ئەمڕۆ ئەنجوومەنی ئاسایش بۆ كشمیر كۆدەبێتەوە

16/08/2019 - 11:29 بڵاوکراوەتەوە لە هەواڵ/گشتی

 

 

دیبلۆماتكاران وتیان وابڕیارە ئەمڕۆ ئەنجوومەنی ئاسایشی نێودەوڵەتی سەر بە نەتەوە یەكگرتووەكان لەسەر داوای چین و پاكستان كۆبوونەوەیەكی داخراو ئەنجام بدەن بۆ وتوێژكردن لەسە ڕێوشوێنەكانی هیندستان لە كشمیر كە تێیدا ڕەوشی تایبەتی هەرێمەكەی هەڵوەشاندۆتەوە.

هەمیشە كشمیر سەرچاوەی گرژییەكانی نێوان هیندستان و پاكستان بووە كە هەردووكیان خاوەنی چەكی ناوەكین، پێدەچێت ئەنجوومەنەكە كە لە (15) ئەندام پێكهاتووە هیچ جووڵەیەك نەكات، چونكە ئەمریكا هەمیشە پشتیوانی لە هیندستان دەكات و چینیش لە پاكستان.

وەزیری دەرەوەی پاكستان (شا مەسعود قوڕەیشی) لە ئەنجوومەنی ئاساییشی نێودەوڵەتی وتی، پاكستان نابێتە هۆكاری هەڵگیرسانی شەڕ، بەڵام هیندستان دەبێت بزانێت ئەم دان بەخۆدا گرتنەی پاكستان لاوازی نیە.

وتیشی: ئەگەر هیندستان بڕیار بدات دووبارە پەنا بۆ هێز بەرێت ئەوا پاكستان ناچار دەبێت بە هەموو تواناكانیەوە، وەڵام بداتەوەو بەرگری لە خۆی بكات.

سكرتێری گشتی نەتەوە یەكگرتووەكان (ئەنتۆنیۆ گۆتیرێش) داوای لە هیندستان و پاكستان كرد خۆیان بەدووربگرن لە هەر هەنگاوێك كە كار بكاتە سەر ڕەوشی تایبەتی كشمیرو جامۆ، هەروەها نیگەرانی خۆشی دەربڕی سەبارەت بە هەواڵی ئەوەی كۆتوبەند سەپێندراوە بەسەر بەشێكی كشمیردا.