ترامپ بە تووندی هۆشداری بە كۆریای باكوور دەدات

هەینی, 11 ئاب 2017 19:01

 

 

سەرۆكی ئەمریكا هۆشداریـیەكی نوێ و زۆر توندی بە كۆریای باكوور داوە، دەڵێت ئەگەربێت و بـیۆنگ یانگ بە ژیرانە مامەڵە نەكات ئەوا ئاكامی خراپی بەسەر ڕژێمەكەیدا دێت.

(دۆناڵد ترامپ) لەسەر تویتەرەكەی نووسیویەتی، چارەسەرە سەربازییەكان بە تەواوی داندراون و بۆ جێبەجێكردن ئامادەن، ئەگەر كۆریای باكوور بە ناژیرانە ڕەفتار بكات، هیوادارم (كیم جۆنگ ئون) ڕێگەیەكی دیكە بدۆزێتەوە.

پاشان تویتێـكی فەرماندەیەتی هێزی ئەمریكا لە پاسفیكی بڵاوكردۆتەوە كە تێیدا نووسراوە فڕۆكەی بۆمبهاوێژی جۆری (B-1B) لە دورگەی گوام ئامادەكراوە.

بۆمبهاوێژی (B-1B) یەكێـكە لە فڕۆكە پـێشكەوتووەكانی ئەمریكا كە خێرایـیەكەی دەگاتە نزیكەی (2500) كیلۆمەتر لە كاتژمێرێـكداو لە توانایدایە بۆمبی زۆر بەهێز هەڵبگرێت.

پـێشتر ترامپ هۆشداری بە كۆریای باكووردا كە چیتر هەڕەشە لە ئەمریكا نەكات، ئەگەر نا ئەوا ڕووبەڕووی گورزێـكی وەها دەبێتەوە كە هەرگیز جیهان پـێشتر نەیدیبێت.
بەڵام كۆریا باكوور هەڕەشەی توندی كردو وتی: سوپا ئامادەن بۆ لێدانی چەند ئامانجێك لە نزیك بنكە سەربازییەكانی ئەمریكا لە دورگەی گوام.

 

ئـ . كـ