دوایین قسەی ئەمریكا لەسەر چارەنوسی ئەبوبەكر بەغدادی

11/06/2016 - 17:01 بڵاوکراوەتەوە لە هەواڵ/گشتی

 

ئیدارەی ئەمریكا بانگەشەكانی برینداربوونی سەرۆكی رێكخراوی تیرۆریستیی داعش ئەبووبەكر بەغدادی لە هێرشێكی ئاسمانیی هێزەكانی هاوپەیماناندا، پشتڕاست نەكردەوە.

نوێنەری تایبەتیی سەرۆكی ئەمریكا باراك ئۆباما بۆ هاوپەیمانیی نێودەوڵەتی دژی داعش، برێت ماكگۆرك، بەشداری لە كۆنگرەی رۆژنامەنووسیی كۆشكی سپیدا كرد و زانیاریی سەبارەت بە ئۆپەراسیۆنەكان خستەڕوو.

ماكگۆرك ئاماژەی بەوە كرد هێزەكانی هاوپەیمانان هێرشەكانیان بۆ سەر خاڵە ناوەندییەكانی داعش لە سووریا و عێراق چڕكردووەتەوە و بەو هۆیەشەوە ورەی رێكخراوەكە دەستی بە داڕووخان كردووە.

برێت ماكگۆرك رایگەیاند: ''لە كرۆكی داعش زیاتر نزیك دەبینەوە'' و شاری رەققەی سووریا گەمارۆ دراوە كە رێكخراوەكە وەك بەناو پایتەخت رایگەیاندبوو.

راشیگەیاند: ''هەر سێ رۆژ جارێك سەركردەیەكی باڵا یان مامناوەندییان لێ دەكوژین و تەنها لەماوەی چەند مانگی رابردوودا ١٠٠ سەركردەی داعشمان لەناو بردوون''.

سەبارەت بە بانگەشەكانی برینداربوونی سەرۆكی داعش ئەبووبەكر بەغدادی لە هێرشێكی ئاسمانیی هێزەكانی هاوپەیماناندا، ماكگۆرك سەرنجی بۆ ئەوە راكێشا كە ماوەی ساڵێكە بەغدادی لە هیچ شوێنێك نەبینراوە، ئەو زیاتر وتی: "بەڵام پێمان وایە كە هێشتا لە ژیاندایە" و كوشتنیشی ''ئەگەری هەیە لەهەر ساتێكدا روو بدات''.

نوێنەری تایبەتیی سەرۆكی ئەمریكا بۆ هاوپەیمانیی نێودەوڵەتی دژی داعش، جەختی لەوە كردەوە داعش توانای پێشووی لەدەست داوە، لە عێراق لەسەدا ٥٠ و لە سووریاش لەسەدا ٢٠ی ئەو ناوچانەی كە بەدەستییەوە بوون، لەدەست داوە.

باسی لەوەشكرد ''ورەی چەكدارەكان روو لە داڕووخانە'' و داعش چەكدارەكانی گوللـەباران دەكات.

برێت ماكگۆرك ئاشكرای كرد دابەزینێكی بەرچاو لە ژمارەی ئەو چەكدارە بیانییانەدا بوونی هەیە كە پەیوەندی بە رێكخراوەكەوە دەكەن و گوتی: ''كاتێك سەیری ژمارەی چەكدارە بیانییەكان لە هاوینی ساڵی ٢٠١٤دا لە نێو داعش دەكەین، ئەوكاتە ژمارەیان بە ٣١ هەزار دەخەمڵێنرا. ئێستا كەمترە، بگرە لە ئێستادا لە نزمترین ئاستدایە. دیاریكردنی ژمارەیەك زۆر قورسە بەڵام پێمان وایە ١٩ بۆ ٢٥ هەزار چەكدارن و ئەم ژمارەیە بەشێوەیەكی خێرا روو لە دابەزینە''.

ماكگۆرك باسی لەوەشكرد یەكێك لە هۆكارەكانی كەمبوونەوەی پەیوەندیكردنی چەكدارە بیانییەكان بە داعشەوە، ئەو رێ و شوێنانەیە كە توركیا لەسەر سنوورەكانی وڵاتەكەی گرتوونیەتییە بەر و گوتی: ''توركیا كاری باشی ئەنجام دا لە رێگەی ئەو رێ و شوێنانەی لەسەر سنوور گرتنیەبەر و بووە هۆی داخرانی ناوچەكە''.


م. كانی


س: ئانادۆڵۆ