

باراك ئۆباماو میشێل ئۆبامای هاوسەری بەبۆنەی هاتنی مانگی ڕەمەزان پـیرۆزبایی لە موسڵمانان دەكەن لە ئەمریكاو جیهاندا.
لەبەیانـنامەیەكدا، (باراك ئۆباما) سەرۆكی ئەمریكا نووسیویەتی، بەختەوەرە بە بوونی كۆمەڵە موسڵمانە جۆراوجۆرەكان تێیدا بە هاوشێوەی جۆراوجۆریەتی خودی ووڵاتەكە.
باسیشی لەوەكردووە، ئەمریكـییەكان یەك خێزانن و ئەو بە توندی لە پاڵ كۆمەڵگە موسڵمانەكان دەوەستێت ئەوانەی بە ڕووی ئەو دەنگانە دەوەستنەوە كە دەیانەوێت ئەمریكیـیەكان دابەش بكەن یان سنوور بۆ ئازادیـیە ئاینی و سیڤیلیـیەكان دابنێن.
جەختی لەوەش كردۆتەوە كە پابەندە بە پاراستنی مافە سیڤیلیـیەكان بۆ هەموو ئەمریكیـیەكان بە دەر لەوەی چ ئاین و ڕوخسارێـكیان هەیە.
(باراك ئۆباما) لەبەیاننامەكەیدا دەڵێت، ناكرێت لەم مانگەدا ئەو ملیۆنان كەسە لە یادبكەین كە بەهۆی شەڕو قەیرانەوە لە سەرانسەری جیهان ئاوارەبوون، باسیشی لەوەكردووە: ژمارەیەكی زۆر لە موسڵمانان ڕەنگە ئەمساڵ نەتوانن بە هێمنی لە ماڵەكانیان مانگی ڕەمەزان بەسەربەرن یان جەژن بكەنەوە لەگەڵ منداڵەكانیان، بۆیە دەبێت كاربكەین بۆ كەمكردنەوەی مەینەتی ئەو كەسانە، ئۆباما ئاماژە بەوەشدەدات كە ئەم مانگە پـیرۆزە پابەندبوونی خۆمان بیردەخاتەوە بۆ پاراستنی شكۆمەندی هەموو تاكە كەسێـك، وتیشی : ئەمریكا بەردەوام دەبێت لە پـێشوازیكردن لە كۆچبەرو پەنابەران بە موسڵمانەكانیشەوە.
لە كۆتاییدا سەرۆكی ئەمریكا وتی : وەكو هەموو ساڵێـك كە لە ماوەی سەرۆكایەتی دەرگاكانی كۆشـكی سپـی بە ڕووی موسڵمانە ئەمریكیـیەكان كردۆتەوە، ئەمساڵیش بە هەمان شێوە لە كۆتایی مانگی ڕەمەزاندا ئاهەنگ بەو بۆنەیەوە دەگێڕن.