ئەمریكا داوای كۆبوونەوەی ئەنجوومەنی ئاسایش دەكات بۆ ئێران

چوار شەممە, 03 کانونی دووەم 2018 07:04

 

 

باڵیۆزی ئەمریكا لە نەتەوە یەكگرتووەكان داوای كردووە لە بەرامبەر پەرچەكردار بە ڕووداوەكانی ئەم چەند ڕۆژەی ئێران، ئەنجوومەنی ئاسایشی نەتەوە یەكگرتووەكان خێرا كۆ ببێتەوە.

(نیكی هێڵی) باڵیۆزی ئەمریكا لەنەتەوە یەكگرتووەكان وێڕای پشتیوانی و بەرز نرخاندنی ویستی ڕەوای خۆپێشاندەران لە ئێران، ڕەخنەی توندی لەو وڵاتە گرتووە، كە خەڵكی مافویستی كردۆتە ئامانج و وتی: ئێران گرنگترین شوێنە لە جیهاندا كە پێویستی بە ئاشتییە.

هاوكات لەمبارەوە (سارا ساندێرز) وتەبێژی كۆشكی سپی راگەیەندراوێكی بڵاوكردۆتەوەو داوای لە دەسەڵاتدارانی ئێران كرد، ڕێز لە مافە سەرەتاییەكانی هاوڵاتیانی ئەو وڵاتە بگرن تاكو بۆ گۆڕانكاری ویست و داواكانی خۆیان بە شێوەی ئاشتیانە دەرببڕن.

دوای خۆپێشاندان و گرژی و ئاڵۆزییەكانی حەوت ڕۆژی ڕابردوو لە ئێران، بەرپرسانی باڵای ئەمریكا وەك (دۆناڵد ترامپ) سەرۆك كۆمار، (مایك پێنس) جێگری ترامپ و كۆمەڵێك لە كۆنگرێسمانەكانی ئەو وڵاتە بە جیا لە چەند لێدوانێكدا پشتیوانییان لە خۆپێشاندەرانی ئێران كردووەو هاوكات ڕەخنەیان لە هەڵسوكەوتی دەزگا ئەمنییەكانی ئێران و بەرپرسانی ئەو وڵاتە گرتووە.

دوێنێ (عەلی خامنێئی) ڕێبەری ئێران لە لێدوانێكیدا وتی، دوژمنانمان لەدژی ئێمە یەكیان گرتووەو ئامانجیان زەربەدان لە جەوهەری كۆماری ئیسلامی.

لە ماوەی حەوت ڕۆژ لە خۆپیشادانەكانی ئێران لە سەرتاسەری ئەو وڵاتە كە لە بەرانبەر بێكاری، ڕەوشی خراپی ئابووری و نەبوونی خزمەتگوزاری ڕوویان داوە، (24) كەس كوژراون كە دوو كەسیان ئەفسەری هێزە ئەمنیەكانی ئێرانن و (22) كەسیشیان هاوڵاتی بوون و بە بە گوێرەی ئامارە نافەرمییەكان نزیكەی (600) كەس لە سەرتاسەری ئێران دەستگیر كراون كە (450) كەسیان لە تارانن.

 

ئـ . كـ