ئەمریكا داوا لە سعودیە دەكات نوسەرێكی ڕەخنەگر لە ئیسلام ئازاد بكات

19/07/2019 - 09:41 بڵاوکراوەتەوە لە هەواڵ/گشتی

 

 

وێڕای بەرتەسك كردنەوەی ئازادییەكان و دەستگیركردنی دەیان گەورە بانگخواز، جێگری سەرۆكی ئەمریكا ڕەخنەی توندی لە سعودییە گرت سەبارەت بە كۆتوبەند خستنەسەر ئازادی ئایینی و داوای لێكردووە (ڕائیف بەدەوی) نوسەر ئازاد بكات كە بەهۆی ڕەخنەگرتنەوە لە ئیسلام زیندانی كراوە.

(مایك پێنس) جێگری سەرۆكی ئەمریكا لە كۆنگرەیەكدا سەبارەت بە ئازادی ئایینی لە وەزارەتی دەرەوەی ئەمریكا ئاماژەی بە دەستگیركردنی ئەو كەسانەدا كە ڕەخنە لە ئیسلام دەگرن لە هەریەك لە وڵاتەكانی مۆریتانیاو پاكستان و سعودییە.

پێنس وتی: سەرەڕای ئەو فشارە زۆرەی دەخرێتە سەریان، هەموو ئەوانە بە توندی بەرگرییان لە ئازادی ئایینی كردووە، گەلی ئەمریكا لە پاڵیانن، ئەمریكا داوا لە حكومەتەكانی ئەریتریاو مۆریتانیاو پاكستان و سعودییە دەكات ڕێز لە ئازادی بیروباوەڕی ئایینی بگرن و ئەو پیاوانە ئازاد بكەن.

ئەم لێدوانانەی پێنس سەبارەت بە بەدەوی هاوكاتە لەگەڵ هەوڵەكانی كۆنگرێسی ئەمریكا تاوەكو بەڕێوبەرایەتیەكەی ترامپ تۆمەتبار بكەن بەوەی هیچ هەنگاوێكی نەناوە دژی ڕابەرانی سعودییە دوای كوژرانی ڕۆژنامەنووسی سعودی (جەمال خاشقچی) لە ناو كونسوڵخانەی سعودیەدا لە ئیستەنبوڵ.

نوێنەرانی دیموكراتەكان و كۆمارییەكان لە ئەمریكا هەوڵەكانیان چڕكردەوە تاوەكو ڕێگە نەدەن ئەمریكا چەك بە سعودییە بفرۆشێت، ئەمەش بەهۆی ئەوەوە كە بەڵگەكان ئاماژە بەوە دەدەن شازادەی جێنشینی سعودیە (موحەمەد بن سەلـمان) دەستی هەبووە لە دۆسیەكەی خاشقچیدا، هەروەها هۆكارێكی دیكە بۆ ئەوە زیادبوونی كوژرانی هاوڵاتیانی مەدەنییە بەهۆی هێرشە ئاسمانییەكانی سعودییەو هاوپەیمانەكانی لە یەمەن.

بەرپرسانی سعودی لە ساڵی (2012) دا بەدەویان دەستگیركرد كە ماڵپەڕێكی ئەلیكترۆنی بە ناوی (تۆڕی لیبڕاڵی سعودی) ەوە دامەزراندو بەتۆمەتی ئەنجامدانی تاوانی ئەلیكترۆنی تۆمەتباركرا.