له‌ كۆتاییدا بریاره‌ گرنگه‌كه‌ له‌ باره‌ی تره‌مپه‌وه‌ ده‌ركرا و ئه‌ویش بریاری خۆی ئاشكرا كرد

06/02/2020 - 09:09 بڵاوکراوەتەوە لە هەواڵ/گشتی

ئەنجومەنی نوێنەرانی ئەمریكا بە زۆرینەی دەنگ دۆناڵد ترەمپی سەرۆكی ئەو وڵاتەی بێبەری كرد لەبارەی ئەو تۆمەتانەی كە سەربارەت بە خراپ بەكارهێنانی دەسەڵات خرابوونە پاڵی.

شەوی رابردوو ئەنجومەنی پیرانی ئەمریكا دوای نزیكەی سێ‌ هەفتە لە دانیشتن و دادگاییكردن، دەنگی لەسەر ئەو دوو تۆمەتە دا كە سەبارەت بە خراپ بەكارهێنانی دەسەڵات و رێگریكردن لە كای كۆنگرێس بۆ لێكۆڵینەوە لە تۆمەتی یەكەم ئاراستەی كرابوون.

لە كاتی دەنگدان لەسەر تۆمەتی یەكەم كە تایبەت بوو بە بەكارهێنانی دەسەڵاتی سەرۆك بۆ فشاركردن لە ئۆكرانیا بۆ كردنەوەی دۆسێی لێكۆڵینەوە لە دژی كوڕەكەی جۆ بایدن كە لەو وڵاتە كاردەكات، 52 ئەندامی كۆمارییەكان بە نەخێر دەنگیان دا، لە بەرامبەر 47 دەنگی دیموكراتەكان، هاوكات میت رۆمنی یەكێك لە سیناتۆرە كۆمارییەكانیش دەنگی بە بەڵێ دا، بەڵام دواجار تۆمەتەكە بە 52 دەنگی نەخێر لەبەرامبەر 48 دەنگی بەڵێ‌ رەتكرایەوە.

سەبارەت بە تۆمەتی دووەمیش كە تایبەت بوو بە رێگریكردن لە كاری كۆنگرێس، ئەنجومەنی پیران بە هەمان رێژەی دەنگی پارتەكان، واتە 53 بە 47 دەنگ، ئەو تۆمەتەشی رەتكردەوە.

بەوەش دۆناڵد ترەمپ لە پۆستەكەی بەردەوام دەبێت تا ئەو كاتەی ماوەی یاسایی خۆی تەواو دەكات.

ئەوەش لە كاتێكدایە مانگی تشرینی دووەمی داهاتوو هەڵبژاردنی نوێی سەرۆكایەتی ئەمریكا دەكرێت و دۆناڵد ترەمپیش وەكو یەكەم سەرۆك كە بۆ لەسەركار لادان دادگایی كرابێت، وەكو كاندیدی كۆمارییەكان بە شداری لە هەڵبژاردن دەكات بۆ بردنەوەی خولی دووەمی سەرۆكایەتییەكەی.

دوای دەرچوونی بڕیارەكەی ئەنجومەنی پیرانیش، ترەمپ وەكو كاردانەوەیەك ڤیدیۆیەكی خۆی لە تویتەر بڵاوكردەوە و تیایدا تەئكید دەكاتەوە كە بە نیاز نیە واز لە سەرۆكایەتی ئەمریكا بهێنێت.