ئەمریكا گەمارۆی نوێ‌ دەخاتە سەر ئێران

19/07/2019 - 10:47 بڵاوکراوەتەوە لە هەواڵ/گشتی

 

 

ئەمریكا تۆڕیك لە كۆمپانیا نێودەوڵەتییەكانی ئێرانی خستە لیستی گەمارۆكانییەوە لەبەر ئەوەی پەیوەندییان لەگەڵ بەرنامەی ئەتۆمی ئێران هەیە، هەروەها پێنج كەسی پەیوەندیدار بەو كۆمپانیایانەوە خستە لیستی گەمارۆكانەوە.

دوێنێ وەزارەتی خەزێنەی ئەمریكا لە ڕاگەیەندراوێكی فەرمیدا پێج كەس و چەندین كۆمپانیای پەیوەندیدار بە بەرنامە ئەتۆمییەكەی ئێرانی خستە لیستی گەمارۆكانی خۆیەوە كە بەشداربوون لە بەرنامەی ئەتۆمی ئێران.

لەناو ئەو لیستەدا ناوی كۆمپانیاكانی (باختەر رەعد سپاهان) و (دابینكردنی كاڵای سەوز)، دەبینرێن، كە وەزارەتی خەزێنەی ئەمریكا دەڵێت: ئەم دوو كۆمپانیایە لە ڕێگەی دەڵاڵەكانی خۆیانەوە لە وڵاتانی بەلجیكاو چین ئەلەمینیۆمیان بۆ كۆمپانیای سانتریفیوژەكانی ئێران كڕیوە، لەسەر ئەو پێنج كەسەش گەمارۆیان خراوەتە سەر وتراوە كە بەرپرسانی ئەو كۆمپانیانەن. 

بەپێ ڕاگەیەندراوەكەی وەزارەتی خەزێنەی ئەمریكا، ئەم كارە بۆ ئەوەیە، كە ئێران دەستی نەگات بە كەرەستەی پێویست بۆ بەرنامە ئەتۆمییەكەی.