لە ئیدلب شەڕ راوەستا

01/09/2019 - 10:56 بڵاوکراوەتەوە لە هەواڵ/گشتی

 

 

پاش ئەوەی ڕووسیا ئاگربەستی لە هەرێمی بێچەك ڕاگەیاند، ڕژێمی سوریاش ڕەزامەندی لەسەر ئاگربەست نیشاندا، لەكاتێكدا ئاگربەستی پێشوو تەمەنی كورت بوو.

ئاژانسی هەواڵی فەرمی (سانا) لەزاری سەرچاوەیەكی نزیك لە سەربازی سوپای ڕژێم ئاشكرایكرد، ئاگربەست لە هەرێمی بێچەك لەئیدلب ڕەزامەندی لەسەر درا، هەروەها مافی وەڵامدانەوەی هێرشیان هەیە.

پێشتریش ڕووسیا ڕایگەیاندبوو، ئاگربەست لەلایەن هێزەكانی ڕژێمی سوریاوە لە بەرەبەیانی ئەمڕۆ لەپارێزگای ئیدلب كەلەژێر كۆنتڕۆڵی چەتەكانی سەربە توركیا دایە، جێبەجێ دەكرێت.

ئەمە لەكاتێكدایە هەر لەم مانگەدا، جێگە ستراتیژییەكانی وەكو، خان شێخۆن، ڕێگەی نێودەوڵەتی شام – حەلەب كەماوەی پێنج ساڵ بوو لەدەستی چەتەكاندا بوو، جارێكی تر كەوتنە ژێردەستی ڕژێمی سوریا.

نەتەوە یەكگرتووەكانیش دەڵێت، بە سەدان هەزار كەس لە خەڵكی سوریا لەشوێنەكانیان هەڵهاتوون، بەلایەنی كەمەوە لەئیدلب نزیكەی سێ‌ ملیۆن كەس تێدا دەژین، هەروەها بەلایەنی كەمەوە (500) كەسی مەدەنی تاكو ئێستا كوژراون.

ڕاگەیەندراوە، لەدوای بانگەوازی ناوەندی هاوكاری بۆ دۆخی بەپەلەی سەربە نەتەوە یەگرتووەكان، ئەم ئاگربەستە پێكهاتووە.

لەماوەی ڕابردووشدا چەندین هەوڵ بۆ ئەنجامدانی ئاگربەست دراوە بێ ئەوەی هیچ ئەنجامێكی لێ بكەوێتەوە.

ناوەندی ڕێككەوتنی ڕووسی لەنێوان لایەنەكانی شەڕ لەسوریا لەشەوی (18/4) ی ئەمساڵ ڕایگەیاند، هێزەكانی ڕژێمی سوریا بەشێوەیەكی یەك لایەنە ئاگربەستی ڕاگەیاندووە، بەڵام ئەو ئاگربەستە درێژەی نەكێشاو ڕژێمی سوریا، توركیای بەبەكارهێنانی گروپە چەتەكان لەئیدلب تۆمەتبار كرد، دەرەنجام شەڕ دەستی پێكردەوە.

لەكاتێكدا گەڕی (13) یەمین كۆبوونەوەكانی ئاستانا بەڕێوەدەچوو، لەدووی ئاب هێزەكانی ڕژێم ئاگربەستی یەك لایەنەی ڕاگەیاند، ئەم ئاگربەستەش درێژەی نەكێشاو هێزەكانی ڕژێمی سوریا بەهاوكاری ڕووسیا ئۆپەراسیۆنەكانیان بۆسەر ناوچەكانی ژێر كۆنتڕۆڵی چەكدارەكانی سەربەدەوڵەتی توركیا دەست پێكردەوە.