د. عەلی قەرەداغی: ئەمە بەجیهانی بوونە لە ناشرینترین وێنەیدا

23/08/2016 - 17:12 بڵاوکراوەتەوە لە هەواڵ/گشتی
 
كوردیو - هەولێر
 
دكتۆر عەلی قەرەداغی ئەمینداری گشتی یەكێتی جیهانی زانایانی مسوڵمان زۆر بەتوندی ئیدانەی ئەو دەوڵەتانەی كرد كە هاوكاری روسیا دەكەن و ئاسانكاری بۆ فڕۆكە جەنگیەكان دەكەن، كە بۆردومانی هاوڵاتیانی مەدەنی و بێ تاوان بكات لە سوریاداو ئەمەی وەسف كرد بە (بە جیهانی بوون لە ناشرینترین وێنەیدا) .
 
دكتۆر قەرەداغی لە لاپەڕەی خۆی لە تۆڕی كۆمەڵایەتی (تویتەر)دا نوسیویەتی و دەڵێت : فڕۆكە جەنگیەكانی ڕوسیا لە فڕۆكەخانەی هەمەدان لە ئێران، لە وێوە بە ئاسمانی عێراقدا تێ دەپەڕن، بۆ ئەوەی بۆردومانی ئامانجەكانیان بكەن لە سوریا، ئەویش بە بەرچاوی ئەمەریكاو بە پیرۆزبایی ئەوبوو ، ئەمەیە بە جیهانی بوون لە خراپرتین و ناشرینترین وێنەیدا .
 
سێرگی لافرۆف وەزیری دەرەوەی ڕوسیاش ووتی :ئەوقسەیە هیچ بنەمایەكی نیە كە دەڵێن بەكارهێنانی فڕۆكەخانەكانی ئێران بۆ بۆردومانی سوریا پێشێل كردنی بڕیاری ئەنجومەنی ئاسایشی ژمارە (2231)ە ،پاشان ووتی هەستانی فڕۆكەكانی ڕوسیا لە فڕۆكەخانەكانی ئێران لە چوارچێوەی پڕۆسەی لەناوبردنی تیرۆرە.
 
بەپێی بڕیاری 2231 نابێت نە هاوكاری نە ڕێگە بدرێت هیچ فڕۆكەیەكی جەنگی بە ئێران بفرۆشێت، ئەمەریكاش ووتی: لێكۆڵینەوە لەو بابەتە دەكات، كە ئایا ئەمە پێشێل كردنی بڕیارەكەی ئەنجومەنی ئاسایشە یان نا .
 
شایەنی باسە چەند ڕۆژێكە فڕۆكەكانی ڕوسیا لە جۆری سیخۆ -34- كە لە فڕۆكەخانەی هەمەدان نیشتۆتەوە، بە بەردەوامی بۆردومانی شارەكانی سوریا دەكەن و بەشی زۆریشیان بۆ سەر خەڵكی مەدەنی و ئۆپۆزسیۆنی سوریایە .
 
م. كانی