بەدەركردنی بەیاننامەیەك كۆنگرەی سۆچی بۆ سوریا كۆتایی بەكارەكانی هێنا

چوار شەممە, 31 کانونی دووەم 2018 05:50

 

 

شەوی رابردوو كۆنگرەی سۆچی لە رووسیا كۆتایی بەكارەكانی هێناو داوای لە هێزو لایەنەكانی ناوخۆی سوریا كرد، پەك پارچەیی خاكی وڵاتەكەیان بپارێزن.

دوێنێ‌ لەسۆچی رووسیا كۆنگرەی گفتوگۆی نیشتیمانی سوریا دەستی بەكارەكانی كردو هەر شەوی رابردووش كۆتایی بەكارەكانی هێناو چەند راسپاردەیەكیشی دەركرد.

بەیاننامەی كۆتایی كۆنگرەی سۆچی دەڵێت، هەمووان ڕێكەوتوون لەسەر بنەما سەرەكییەكان و وەكو پێویستییەك سەیری دەكەن بۆ ڕزگاركردنی سوریا دوای نزیكەی حەوت ساڵ لە جەنگی ناوخۆو بڕیاریاندا وڵاتەكە بە ئاڕاستەیەكی دیموكراسیدا ببەن لەمیانەی هەڵبژاردنەكاندا، لە بەیاننامەكەدا ئاماژە بە سەرۆكی سوریا بەشار ئەسەد نەكراوە.

سەرۆكی شاندی ئۆپۆزسیۆنی سوریا (ئەحمەد تەعمە) وتی : شاندەكەی بەشداری لە كۆنگرەی سۆچی نەكردووە بەهۆی ئەوەوە كە مۆسكۆ ئەو بەڵێنانەی بەجێنەهێناوە كە پێشتر دابووی سەبارەت بە كۆتایی هێنان بە بۆمبارانكردنی هاوڵاتیانی مەدەنی و لابردنی ئاڵاو لافیتەكانی ڕژێمی سوریا لە كۆنگرەكەدا.

تەعمە راشیگەیاند، سەرمان سوڕما لەوەی هیچ كام لەو بەڵێنانەی ڕووسیا پێی دابووین جێبەجێنەكرابوون، نە بۆمبارانكردنە دڕندانەكان وەستان و نە ئاڵاو لافیتەكانی ڕژێم لە كۆنگرەكەدا لابرابوون.

وتیشی : بۆیە شاندەكە بڕیاریدا بەشداری نەكات لە كۆنگرەی سۆچیداو بگەڕێتەوە بۆ ئەنقەرە، لە كاتێكدا شاندی توركیا لە سۆچی دەمێننەوەو هەوڵدەدەن داواكارییەكانیان جێبەجێ بكرێت.

 

ئـ . كـ