سوپای ئێران بانگهێشتی خانەنشینانی سوپای پاسداران دەكاتەوە

چوار شەممە, 03 کانونی دووەم 2018 06:39

 

 

لەگەڵ فراوانبوونی ناڕەزایەتییەكانی خەڵكی ئێران و كوردستان، ڕێكخراوی خانەنشینانی سوپای پاسدارانی سنە، خانەنشینانی ئەم ڕێكخراوەیان بۆ كاركردنی دووبارە بانگ كردۆتەوە.

بەپێی هەواڵێكی ماڵپەری كوردپا، ڕێكخراوی خانەنشینكراوانی سوپای پاسداران بە ناردنی كورتەنامە بۆ خانەنشینكراوانی ئەم ڕێكخراوە، داوایان لێ كردوون كە بە زووترین كات خۆیان بە سوپای پاسدارانی سنە بناسێنن.

لەم كورتەنامانەدا ڕێكخراوی خانەنشینانی سوپای پاسداران، جەختی لەوە كردۆتەوە، كە بە لەبەرچاوگرتنی ئەم بارودۆخە كە هاتۆتە پێشەوەو بە مەبەستی بەرەوڕووبوونەوە لەگەڵ ئاژاوەو پشێوی پێویست دەكات بە زووترین كات خۆتان بە سوپای سنە بناسێنن.

لە هەمان كاتدا، ئیدارەی گشتی ئیتلاعاتی پارێزگاكانی ورمێ، كرماشان و ئیلام لە ڕێگەی ناردنی كورتەنامەوە هەڕەشەیان لێكردوون، كە بەشداری لە كۆبوونەوە ناڕەزاییەتییەكاندا نەكەن و خۆپێشاندانەكانیان بە قەدەغەو نایاسایی ناودێر كردووە.

هەروەها وەزارەتی ئیتلاعات، ڕێكخراوی ئیتلاعاتی سوپای پاسداران و ڕێكخراوی ئیتلاعاتی ناجا، بە بڵاوكردنەوەی پەیامێك لە تۆڕە كۆمەڵایەتییەكاندا، داوایان لە خەڵك كردووە، كە ئەو كەسانەی بەشدارییان لە خۆپێشاندانەكاندا كردووە پێیان بناسێنن.

لەگەڵ دەسپێكردنی خۆپێشاندانەكان لە ئێراندا، حكومەتی ئێران، لە شارە كوردییەكاندا هێزێكی زۆری بڵاوەپێكردووە، كەشوهەوایەكی ئاسایشی لەو شارانەدا دروست كردووەو ژمارەیەكی زۆری هێزەكانی دژە شۆڕش و سوپای پاسدارانی لە ناوەندی شارەكانی كوردستاندا بڵاو كردۆتەوە.

 

ئـ . كـ