ترامپ : بەم زوانە سزای بەسەر ئێران دەسەپێنین

11/07/2019 - 08:45 بڵاوکراوەتەوە لە هەواڵ/گشتی

 

 

سەرۆكی ئەمریكا، ئێرانی تۆمەتبار كرد بەوەی ماوەیەكی زۆرە بەشێوەیەكی نهێنی یۆرانیۆم دەپیتینێت و هۆشیاریدا لەوەی سزاكانی وڵاتەكەی بەمزووانەو بەشێوەیەكی ئێجگار زۆر زیاد دەبن، ئەمەش لەكاتێكدا ڕێكخراوێكی سەر بە نەتەوە یەكگرتووەكان كۆبوونەوەیەكی بەپەلەی ساز كرد سەبارەت بە پێشێلكارییەكانی ئێران لە ڕێكەوتنە ناوەكییەكەدا.

(دۆناڵد ترامپ) سەرۆكی ئەمریكا وتی، هەمیشە ئێران بە نهێنی یۆرانیۆمی پیتاندووەو بەتەواوەتی ڕێكەوتنە ناوەكییە خراپەكەی پێشێلكردووە كە وەزیری دەرەوەی پێشووی ئەمریكا (جۆن كێری) و بەڕێوبەرایەتیەكەی سەرۆكی پێشوو (باراك ئۆباما) واژۆیان كردووە، بیرتان بێت ماوەی ئەم ڕێكەوتنە لەماوەی چەند ساڵێكی كەمدا بەسەردەچێت، سزاكان بەمزووانەو بەشێوەیەكی ئێجگار زۆر زیاد دەبن.

لەلایەكی دیكەوە نوێنەری ئێران لە دەزگای وزەی ئەتۆمی نێودەوڵەتی (كازم غەریب ئابادی) وتی: هەموو چاڵاكییە ناوەكییەكانی ئێران لەژێر چاودێری دەزگای وزەی ئەتۆمیدایە.

كازم دوای كۆبوونەوە بەپەلەكەی ئەنجوومەنی پارێزگارانی دەزگاكە وەكو وەڵامێك بۆ ترامپ بە ڕۆژنامەنووسانی وت : هیچ شتێكمان نیە بیشارینەوە.