بەرپرسانی ئەمریكا ئاگاداركراونەتەوە وەتسئەپ بەكارنەهێنن

25/01/2020 - 09:20 بڵاوکراوەتەوە لە هەواڵ/گشتی

 


جێگری وتەبێژی نەتەوە یەكگرتووەكان ڕایدەگەیەنێت: ئەپڵیكەیشنی وەتسئەپ وەك میكانیزمێكی پارێزراو پشتگیریی لێناكرێت و بەو هۆیەوە بەرپرسانی نەتەوە یەكگرتووەكان لە پەیوەندییەكانیاندا ئەو پێگەیە بەكارناهێنن و لە تەممووزی 2019ـەوە بەرپرسانی نەتەوە یەكگرتووەكان ئاگاداركراونەتەوە كە وەتسئەپ بەكارنەهێنن.



بە گوێرەی هەواڵی بەشێك لە ئاژانسە جیهانیەكان، فەرحان حەق جێگری وتەبێژی نەتەوە یەكگرتووەكان ڕایگەیاندووە: بەرپرسانی نەتەوە یەكگرتووەكان ئاگاداركراونەتەوە وەتسئەپ بەكارنەهێنن، چونكە ئەو پێگەیە وەك میكانیزمێكی پارێزراو پشتگیریی لێناكرێت.



ئەو مەترسیەی لەسەر ئەو پێگەیە بەشێكی دەگەڕێتەوە بۆ ئەوەی كە شارەزایان سعودیەیان تۆمەتباركرد بە بەكارهێنانی وەتسئەپ بۆ هاككردنی مۆبایلی جێف بێزۆس سەرۆكی كۆمپانیای ئەمازۆن.



بەشێك لە شارەزایان ئەوەیان خستەڕوو: ئەگەر هەیە محەممەد بن سەلمان شازادەی جێنشینی سعودیە دەستی هەبێت لەو هێرشە ئەلیكترۆنییەی سەر سەرۆكی ئەمازۆن لە ساڵی 2018 و داواشیان كرد بەرپرسانی ئەمریكا راستەوخۆ لێكۆڵینەوە لەسەر ئەو پرسە بكەن.