ترامپ ستایشی بن سەلـمان دەكات

29/06/2019 - 09:51 بڵاوکراوەتەوە لە هەواڵ/گشتی

 

 

سەرۆكی ئەمریكا لە دووەم رۆژی كۆبوونەوەی لووتكەی G-20 لەگەڵ شازادەی جێنشینی سعودییە كۆبوویەوەو تاووتوێی دۆسیەی ئێران و چەند پرسێكی تریان پەیوەست بە خۆرهەڵاتی ناوەڕاست كرد.

لە كۆبوونەوەكەیاندا لە دووەم رۆژی كۆبوونەوەی لووتكەی G-20 لە شاری ئۆساكای ژاپۆن، (دۆناڵد ترامپ) سەرۆكی ئەمریكا ستایشی (موحەمەد بن سەلـمان) ی كردووە لە پای ئەو گۆڕانكارییانەی لەم چەند ساڵەی دواییدا لەلایەنی مافەكانی مرۆڤ و رۆڵی ژنان لە سعودیە كردوویەتی.

ترامپ لە كۆبوونەوەكەدا بە (موحەمەد بن سەلـمان) ی وتووە: كارێكی باشت كردووە.

كۆشكی سپی لە راگەیەندراوێكیدا ناوەڕۆكی كۆبوونەوەكەی ترامپی لەگەڵ بن سەلـمان ئاشكراكردووە، بەپێی راگەیەندراوەكە، لە كۆبوونەوەكە باس لە رۆڵی سعودییە كراوە لە پاراستنی ئاسایشی خۆرهەڵاتی ناوەڕاست و بازاڕی جیهانی نەوت و بەرەنگاربوونەوەی هەڕەشەكانی ئێران.

ترامپ جەختی لە بەردەوامبوونی پەیوەندییەكانی واشنتۆن و ریاز كردووەو ئاماژەی بەوەش كردووە، كە سعودییە لە بەرەنگاربوونەوەی تیرۆر رۆڵێكی گرنگ دەبینێت، راشیگەیاندووە: هاوكارییە ئابوورییەكانی واشنتۆن و ریاز نزیكەی ملیۆنێك هەلی كاری لە ئەمریكا رەخساندووە.

هەروەها ترامپ خۆشحاڵی خۆی بۆ حكومەتی سعودییە دەربڕیوە لەبەردەوام بوونی كڕینی چەك و جبەخانەی ئەمریكی.