خۆپێشاندان لە ئێران بەردەوامەو چەند كەسیش كوژراون

یەک شەممە, 31 کانونی یەکەم 2017 05:34

 

 

سەرەڕای هەڕەشەی بەرپرسانی حكومەتی ئێران لە خەڵك و خۆپێشاندەران، كۆبوونەوە ناڕەزایەتییەكان لە كوردستان و ئێران دژی حكومەت بەردەوامە.

بەپێی سەرچاوە هەواڵیەكان، خۆپێشاندانی خەڵكی كرماشان لە كوردستانی ڕۆژهەڵات، دژی بەرپرسانی ڕژێمی ئێران درێژەی هەیە.

خۆپێشاندەران لە كرماشان دژی حكومەت دروشمی وەك زیندانی سیاسی دابخرێت و مردن بۆ دیكتاتۆرەكانیان بەرز كردۆتەوە، هەروەها لە كوردستان و سەرانسەری ئێران هێڵی ئینتەرنێت پچڕاوەو نێوان شارەكانیش هێزی زۆری لیبڵاوكراوەتەوە.

ماڵپەری كوردپا بڵاویكردۆتەوە، لە كرماشان ئاڵای حكومەتی ئێران لەلایەن خۆپیشاندەرانەوە ئاگری تێبەر دراوە شوێنە ئیدارییەكانی ڕژێم وێران كراون و هاوكات دروشمی (مەرگ بۆ خامنەئی) یان وتۆتەوە.

بەپێی ڕاپۆرتەكان هێزە ئەمنییەكانی ڕژێم لە پارێزگای لوڕستان لە شاری (دروود) تەقەیان لە خەڵك كردووەو شەش كەس لە خۆپێشاندەران كوژران و چەند كەسی دیكەش بریندار بوونە.
ناسنامەی چوار كەس لەو خۆپێشاندەرانە كە كوژراون (موحەممەد چوباك، موحسین ویرایەشی، حوسێن ڕەشنۆ و هەمزە لەشنی) ڕاگەیەندراوە.

هەروەها لە پارێزگای ورمێش ڕژێم ڕێو شوێنێكی توندی ئاسایشی بەسەر شاردا سەپاندووەو هێزی زۆری لە شەقامەكان جێگیر كردووە.

لە ماوەی چەند ڕۆژی ڕابردووشدا لە سەرانسەی ئێراندا خەڵك لە شارە جیاوازەكاندا دژی گرانی، قەیرانەكانی كۆمەڵگە، چارەسەرنەكردنی كێشەكان و باقی كێشەكانی دیكە دژی ڕژێمی ئێران هەستاونەتەوەو دروشمی دژی ڕژێمیان بەرز كردۆتەوە.

جێگەی باسكردنە كۆتایی هەفتەی رابردوو خەڵكی شارەكانی مەشهەد، نیشاپوورو كاشمەر، لەبەر گرانی شتومەك، ناڕەزایەتیان دەربڕی و لەگەڵ هێزە ئەمنیەكانی حكومەتی تووشی شەڕو پێكدادان هاتن و چەند كەسێك بریندار بوون.

هەروەها لە شارەكانی تاران، قوم، هەمەدان، زاهیدان، ئەراك، ئەسفەهان چەند شارێكی دیكە دژ بە گەندەڵی و گرانی و بێكاری، هاوڵاتیان هاتنە سەر شەقانەكان و ناڕەزایەتییان دەربڕی.

هەروەها، وەزیری ناوخۆی ئێران ناڕەزایەتییەكانی دوو رۆژی رابردووی ئێران بە نایاسایی لە قەڵەم دەدات و دەڵێ: هەر كەس دەیەوێ خۆپێشاندان ئەنجام بدات، با داوا بكات.

(عەبدولڕەزا رەحمانی فەزلی) وەزیری ناوخۆی ئێران، دەڵێ : ئەگەر ناڕازییان دەیانەوێ كۆببنەوە داوای مۆڵەت بكەن تاكوو داواكارییەكەیان لەلایەن وەزارەتی ناوخۆو بەڕێوەبەرایەتی پارێزگاكانەوە تاوتوێ بكرێ.

رەحمانی فەزلی وتوویەتی: هەندێ لە ئێمە راپۆرتمان بەدەست گەیشتووە كە لە تۆڕە كۆمەڵایەتییەكان خەڵك بۆ خۆپێشاندان بانگهێشت كراوەو ئەمجۆرە كۆبوونەوانەش بێ گومان نایاسایین.

 

 

ئـ . كـ