ئەمریكاو ئیسرائیل باس لە سزادانی زیاتری ئێران دەكەن

12/07/2019 - 07:09 بڵاوکراوەتەوە لە هەواڵ/گشتی

 

 

كۆشكی سپی رایگەیاند، سەرۆكی ئەمریكا لەڕێگەی پەیوەندییەكی تەلەفۆنییەوە لەگەڵ سەرۆك وەزیرانی ئیسرائیلدا باسیان لە دۆسییەی ئێران كردووە، ئەمەش دوای ئەوەی لە هەمان ڕۆژدا ترامپ هەڕەشەی زیادكردنی سزاكانی سەر تارانی كرد بەشێوەیەكی ئێجگار زۆر.

لەمدواییانەدا ئێران دەستی كردووە بە پیتاندنی یۆرانیۆم بۆ زیاتر لەو ڕێژەیەی كە ڕێكەوتنە ناوەكییەكە بۆی دیاریكردووە، ساڵی ڕابردوو ترامپ بڕیاریدا لە ڕێكەوتنە ناوەكییەكەی ساڵی 2015 بكشێتەوەو لەو كاتەوە سزا ئابوورییەكانی بۆ سەر ئێران چڕكردۆتەوەو ئەوەش بۆتە هۆی زیادبوونی گرژییەكان لەگەڵ تاراندا.

وتەبێژی كۆشكی سپی وتی، دوو سەرۆكەكە گفتوگۆیان لەسەر هاریكارییەكانی نێوان ئەمریكاو ئیسرائیل كردووەو هەروەها باسیان لە بەهێزكردنی بەرژەوەندییە هاوبەشەكانیان كردووە لەڕووی ئاسایشی نیشتیمانیەوەو بەرپەرچدانەوەی چاڵاكییە خراپەكانی ئێران لە ناوچەكەدا.

ئۆفیسی نەتنیاهۆ ئاماژەی بەوەدا دوو سەرۆكەكە باسیان لە دوایین ئاگاداركردنەوەی ترامپ كردووە سەبارەت بە زیادكردنی سزاكانی سەر ئێران.

ئۆفیسی نەتنیاهۆ لە بەیاننامەیەكدا وتویەتی، سەرۆك وەزیری ئیسرائیل پێزانینی خۆی دەربڕیوە بۆ سووربوونی ترامپ لە زیادكردنی سزاكانی سەر ئێراندا.