ئەردوگان : دەبێت وڵاتانی ئیسلامی بۆ میانمار هەوڵی خۆیان بدەن

دوو شەممە, 11 ئەیلول 2017 11:20

 

 

سەرۆك كۆماری توركیا ئامادەیی وڵاتەكەی دەربڕی تاكو یارمەتی موسڵمانانی میانمار بدات، داواشی كرد توندوتیژییەكان لە دژی موسڵمانانی ئەو وڵاتە رابگیرێت.

(ڕەجەب تەیب ئەردوگان) ی سەرۆك كۆماری توركیا لە كۆبوونەوەی كۆمكاری لووتكەی وڵاتانی ئیسلامی لە بواری زانست و تەكنۆلۆژیا وێرای پاڵپشتی دەربڕین بۆ موسڵمانانی ڕۆهینگیایی، ڕایگەیاند: برایانی موسڵمانی ئێمە لە میانمار بەرەوڕووی سووكایەتی پێ‌كردن بوونەتەوە، ئەوان ناچارن ماڵ و حاڵی خۆیان بە جێ بێڵن، ئێمە دەبێ هەوڵی خۆمان بۆ ڕێگری كردن لەو پكتاوكردنە بگرینە بەر.

ناوبراو وتیشی: ئێمە هەوڵ دەدەین یارمەتی خەڵكی میانمارو بەنگلادیش بدەین و پێشگریش لەو كارەساتە مرۆییە بگرین.

سەرۆك كۆماری توركیا ئاماژە بەوە كرد كە موسڵمانانی ئاوارەی میانماری كە ئێستا لە بەنگلادیش دەژین پێویستیان بە نیشتەجێ‌ كردنە، جەختی لەوەش كردەوە: وڵاتانی ئیسلامی بۆ كۆتایی هێنان بەو توندوتیژیانە دەبێ هەوڵی خۆیان بدەن.

شایانی باسە، بووزییەكانی میانمار ماوەیەكی دوورو درێژە كە كەمینە موسڵمانەكانی ئەو وڵاتەكەیان خستۆتە ژێر گوشارەوە، بە چەشنێك كە مافە سەرەتاییەكانیان لێ‌ زەوت كردوون، هەندێكیان ئاماژەیان بەوە داوە كە دەوڵەتی میانمار مافی هاوڵاتی بوونیانی لێستاندوونەتەوە.

بەگوێرەی ئاماری ڕێكخراوی نەتەوە یەكگرتووەكان ژمارەی ئاوارە موسڵمانەكانی میانمار كە پەنایان بردۆتە بەنگلادیش لە (300) هەزار كەس تێپەڕیوە.

 

ئـ . كـ